France Prešeren
![](http://178.128.105.246/cars-http-upload.wikimedia.org/wikipedia/commons/thumb/0/0a/France_Pre%C5%A1eren_-_lithograph_%281866%2C_Pre%C5%A1irnove_poezije%29_02.jpg/220px-France_Pre%C5%A1eren_-_lithograph_%281866%2C_Pre%C5%A1irnove_poezije%29_02.jpg)
France Prešeren (Vrba, Žirovnica, Slovenie 3 di Dicembar 1800 - Kranj 8 di Fevrâr 1849) al è il plui famôs poete sloven, un dai plui impuartants poetis romantics de Europe e une figure centrâl pe storie de lenghe slovene. In chê volte la Slovenie e jere includude tal Imperi Asburgjic, par chest soredut tai vieris documents si pues cjatâ ancje la forme todescje dal non, Franz Prescheren; vuê il paîs dulà che il poete al è nassût al è juste sul confin tra Austrie e Slovenie.
Vite
[cambie | modifiche il codiç]Prešeren al nas tal paisut di Vrba (ven a stâi "salgâr"), intune famee di contadins di ideis avonde modernis. Cuant che al à vot agns al va a stâ là dal barbe Jožef, plevan Kopanje, e al va a scuele a Ribenice (Ribnica). In chescj agns al sucêt alc leât a la sessualitât che al influençarà dute la personalitât dal poete, soredut tal rapuart cu lis feminis.
Finît il liceu, Prešeren tal 1821 al si trasferìs a Viene par studiâ leç, bandonant cussì la idee di deventâ predi, che no sarès displasude a sô mari Mina). In chescj agns si dediche al studi de poesie, sei classiche sei romantiche, e al scomence ancje a scrivi cualchi robute. Tal 1828 al devente dotôr in leç e al va prime in Moravie, par tornâ daspò a Lubiane. Lì il poete al scomence a lavorâ come avocat e tal 1829 al spose, sburtât de mari e dal barbe, Marija Johana Khlun, une borghese plene di bêçs di Graz; daspò dal entusiasim iniziâl, il rapuart cu la femine al deventarà un grum frêt e sierât.
Prešeren al devente in chest periodi grant amì di Matija Čop (par todesc Matthias Tschop), un dai plui impuartants inteletuâi slovens dal timp, espert ancje de teorie de leterature; Čop al è convint de necessitât di meti dongje une leterature slovene, separade di chê todescje, cussì di esprimi il spirt e la identitât slovene, in acuardi cu lis teoriis romantichis di mode in chê volte.
Tal 1834 e ven fûr la racuelte Sonetni venec (Sartôr di sonets), ispirade soredut a la figure di Julija Primic (tod. Julia Primitz), une siore di Lubiane.
Tal 1835 al mûr il barbe Jožef, chel de famee che al jere plui dongje di Prešeren, e simpri in chel àn al mûr inneât su lis rivis de Sava ancje Matija Čop. Il dolôr pe muart dal amì al è ben presint inte elegjie scrite par todesc in sô memorie.
La mancjance di rapuarts amorôs stabii, l'amôr no ricambiât par Julija Primic, la muart di Čop e lis insodisfazions sul lavôr a metin in crisi il poete tal 1835; chest lu puarte a butâsi sul bevi, a no lâ plui a vore e ancje a pinsîrs di suicidi.
Inte Vierte dal 1836 e ven publicade une des sôs oparis plui impuartantis, Krst pri Savici - "Il batisim lì de font Savica". Simpri in chest àn si met insiemi cun Ana Jelovšek, che e deventarà la sô amant.
Tai agns seguitîfs, Prešeren al scomence a interessâsi a lis tradizions popolârs slovenis e tal 1839, insiemi cul amì Andrej Smole, contrari al guvier austriac, al progjete un gjornâl par sloven, idee blocade daurman de censure austriache. Ma Smole al mûr di colp, e chest, dongje al disinterès di Ana, e a un sintiment gjenerâl di malstâ, a provochin une altre crisi intal poete.
La grande ispirazion poetiche di Prešeren si pues viodile a clâr ancje in tes sôs ultimis oparis, come par esempli Zdravljica ("Il Brindis"), scrite tal 1844, ma publicade cence censure dome tal 1848, par vie dal test, e la elegjie V spomin Andreja Smoleta' ("In Memorie di Andrej Smole"). Tal autun dal 1846 si trasferìs a Kranj, dulà che al mûr ai 8 di Fevrâr dal 1849.
La fame moderne
[cambie | modifiche il codiç]- Prešeren al è dal sigûr une des figuris centrâls de culture slovene, sei par lis inovazions ae lenghe e ae leterature, sei pal disvilup di un spirt nazionâl sloven.
- Ai 8 di Fevrâr, date de muart, in Slovenie al è il dì nazionâl de culture
- Prešeren al jere su la cjarte di 1000 talars e al è su la monede di 2 Euros.
- La place principâl di Lubiane, Prešernov trg, e je dedicade al poete e e à une statue dedicade a lui tirade sù tal 1905 cuntune grande partecipazion popolâr.
- L'imni nazionâl sloven al è dal 1991 chel de setime strofe di Zdravljíca