Tao Teh King/Bab 19
KOMBALI KAPADA NATUUR.
- Lemparken kaoe poenja kasoetjian dan segala priboedi, nanti rahajat dapetken kafaedahan beratoesan lipet besarnja.
- Laloeken Pri Dermawan dan Kawadjiban pada Tetangga, nanti rahajat balik kombali pada perhoeboengan jang sawadjarnja dalem hal membakti pada orang-toea dan menjinta anak oleh jang djadi iboe-bapa
- Lepasken segala daja katjerdikan dan pikiran boeat dapet kaoentoengan, nanti pentjoeri dan perampok linjap dengen sendirinja.
- Tiga matjem recept di atas ada berarti bahoea peratoeran di lahir sadja tida tjoekoep, maka kita-orang perloe balik kombali pada sifat jang sawadjarnja menoeroet natuur.
- Orang jang hendak djadi pemimpin bangsa haroes oendjoek kasaderhana'an, berlakoe djoedjoer dan teroes-terang, tindes kaserakahan, dan singkirken segala kainginan boeat dapetken kabesaran.
⁂
Oedjar oedjar di atas ada samatjem paradox atawa pertentangan pada anggepan oemoem, hingga satoe katerangan loeas ada perloe kapan orang ingin mengarti lebih djelas maksoednja.
Satoe kalih manoesia soedah diadjar boeat pegang kasoetjian dan priboedi, soedah pasti moesti timboel kakaloetan jang membikin linjapnja katentreman, kerna salaennja ken tipoe-daja boeat berpoera-poera, fihak jang anggep dirinja soedah bisa penoehken perminta'an boeat djadi soetji dan berboedi lantes pandang rendah pada jang berada di sablah bawahnja, jang segala tjatjat dan kakoerangannja saban-saban dioendjoek dan dibèbèr satoe per satoe, hingga timboelken perbantahan, rasa panas, gemes dan goesar tida abisnja. Anak-anak ketjil bisa hidoep senang dan beroentoeng sebab marika belon kenal kasopanan, kawadjiban, kasoetjian dan laen-laen kabedjikan jang diempos dari loear, hanja mengikoetin sifat natuur jang sawadjarnja. Dalem kalangan anak-anak ketjil tida dikenal kamesoeman dan karesikan, peradatan atawa oepatjara, kaja dan miskin, moelja atawa hina, pinter atawa bodo, djelek atawa bagoes, deradjat tinggi atawa rendah, hanja semoea kawan-kawan dipandang sama rata, hingga marika bisa liwatken temponja dengen beroentoeng sebab tida ada apa-apa jang menahan, menjegah atawa membedaken. Maka kapan pada rahajat jang oemoem itoe segala atoeran moraal tida dikasih taoe, hanja dibiarken marika berlakoe menoeroet wateknja sendiri jang dibekelin oleh natuur, pastilah hidoepnja ada lebih beroentoeng dari-pada kaloe didjedjelin sama segala oepatjara, atoeran, kamoesdan kawadjiban jang soeker dimengarti dan tida nanti bisa didjalanken dengen betoel. (Ajat 1). Satoe kalih orang soedah adaken samatjem atoeran, perhatian rahajat tjoemah ditoedjoeken sampe di watesnja itoe atoeran sadja. Oepamanja, itoe oepatjara sembahjangan atawa perkaboengan waktoe kamatian, ada banjak anak jang merasa soedah tjoekoep djalanken Hauw kapan soedah penoehken apa jang dioendjoek di dalem kitab Lee Kie, zonder ambil poesing pada itoe kabeneran, bahoea perkaboengan dan sembahjangan dalem hati, pikiran dan prilakoe sahari-hari, ada jang paling perloe.
