Tao Teh King/Bab 33
XXXI.
MENGENAL DIRI SENDIRI.
- Siapa bisa kenal laen orang ialah haroes dibilang pande, tapi jang bisa mengenal dirinja sendiri ialah ada satoe boediman.
- Siapa bisa taloekin laen orang boleh dibilang koeat, tapi jang bisa taloekin dirinja sendiri ialah ada berkwasa besar.
- Saorang jang hartawan jaitoelah jang bisa merasa tjoekoep.
- Saorang jang berkamaoean tetep dan bertoedjoean tentoe pastilah bisa bertindak tjepet.
- Siapa tinggal tetep dalem kadoedoekan jang pantes boeat ia tempatin, selamanja tinggal santosa.
- Siapa jang mati tetapi tida moesna ialah jang sasoenggoenja beroemoer pandjang.
⁂
Disini kembali Lao Tze menoelis oedjar oedjar jang, maskipoen pendek dan ringkes, ada menggenggem peladjaran begitoe tinggi dan loeas hingga bisa dipake bahan boeat orang menoelis satoe boekoe tebel.
Lebih doeloe perloe diterangken, jang dibilang „kenal" laen orang boekan dimaksoed roepa dan pakerdja'annja, hanja tabeat, pengartian, priboedi kabaekan, sabagi djoega kalemahan dan tjatjat-tjatjatnja. Ada djadi satoe kaoentoengan besar kapan orang mempoenjai itoe kapandean boeat bisa kenalin orang, soepaja tida bisa kadjeblos, tertipoe atawa kena dikapiranin oleh sobat-sobat palsoe atawa pegawe-pegawe jang tjoerang dan tida setia. Kapan satoe radja bisa kenalin sifat mantri-mantrinja, satoe pembesar taoe watek orang-orang sabawhannja, atawa satoe chef mempoenjai itoe ka'awasan aken bisa kena kamampoean dan kwaliteit dari pegawe-pegawenja, boleh dipastiken pakerdja'annja aken berhatsil. Orang jang begitoe memang haroes dipoedji tjerdik dan pande.
Tetapi Lao Tze oendjoek, maski mengenal laen orang ada satoe kapandean jang berfaedah, mengenal diri sendiri ada lebih berharga lagi, kerna ini tjoemah bisa didjalanken oleh saorang boediman, oleh satoe Seng Djin, jang soedah dapetken penerangan. Sabagitoe lama saorang masih belon kenalin sifat dirinja, jaitoe tida insjaf pada ia sendiri poenja kakoerangan, kalemahan dan tjatjat-tjatjat, ia poen tida bisa dapetken kamadjoean sampoerna, kerna biar bagimana pinter, tjerdik dan pande, ia tida nanti bisa mengenai laen orang sampe tjoekoep kapan ia tida bisa kenal dirinja sendiri. Diantara ini doea — mengenal diri sendiri dan mengenal laen orang — pastilah jang pertama ada lebih gampang, sebab orang tida bisa semboeniken apa-apa pada dirinja sendiri. Tapi toch ada banjak sekalih orang jang „tida taoe diri", seperti si bodo anggep dirinja pinier, si moraal bedjad anggep dirinja boediman, dan sabaginja lagi. Maka hal mengenal diri sendiri ada satoe soeal jang paling penting dalem manoesia poenja kahidoepan, sebab disitoelah ada koentjinja boeat dapetken kasampoerna'an batin. (Ajat 1). Soeal menaloekin laen orang boekan sadja dalem oeroesan berkalahi atawa peperangan, hanja bisa dipake djoega dalem perdjoangan politiek, mereboet kakwasa'an atawa pengaroeh, persaingan dagang dan sabaginja lagi, dalem hal mana fihak jang menang biasa dianggep„koeat".
Tetapi ini matjem kamenangan biar poen bagimana besar dan penting tida begitoe goemilang sabagi djikaloe orang bisa taloekin dirinja sendiri, kerna seperti djoega dalem soeal mengenal diri, hal menaloekin diri poen ada meminta pemandangan dan pengartian loeas, kakerasan dan katetepan hati loear biasa, jang tjoemah bisa dilakoeken oleh orang berbatin tinggi, jang soedah mengambil poetoesan pasti aken mengindjek djalan oetama, jang tjoemah bisa dilintasi kapan orang soedah bisa tindes hawa nafsoenja dan bebasken diri dari segala iketan doenia soepaja bisa bersatoe pada Tao jang maha besar. Maka itoe siapa bisa taloekin diri boekan tjoemah moesti dipandang koeat, hanja berkwasa, kerna orang tida nanti bisa taloekin dirinja dalem arti jang betoel djikaloe ia tida poenja kakwasa'an besar dalem segala hal, lahir dan batin. (Ajat 2).
