Agrobacterium
Agrobacterium | |
---|---|
![]() | |
Sailkapen zientifikoa | |
Erreinua | Pseudomonadati |
Filuma | Pseudomonadota |
Klasea | Alphaproteobacteria |
Ordena | Hyphomicrobiales |
Familia | Rhizobiaceae |
Generoa | Agrobacterium [[|]] |
Datu orokorrak | |
Gram tindaketa | bakterio gram-negatibo |
Agrobacterium generoa bakterio Gram negatiboz osatuta dago, bazilo itxura dutenak. Aerobio hertsiak dira, eta mugikorrak. Genero honetako bakterio gehienek landareak infektatzen dituzte, eta haientzat patogenoak dira.
Beste landare-patogenoen aldean, landareak zimeltzen dituztenak (Erwinia, Xanthomonas...), Agrobacterium tumoreak sortzen ditu. Bakterio honek zezidio izeneko egiturak eragiten ditu infektatutako landareetan.
Genero honetako espezie ugari basofiloak dira, hots, lurzoru oso alkalinoetan bizi dira.
Agrobacterium tumefaciens da ondoen ezagutzen dugun espeziea. Bakterio honek plasmido bat dauka, Ti izenekoa, landare-tumoreak eragiten dituena. Bakterio patogenoa landarean sartzen da zauriak aprobetxatuz (batez ere erro eta zurtoinaren arteko loturan). Behin sartuta, mikrobioaren Ti plasmidoa landarearen kromosoman integratzen da, eta bakterioaren ADN zelula eukariotoaren ADNn txertatzen da, beraz [1]. Horren ondorioz, plasmidoak zelula normala zelula tumoral bihurtzen du.
Agrobacteriumek landareen ADNn bere material genetikoa txertatzeko duen gaitasun horri etekina ateratzen zaio, eta bakterioa erabili da landareen ezaugarriak aldatzeko, ingeniaritza genetikoaren bitartez. Modu horretan genetikoki eraldatutako landareak lortzen dira, landare basatiak baino interesgarriagoak direnak ikuspuntu ekonomiko edo industrial batetik (landare transgenikoak).
Erabilera bioteknologian
[aldatu | aldatu iturburu kodea]Esan bezala, Agrobacteriumek duen plasmidoa (Ti) erabiltzen da landare transgenikoak eskuratzeko. Horretarako, baina, lehenik eta behin plasmidoari tumoreak sortzen dituen geneak kendu behar zaizkio. Gero, landarean txertatu nahi diren geneak plasmidoan sartzen dira, markadore batekin batera (antibiotiko batekiko erresistentzia, esaterako); markadore horrek genetikoki eraldatutako landareak aukeratzeko balio izango du. Azkenik, eta Ti plasmidoak landarea infektatu ondoren, landareak antibiotikoa duen ingurune batean jartzen da, plasmidoaren geneak ez dituztenak hil daitezen (eta interesatzen zaizkigunak gera daitezen) [2].
Taxonomia
[aldatu | aldatu iturburu kodea]Azken urteotan Agrobacterium generoak aldaketa taxonomiko sakonak ezagutu ditu. Genero honetako espezie asko Rhizobium generoan txertatu dira (esaterako, garai bateko Agrobacterium tumefaciens orain Rhizobium radiobacter da). Izan ere, Agrobacteriumek eta Rhizobiumek ezaugarri fisiologiko, ekologiko eta genetiko asko partekatzen dituzte.