Tao Teh King/Bab 50
L.
HARGANJA PENGHIDOEPAN.
- Manoesia menjingkir dari Kahidoepan dan masoek ka dalem Kamatian.
- Itoe Pintoe dari Kahidoepan ada tigabelas djoemblahnja; dan pintoe dari Kematian poen begitoe djoega.
- Dengen sabagitoe banjak djalan, Kahidoepan berlaloe dengen tjepet kadalem Kamatian, Dan apakah sebabnja ?
- Sebab manoesia tjoemah bergoelet boeat kedjer Kahidoepan dari Nafsoe.
- Ada dibilang bahoea saorang jang soedah taoe bagimana moesti melindoengken Kahidoepan bisa bikin perdjalanan ka tempat djaoe zonder sedia perlindoengan terhadep serangannja badak dan matjan.
- la bisa madjoe ka medan peperangan zonder merasa takoet pada pedang moesoeh.
- Itoe badak tida bisa dapetken tempat dalem toeboehnja jang bisa ditemboesin oleh iapoenja tandoek.
- Itoe matjan tida bisa dapetken tempat dalem toeboehnja jang bisa ditjengkerem oleh iapoenja koekoe.
- Itoe pedang tida dapetken tempat dalem toeboehnja jang bisa dibatjok.
- Mengapalah begini?
- Itoelah ada dari sebab ia soedah kalahken Kamatian.
⁂
Inilah ada satoe dari fatsal-fatsal dalem Tao Teh King jang paling gelap dan samar. Di djeman koeno ada banjak orang jang artiken, ini fatsal hendak mengoendjoek bahoea, dengen fahamken Tao, orang bisa djadi dewa atawa dapetken kasaktian hingga segala matjem binatang boeas tida brani mengganggoe, tida mempan sendjata, dan tida bisa mati. Dengen berdasar atas ini anggepan, kaoem Taoist jang belakangan telah berobah haloean aken fahamken segala matjem ilmoe gaib, jang toedjoeannja boeat mentjari kasaktian, djadi dewa dan tida bisa mati, sedeng Lao Tze poenja philosofie jang tinggi tida begitoe diperhatiken, hingga kasoedahannja Taoisme djadi samatjem agama jang paling tachajoel, dimana penganoetnja lebih banjak mengedjer Ilmoe Item (Black Magic) dari-pada mentjari katentreman hidoep.
Sabetoelnja dalem oedjar oedjar di atas Lao Tze ada goenaken beberapa matjem symbool. Itoe tigabelas pintoe dari kahidoepan dan kamatian ada dimaksoedken tigabelas lobang jang ada dalem badan manoesia, jaitoe: di kepala ada toedjoeh — doea mata, doea koeping, doea lobang idoeng dan satoe moeloet. Di toeboeh sabelah atas ada tiga — doea lobang tetee, satoe lobang poeser. Di toeboeh bagian bawah dipandang ada tiga — satoe tempat boeang kotoran, satoe boeat aer kentjing dan satoe lagi boeat mengaloearken atawa menerima bibit. Maski jang terseboet belakangan kaliatannja mendjadi satoe dengen tempat mengeloearken aer kentjing, tapi sabetoelnja memang doea, dan ini bisa diliat lebih teges pada orang prampoean. Djadinja jang dibilang „tigabelas pintoe" dari Kahidoepan dan Kamatian sabetoelnja ada manoesia poenja toeboeh sendri.
Ini badan kasar tjoemah djadi tempat dimana roh — lebih betoel: roh-roh — masoek berdiam dan dengen begitoe membikin tertjipta apa jang dinamain Kahidoepan. Kapan itoe roh soedah menjingkir, lantes timboel Kamatian. Dan mengapalah manoesia poenja Kahidoepan begitoe pendek dan dengen tjepet moesti melintas pada Kamatian? Inilah lantaran dalem itoe Kahidoepan manoesia bergoelet teroes-meneroes aken poeasken hawa nafsoe. Itoe sadjoemblah lobang dalem toeboehnja ada sabagi pintoe jang menganter padanja ka djoeroesan kamatian. Beberapa di antaranja, teroetama jang beräda dibagian kepala, ada djadi soember boeat bangoenken hawa nafsoe dan kainginan jang tida baek. (Ajat 1-4).
