Tao Teh King/Bab 52
LII.
BALIK KOMBALI KAPADA POKO JANG BERMOELAH.
- Itoe Poko Pertama dari mana ini alam telah moentjoel boleh dipandang sabagi iboenja.
- Dengen mengenal sang Iboe kaoe bisa kenal djoega pada sang Anak.
- Barang siapa sasoedah kenal sang Anak masih tinggal tetep pada sang Iboe, biarpoen badannja binasa tida aken dapet tjilaka.
- Djagalah soepaja moeloet tinggal rapet, toetoep itoe pintoe dari pantjadria, dan sabagitoe lama kaoe hidoep nistjaja kaoe tida aken alamken kasoekeran.
- Pentanglah kaoe poenja moelo'et dan tjoba mendesek boeat madjoe kamoeka, nanti kaoe aken alamken kasoekeran di sapandjang kahidoepanmoe.
- Mengenal benda-benda di dalem bibit pokonja itoelah tanda dari kapinteran.
- Tinggal berlakoe lemah-lemboet itoelah ada berarti kategoehan jang tida bisa dikalahken.
- Ikoetinlah itoe sinar terang jang menganter kaoe aken balik ka roemah, dan djagalah soepaja tida menjasar di dalem kagelapan.
- Inilah ada sikep jang akoe namain „menggoenaken apa jang kekel."
⁂
Itoe Tao ada sabagi Iboe dan ini doenia dan segala apa jang tertampak di ini alam ada djadi Anaknja. Siapa jang mengenal Tao ia nanti kenal djoega ini doenia; tapi oemoemnja manoesia tjoemah kenal doenia dan tida kenal atawa tida maoe ambil perdoeli pada Tao, hingga hidoepnja terlipoet dalem kasoekeran, kerna menjasar teroes-meneroes. Tapi kapan orang jang maskipoen hidoep di doenia bisa berlakoe menoeroet Tao, ialah tentoe aken dapet kaselametan, dan biarpoen toeboehnja jang kasar dengen roh-roh lapisannja, menoeroet natuurwet, achirnja samoea aken linjap dan moesna, tapi ia sendiri tida koerang apa apa, sebab soedah bersatoe pada itoe Tao, itoe Soemanget Alam, atawa Wet Kabeneran jang tinggal kekel selamanja. (Ajat 1-3).
Orang jang hidoep menoeroet Tao, tida soeka tondjolin kapandeannja di moeka oemoem aken bikin dirinja dipandang tinggi dan sabaginja, sebab ini sikep oetamaken-diri selaloe aken diberikoetin oleh kasoekeran. Dengen toetoep moeloet dan tindes andjoeran dari hawa nafsoe dan pantjadria, baroelah orang bisa dapetken katentreman. (Ajat 4-5).
Manoesia di doenia, biar poen jang terkenal pande dan berboedi, kabanjakan tjoemah riboetin soeal-soeal tjabang, sedeng pokonja tida diperdoeliken. Orang berkoetetan aken bikin mamoer negri, memadjoeken rahajat, atawa angkat deradjat bangsa, dan laen-laen pergerakan lagi jang dipandang baek dan berfaedah, sedeng pokonja kaselametan, jaitoe penghidoepan jang saderhana dan tida serakah, tida diperhatiken. Kasoedahannja, semingkin manoesia djadi pinter, sopan dan „madjoe”, serta negri mendjadi tambah mamoer. koeat dan djaja, kakaloetan dan kadjahatan mendjalar lebih loeas dan manoesia semingkin tida merasa poeas, lantaran kaserakahannja poen toeroet tambah berlipet-lipet. Maka itoe Lao Tze menjataken, mengenal poko ada jang paling perloe. Kapan itoe poko soedah tertjapei, jaitoe manoesia mengenal Tao dan hidoep saderhana menoeroet natuur dengen tindes kaserakahannja, itoe kaberesan dan katentreman nanti moentjoel sendirinja. (Ajat 6).
Sikep saderhana dan lemah-lemboet banjak orang jang dengen hina telah pandang sabagi tanda dari kalemahan. Tapi sabaliknja Lao Tze bilang itoe ada kategoehan jang tida bisa dikalahken, seperti beroelang-oelang itoe Goeroe Toea kasih tjonto dengen sifatnja aer. Kakoeatan tenaga, maski jang bagimana besar, masih ada jang bisa lebihin dan bikin roeboeh, tapi kabedjikan dari kasaderhana'an dan lemah-lemboet tida ada wates atawa oekoerannja, dan kerna itoe tida bisa dikalahken. (Ajat 7).
Maka ada perloe manoesia ikoetin itoe Sinarterang dari Kabeneran atawa Kabedjikan (Teh) jang anter padanja boeat poelang ka roemah sendiri, jaitoe ka dalem Tao, dari mana segala machloek dan benda di ini alam ada berätsal. Dengen tjara bagitoe orang djadi menggoenaken itoe sifat kekel boeat dapetken katentreman sampoerna atawa kahidoepan baka di dalem pelokannja Sang Iboe. (Ajat 8,9).
![Tao Teh King (page 240 crop)](http://178.128.105.246/cars-http-upload.wikimedia.org/wikipedia/commons/thumb/7/76/Tao_Teh_King_%28page_240_crop%29.jpg/250px-Tao_Teh_King_%28page_240_crop%29.jpg)