Manoesia jang hidoep di doenia memang moesti bekerdja aken mentjari redjeki, sebab iapoenja badan kasar koedoe dikasih makan, pakean, tempat tinggal dan laen-laen kaperloean, boekan sadja oentoek diri sendiri, tapi djoega boeat familie dan laen-laen orang lagi. Djadinja soeal mentjari redjeki atawa kaoentoengan, bagi saorang biasa itoelah ada satoe kaharoesan pantes, Jang mendjadi bahaja jaitoelah kapan orang tida merasa tjoekoep lantaran dari serakah dan kemaroeknja. Djoestroe itoe hawa nafsoe jang tida bisa dikendaliken, tida mengenal wates, ada jang paling menjilakaken. Banjak orang pande dan berpengaroeh atawa hartawan besar, soedah djadi terdjoengkel lantaran tida kenal sampe di wates mana ia haroes berdiam, tida bisa merasa poeas. Dan orang jang begitoe, maski mempoenjai kakajaan besar, tida berbeda dengen saorang miskin, kerna biarpoen si miskin bergoelet tjoemah boeat dapet sabatok beras sedeng si hartawan poeter otak boeat bisa tambah kakaja'an soépaja djadi itoeng millioen, tetapi doea-doea poenja toedjoean ada saroepa sadja, jaitoe ingin dapet apa-apa jang iaorang tida poenja. Sabaliknja, maskipoen ia ada saorang miskin, tapi djikaloe bisa merasa poeas, hingga hidoepnja tentrem, tida penasaran, sirik atawa djeloes pada laen orang, ialah soedah boleh dianggep hartawan. (Ajat 3).
Kakaloetannja penghidoepan manoesia, teroetama dalem pertjoba'an aken mentjari kamadjoean batin, kabanjakan dari lantaran tida mempoenjai maksoed atawa toedjoean jang tentoe, pikirannja gampang bersangsi dan sabentar-bentar berobah. Sri Krishna ada bilang, dari djoeroesan mana sadja orang bertindak, djikaloe dengen penoeh kasoedjoetan, nistjaja aken berhatsil. Satoe kalih orang soedah ambil poetoesan tentoe ka mana hendak menoedjoe, ia nanti bisa dapet kamadjoean pesat, kerna semingkin djaoe ia bertindak, pengalaman dan pengartiannja poen aken bertambah, hingga itoe rintangan-rintangan jang kaliatannja begitoe heibat dan bikin laen-laen orang djadi poetoes harepan, ia nanti bisa lintasin dengen gampang sadja. Memang peladjaran batin ada soesah, tapi sabagian besar dari itoe kasoesahan ada dari lantaran kabanjakan orang poenja toedjoean masih serba limboeng. Dan ini matjem kalimboengan boekan sadja dalem soeal kabatinan, hanja dalem oeroesan lahir atawa penghidoepan sahari-hari poen bisa meroegiken. (Ajat 4).
Banjak orang pandang ini doenia ada tempat kasoesahan, kerna orang moesti bergoelet teroes boeat dapet penghidoepan. Lao Tze terangken boeat bisa hidoep santosa dan tentrem sabetoelnja tida terlaloe soesah, kaloe sadja masing-masing orang jang soedah pilih atawa tempatken satoe kadoedoekan atawa pentjarian, tida tjoba kaloear dari garisan aken rampas atawa langgar haknja laen orang. Djoestroe lantaran masing-masing orang hendak maen kangkangin, poenjaken atawa tarik kaoentoengan sendiri sabesar-besarnja dengen tida perdoeli kapentingan dari jang laen maka doenia sekarang mendjadi kaloet. Tapi sabaliknja kapan satoe orang soedah kenal dan taloekin dirinja sendiri hingga penghidoepannja ia bisa watesin dan merasa tjoekoep, serta soedah ambil poetoesan tetep ka mana hendak menoedjoe, — orang jang begitoe pastilah bisa memilih satoe kadoedoekan jang tida oesah mengganggoe atawa meroegiken laen orang, hingga tida timboelken pertentangan dan pergoeletan jang kabanjakan timboel dari bentji, djeloes dan dengki. Dan ini sikep bermoesoeh soedah moentjoel lantaran laen-laen orang merasa kapentingannja terganggoe, oepama hendak direboet, disaingin, atawa didorong kabelakang. Maka kapan itoe orang berdiam dalem kadoedoekannja sendiri dengen tida tjoba madjoe ka moeka, desek atawa kasampingken laen orang, pastilah ia aken hidoep dengen santosa, terbebas dari segala matjem ganggoean jang terbit dari pergoeletan hidoep (Ajat 5). Siapa terlahir moesti mati. Inilah ada wetnja natuur atawa kahidoepan poenja Tao jang tida bisa dilawan. Tapi orang bisa mati zonder djadi moesna, jaitoe kapan ia soedah bisa persatoeken diri dengen itoe Tao jang melipoeti seloeroeh alam, dari mana segala machloek dan benda telah moentjoel, dan ka mana segala apa aken kombali poelah. Dan lantaran Tao tida bisa moesna — tida ada permoela'an dan tida ada pengabisannja — maka siapa bersatoe pada Tao ialah aken dapetken kahidoepan jang kekel boeat selama-lamanja. Tjoemah orang jang pisahken diri, jang anggep dirinja berbeda dari laen-laen orang, aken alamken kamatian dan kamoesnaan — jang termoesna ada iapoenja sifat kouwkati, serakah dan tabeat asingin diri, jang semoea ada bertentangan dengen Tao, Ia aken tanggoeng sangsara teroes-meneroes sampe ia tersedar atas adanja itoe persatoean di dalem Tao dan lepasken itoe anggepan njasar aken hidoep terpisah. (Ajat 6).
![Tao Teh King (page 159 crop)](http://178.128.105.246/cars-http-upload.wikimedia.org/wikipedia/commons/thumb/8/8e/Tao_Teh_King_%28page_159_crop%29.jpg/250px-Tao_Teh_King_%28page_159_crop%29.jpg)