Itoe pedang, badak dan matjan, djoega bersifat symbolisch. Pedang ada mengandoeng artian permoehoehan dan peperangan; badak ada binatang berkoelit tebel dan bermata lamoer, jang tjoemah bisa menjeroedoek dengen tida memandang ka kanan-kiri, seperti sikepnja manoesia jang berkepala batoe dan berpikiran tjoepet. Matjan ada mewakilkan manoesia poenja hawa nafsoe, angkara moerka, jang disertakeh djoega katjerdikan aken mengintip dan membokong atawa menjerang dan menerkem dengen mendadak sasoedahnja mengawasi korbannja aken toenggoe koetika jang bagoes, dengen dibarengin djoega oleh kaboeasan jang beräoes darah.
Kapan saorang soedah bisa „toetoep" itoe pintoe-pintoe dari Kamatian dalem toeboehnja dengen djalan tindes hawa nafsoe, dan tida bikin tjape dirinja boeat bergoelet dalem oeroesan jang sia-sia, ia poen tida kenal permoesoehan atawa pertjidra'an, jaitoe jang dibilang itoe pedang tida dapet tempat aken membatjok; ia tida nanti berlakoe tjoepet dan berkepala batoe, kerna pertimbangannja loeas, matanja awas dan pikirannja poen tadjem, tida maoe sembarang njeroedoek, jaitoe jang dibilang itoe binatang badak tida bisa dapet tempat aken menandoek; ia tida poenja nafsoe amarah dan kakedjeman pada sesama manoesia, tida temaha dan serakah, jaitoe jang dibilang itoe matjan tida bisa dapet lobang boeat menerkem sama koekoenja.
Orang jang belon bisa tindes hawa nafsoenja, jang masih bergoelet teroes boeat poeasken segala kainginan dan kaserakahannja, jaitoe jang masih mempoenjai itoe sifat-sifat jang diwakilken oleh pedang, badak dan matjan, pastilah ia di satoe waktoe aken ketemoein tandingan jang bersifat begitoe djoega, hingga achirnja ia bakal dapet bahaja dari batjokan „pedang,“ gadilannja itoe „badak“ dan terkemannja „matjan“, jang diampoenjai oleh lawanan atawa saingan-saingannja. Tapi sabaliknja kaloe ia soedah mengarti bagimana haroes mendjaga diri, ia boleh pergi mengider ka segala tempat atawa toeroet dalem „peperangan“ dari kahidoepan dengen zonder koeatir. (Ajat 5-9).
Ini perlindoengan atawa kabebasan, oleh Lao Tze dibilang, „sebab ia soedah kalahken Kamatian.“ Ini oetjapan boekan berärti badannja soedah wedoeg atawa sakti hingga biar diserang oleh binatang boeas atawa sendjata tadjem poen tida bisa mati, hanja ada mengandoeng maksoed seperti jang sering dipake oleh kaoem Buddhist, jang pandang soedah bisa „kalahken kamatian" pada siapa jang sanggoep sampeken tingkatan Arhat. Saorang boediman jang soedah bersatoe dengen Tao, jang soedah bisa tindes hawa nafsoe dan, terbebas dari segala penariknja. doenia atawa hidoep dalem rohani, kaada'annja poen tida berbeda dengen kaoem Buddhist jang soedah bisa dapetken Nirwana. (Ajat 10,11).
![Tao Teh King (page 233 crop)](http://178.128.105.246/cars-http-upload.wikimedia.org/wikipedia/commons/thumb/6/61/Tao_Teh_King_%28page_233_crop%29.jpg/100px-Tao_Teh_King_%28page_233_crop%29.jpg)