Di negri-negri Barat, dimana orang oetamaken pri dermawan saloeas-loeasnja dalem segala tjabang, seperti merawat orang sakit, oeroes anak jang tersia-sia, toeloeng orang jang werkloos dan laen-laen, oemoemnja pendoedoeknja ada lebih kouwkati dari pada bangsa Timoer. Tiada gampang saorang miskin jang sakit, jang tida poenja pakerdja'an atawa jang anak-anaknja terlantar, nanti maoe diopen oleh tetangga atawa familienja, kerna itoe hal dianggep ada kawadjibannja pakoempoelan-pakoempoelan amal. Sabaliknja di mana-mana desa jang pendoedoeknja masih hidoep dengen menoeroet sifat sawadjarnja atawa watek dari natuur, itoe perasa'an ingin menoeloeng dan membantoe apa jang bisa dikerdjaken, lantes sadja moentjoel dengen sendirinja, zonder disoeroe atawa diandjoerin lagi. Saban ada orang kamatian tetangga-tetangganja dateng menoeloeng boeat oeroes dan gotong zonder ada song-soe-hwe lagi; orang jang sakit dirawat dan dibriken obat oleh tetangganja zonder diminta. Orang-orang asing dibri tempat menedoeh, familie jang miskin dikasih menoempang tinggal dan makan, zonder itoe orang-orang desa mengenal salah satoe kitab soetji jang mengadjarin pri dermawan. Itoe sifat persoedara'an, atawa saling menoeloeng satoe sama laen, bisa toemboe sendiri kerna bibitnja memang soedah ada di dalem watek manoesia. Tjoemah kapan itoe orang-orang soedah mengenal kasopanan dan kapinteran, baroelah marika poenja sikep djadi berobah, dan segala perboeatannja dibarengin dengen pertimbangan tentang oentoeng-roegi, terpoedji atawa tertjelah, moelja atawa hina, dan sabaginja lagi, kerna wateknja jang aseli soedah dibikin kotor. (Ajat 2).
Kapan jang djadi kepala berlakoe tida adil pada rahajat, itoe rahajat poen nanti toeroet toeladannja aken mendjadi djahat, dan kapan satoe negri poenja pamerentahan jang baek dan adil, hingga rahajat merasa senang dan tentrem, segala ingetan aken berboeat djahat poen aken linjap sendirinja. Boleh djadi dalem ka'ada'an doenia jang seperti sekarang, ini peladjaran tida bisa didjalanken dengen sapenoehnja sebab penghidoepan manoesia soedah djadi begitoe kaloet dan dan roewet; tetapi dalem Lao Tze poenja djeman, dimana rahajat Tiongkok hidoep dalem berbagi-bagi kaoem jang terpisah satoe dari laen dengen diprentah oleh kepala-kepala jang berlakoe seperti tetoea dari familie, ini theorie bisa didjalanken dengen sampoerna. Biar bagimana poen toeladan baek dari fihak jang pegang prentah selaloe membri pengaroeh besar bagi tabeatnja rahajat maski di ini djeman jang amat kaloet. (Ajat 3)
Dengen tida mengandel pada atoeran di lahir, hanja pegang tegoeh pada watek aseli menoeroet natuur, kaslametan doenia dan manoesia masih bisa dipertahanken, kaloe sadja pemimpin-peminpin bangsa bisa berlakoe saderhana, djoedjoer, tida serakah dan temaha pada kabesaran, hanja atoer penghidoepan oemoem soepaja balik kombali menoeroet natuur. Dan ini matjem recept dari Lao Tze boekan sama sekalih tida bisa dipake dalem ini djeman. Kamadjoeannja pengataoean wetenschap membikin orang mendoesin bagimana pri kasehatan manoesia bisa diperbaekin kapan orang hidoep menoeroet natuur, seperti berdiam di oedara terboeka, mendjemoer di sinar matahari, banjak bergerak badan, makan dan pake jang saderhana, dan malah banjak bangsa Europa jang menganoet pada Nudisme atawa hidoep terlandjang. Ini semoea perobahan dari kabiasa'an dan pakean serta pergaoelan, dan dilinjapkennja wates-wates jang memisahken lelaki dengen prampoean enz. enz. jang djadi sifatnja ini djeman, ada mengoendjoek terang sekalih bahoea Lao Tze poenja peladjaran aken „Balik kombali kapada Natuur" boekan samatjem theorie kosong, kerna pergaoelan hidoep dari ini djeman soedah mendoesin atas kafaedahannja. maski tjoemah baroe berwoedjoet dalem kalangan lahir jang mengenaken kapentingan toeboeh.
![]() | Sebuah gambar seharusnya muncul pada posisi ini dalam naskah. Jika Anda bisa menyediakannya, lihat Wikisource:Pedoman gambar dan Bantuan:Menambah gambar sebagai panduan. |