Tao Teh King/Bab 17
XVII.
BERSIFAT SAWADJARNJA.
- Dalem djeman pertama, jang paling koeno sekalih, manoesia tida taoe jang marika ada poenja kepala-kepala jang pegang prentah.
- Dalem djeman jang kadoea marika hargain dan poedji pada orang-orang jang djadi kepala pamerentah.
- Dalem djeman katiga rahajat merasa takoet pada marika.
- Dalem djeman ka'ampat rahajat perhinaken dan pandang rendah pada kepala pamerentahnja.
- Dimana kapertjaja'an soedah mendjadi koerang, tida ada lagi jang bisa bikin rahajat taro andelan.
- Bagimana hati-hati orang Boediman kapan hendak oetjapken perkata'an!
- Kapan ia soedah sleseken kawadjibannja dan ka'ada'an negri mendjadi mamoer, rahajat tjoemah membilang sadja, „SekaTang kita poenja ka'ada'an berdjalan menoeroet sawadjarnja, jang dateng dari kita-orang sendiri!"
⁂
Itoe pembagian ka'ada'an doenia mendjadi ampat djeman, ada tjotjok dengen peritoengan Hindoe dan Griek. Orang Hindoe membagi ini doenia mendjadi ampat bagian besar jang dinamakan Krita atawa Satya Yuga, Treta Yuga, Dwapara Yuga dan Kali Yuga, jang tjara Griek dinamaken Djeman Emas, Djeman Perak, Djeman Tembaga dan Djeman Besi. Itoe Djeman Ka'ampat, Kali Yuga atawa Djeman Besi, ada djeman sekarang ini, jang kita-orang baroe sadja mengindjek. Menoeroet katerangan dari dongengan Oriek, di Djeman Emas, koetika doenia diprentah oleh Kronos, manoesia hidoep tentrem, sehat, pandjang oemoer, tida kenal pergoeletan dan kadosa'an. Di Djeman Perak, koetika Zeus (Jupiter) pegang prentah, ka'ada'an moelai kaloet, tapi manoesia masih bisa hidöep senang. Penghidoepan baroe moelai djadi soeker dan penoeh kadosa'an koetika moentjoel Djeman Tembaga jang bikin manoesia masóek dinaraka, dan Djeman Besi ada jang paling djelek dan heibat sendiri. Lao Tze poen bajangin perbeda'an dari itoe sasoeatoe djeman dengen oendjoek bagimana priboedi manoesia djadi semingkin djelek dan kaloet lantaran kliroenja orang-orang jang pegang pimpinan atas rahajat. Di Djeman Emas, jaitoe jang paling koeno sekalih, koetika pamerentahan ada dipegang oleh Radja-radja Boediman, manoesia tida kenal siapa kepalanja, jaitoe tida merasa diprentah, kerna pameren tahan jang pande dan sampoerna tida oendjoek ka'angkeran, pengaroeh, kakwasa'an atawa desekan pada rahajat, hanja dengen goenaken atoeran aloes marika dipimpin aken berdjalan ka djoeroesan bener dan lakoeken kawadjiban sabagimana moesti zonder merasa lagi. Di Djeman Kadoea, koetika rahajat moelai menaro harga, memoedji dan mengoempak pada kepala-kepala pamerentahannja, itoelah mendjadi tanda priboedi manoesia soedah merosot toeroen satoe tingkat, kerna jang mendjadi radja soedah madjoeken diri ka depan boeat dapet perindahan dari rahajat. Koetika sampe di Djeman Katiga dan rahajat moelai merasa takoet pada kepala-kepala pamerentah, inilah tandanja di dalem doenia orang moelai goenaken atoeran keras, paksaan atawa antjeman hoekoem, hal mana soedah kadjadian lantaran moraalnja rahajat semingkin merosot toeroen, kerna radja-radja soedah tida toeroet lagi atoeran jang baek dari djeman koeno Kasoedahannja dalem Ojeman Kaämpat rahajat berbalik djadi bentji dan hinaken pada kepala-kepala jang pegang pamerentahan, tandanja doenia soedah mendjadi kaloet betoel-betoel.
Ini loekisan atawa penoetoeran dari Lao Tze tentang sifatnja Djeman Kaämpat ada tjotjok sekaiih dengen kaädaän doenia sekarang, dimana pembrontakan atawa perlawanan dari rahajat pada pemimpin-pemimpinnja ada terdjadi dengen oemoem. Ini kasoedahan jang djelek, menoeroet Lao Tze, ada dari lantaran jang djadi kepala pamerentah terlaloe maoe menggretjok, maoe kasih liat kapandeannja aken atoer dan pimpin rahajat, jang he4idak dipaksa soepaja lekas djadi madjoe dan sopan, boekan dibiarken marika bergerak sendiri dengen sawadjarnja satjara wet dari natuur, hingga kasoedahannja timboel kakaloetan, kerna jang djadi kepala pamerentah tida dapet lagi rahajat poenja kapertjajaän. (Ajat 1-5). Sabaliknja itoe radja-radja Boediman di djeman koeno, jang bekerdja dengen diam-diam dan telah pimpin rahajat mendjadi mamoer dan beroentoeng zonder marika mendoesin, tida perna banggain djasa-djasanja, dan tida perna peringetken pada rahajat atas marika poenja boedi dan kabaekan, hingga rahajat anggep itoe nasif baek ada beratsal dari maoenja natuur dan dari marika sendiri poenja perboeatan. Tetapi dengen begitoe, maski itoe radjaradja tida dapet trima kasih dari rahajat jang hidoep beroentoeng di djeman mamoer, marika poen terbebas dari tjomelan, bangkitan, tjelahan dan koetoekàn kapan dateng djeman apes atawa katjilakaän heibat, kerna rahajat anggep itoe semoea ada dateng dari takdir jang tida perloe diboeat penasaran. Begitoelah dengen berlakoe hati-hati, tida maoe akoein djasa, pahala dan kapandean, itoe radja-radja Boediman di djeman koeno bisa teroes pegang pimpinan satjara beres, rahajat tinggal tentrem biar poen waktoe hadepin djeman soeker, hingga soeal mengatoer pamerentahan negri mendjadi ringkes dan saderhana. (Ajat 6-7).
![]() | Sebuah gambar seharusnya muncul pada posisi ini dalam naskah. Jika Anda bisa menyediakannya, lihat Wikisource:Pedoman gambar dan Bantuan:Menambah gambar sebagai panduan. |