Luskad Boogaloo
![](http://178.128.105.246/cars-http-upload.wikimedia.org/wikipedia/commons/thumb/1/16/Virginia_2nd_Amendment_Rally_%282020_Jan%29_-_49416109936_%28cropped%29.jpg/220px-Virginia_2nd_Amendment_Rally_%282020_Jan%29_-_49416109936_%28cropped%29.jpg)
Al Luskad Boogaloo (saozneg: boogaloo movement) zo un aozadur feuls stadunanat enep-gouarnamantel. A-wechoù e vez graet "bezen" eus al luskad lies-se. Izili al luskad a ra anezho o-unan, pe graet e vez anezho, ar boogaloo boys pe boogaloo bois.
An izili a zikslêr int frankizourien prest da gemer perzh en Eil brezel diabarzh stadunanat lesanvet boogaloo. An droienn boogaloo zo bet implijet da gentañ war al lec'hienn 4chan e-tro 2012. Kroget eo an droienn da vezañ brudet da vat e fin ar bloavezh 2019 nemetken. An izili a ra gant an droiennoù boogaloo, gant kemmoù bihan war ar ger evit chom hep bezañ kastizet, evit ober anv eus emsavadegoù feuls a-enep ar gouarnamant kevredadel pe luskadoù an tu kleiz pellañ, ar re-se o vezañ a-du gant ar gouarnamant o klask dizarmañ ar geodedourien.
![](http://178.128.105.246/cars-http-upload.wikimedia.org/wikipedia/commons/thumb/e/ea/Boogaloo_flag.svg/220px-Boogaloo_flag.svg.png)
Dre vras e vez graet eus al luskad unan eus an tu dehoù pellañ: a-du-krenn gant an armoù, enep gouarnamantel. En gwirionez pep strollad eus al luskad zo dieub, war temoù evel ar ouenn e c'hell bezañ disheñvel-mat o selloù. Lodennoù eus al luskad zo dreistbeliourien wenn pe neveznazied o klask plantañ reuz betek ma vefe ur brezel gouennel o tarzhañ. Lod all zo a-enep an naziegezh hag ar ouennelouriezh.
Al luskad Boogaloo a oa ul luskad enlinenn da gentañ met abaoe ez eo tremenet d'ul luskad a vez gwelet en darn eus an darvoudoù foran er Stadoù-Unanet Amerika dreist-holl ar manifestadegoù evit George Floyd pe a-enep ar c'henfinamant. Armet-mat int hag alies e vezont gwelet gant ur roched hawaiian ha gant unwiskoù lu.