Tao Teh King/Bab 67
LXVII.
TIGA BARANG BERHARGA.
- Antero doenia menjataken bahoea sedeng akoe poenja Peladjaran tentang tao ada besar, tetapi terlaloe lembek boeat digoenaken.
- lapoenja kabesaran itoelah jang membikin ia keliatan tida bisa digoenaken.
- Djikaloe ka'ada'annja satoe roepa seperti jang laen-laen, nistjaja soedah lama dikenalin sabagi peladjaran jang tida bisa dipake.
- Tetapi akoe ada poenja tiga matjem barang langka jang akoe hargain tinggi: kasatoe, prilakoe lemah-lemboet : kadoea, berlakoe himat: katiga merendah diri.
- Ini tiga menjegah padakoe aken pernahken diri di depan dari laen-laen orang.
- Dengen sikep lemah-lemboet akoe bisa oendjoek kagagahan.
- Dengen kahimatan akoe bisa berlakoe lojar.
- Dengen merendahin diri akoe bisa menajalanken pakerdja'an besar bagi orang banjak sabagi satoe boejoeng kahormatan.
- Tetapi di djeman sekarangmanoesia lempar itoe sikep lemah-lemboet, dan semoea mendjadi tjongkak dan galak.
- Marika lepas kahirmatan dan tjoemah oendjoek kaborosan.
- Marika singkirken karendahan hati, dan bergoelet boeat mendjadi jang pertama.
- Lantaran begitoe marika samoea pastilah aken moesna binasa.
- Sikep lemah-lemboet memberi kamenangan pada jang menjerang dan kasantosa'an pada jang menangkis.
- Maka itoe kapan Thian hendak melindoengin satoe orang, ia lipoetin padanja dengen pritabeat jang lemah lemboet
⁂
Ini ada samboengan dari fatsal jang laloe, boeat menerangin lebih djelas lagi kafaedahannja berlakoe lemah-lemboet, merendah, saderhana dan tida soeka kamoekaken diri. Lao Tze poen sampe insjaf bahoea iapoenja peladjaran tentang Tao ada banjak jang anggep tida bisa digoenaken dalem practijk dari kahidoepan sahari-hari. Djadi boekan sadja sekarang, hanja di tempo doeloe, koetika Itoe Goeroe Toea masih hidoep di doenia pada doeapoeloeh lima abad jang laloe, toch soedah banjak jang berӓnggepan Taoisme tida practisch, terlaloe lembek boeat digoenaken, disangkal atas kabagoesan dan kabesarannja.
Ini Matjem anggepan poen berdjalan teroes sampe sekarang. Ada banjak achli achli pemikir jang merasa kagoem dan kasemsem pada tinggi dan loeasnja Lao Tze poenja peladjaran, tetapi dengen berterang, atawa poen diam-diam, marika tarik poetoesan ada terlaloe soeker, atawa tida bisa didjalanken; malah-antara orang orang jang sampe mengarti azas dari Taoisme dan bisa inget di kepala antero oedjar oedjar jang penting dari Tao Teh King, poen djarang jangg bisa toentoet kahidoepan jang menjotjokin sama itoe peladjaran. Tapi dalem ini fatsal Lao Tze dengen satjara aloes tjoba oendjoek keliroenja itoe anggepan, Lantaran Taoisme ada besar dan loeas, maka kaliatannja seperti tida bisa dipake dalem kahidoepan sahari-hari oleh orang-orang jang masih hendak mengedjer pri kadoenia‘an dan barang jang sia-sia. Tetapi sabenernja boekan itoe peladjaran tida bisa digoenaken, hanja manoesia sendiri jang belon atawa tida bisa toentoet itoe ilmoe jang tinggi kerna tida tjotjok sama kainginannja jang masih serba rendah. Di djeman koeno itoe peladjaran soedah tersiar dan oleh orang-orang boediman soedah didjalanken dengen berhatsil bagoes. Djikaloe betoel tida bisa dipake lantaran bertjatjat atawa terlaloe lembek, atawa tida lebih tinggi dari laen-laen peladjaran, nistjaja itoe ka'ada'an soedah diketaoei sadari doeloe koetika Taoisme moelai berkembang. (Ajat 1-3).
Lebih djaoe Lao Tze belaken itoe peladjaran dengen oendjoek, biar bagimana djoega anggepannja orang banjak, ada tiga benda indah dan langka jang dihargain paling tinggi dalem Taoisme, jaitoe: lemah-lemboet, himat dan merendah. Siapatah berani bilang ini tiga azas jang tergenggem di dalem Tao tida bisa digoenaken oentoek penghidoepan sahari-hari? Itoe tiga sifat ada pendjaga soepaja manoesia tida berlakoe angkoe, sombong, bangga, serakah atawa temaha, jang mendjadi soember-soember dari permoesoehan, perbentjian, kasoekeran, katjilaka‘an, kakaloetan dan kamoesna‘an, boekan sadja bagi dirinja sendiri tapi djoega pada orang banjak. Dan tjoba liat sadja! Kapan dengen kakerasan, kasombongan, ka‘angkoean dan kagalakan orang timboelken kasoekeran dan bahaja bagi dirinja, djalan jang paling selamet boeat terlolos dari itoe ka'ada'an djelek tiada laen, hanja moesti berlakoe sabar, lembek dan lemah-lemboet, boeat mengalah dan tjari perdamian dengen moesoeh-moesoeh jang melipoeti dirinja, tegesnja: orang moesti lari dan tjari perlindoengan — biarpoen zonder insjaf — pada azas dari Taoisme!
Kapan satoe orang jang, lantaran toentoet kahidoepan liwat wates, bikin moesna miliknja atawa roesakin kasehatannja, ia poen achirnja moesti hidoep ketjil dan menahan nafsoe, balik kombali pada kasaderhana'an, djikaloe tida maoe mati kelaparan atawa masoek ka lobang koeboer. Ini poen mengoendjoek aliran jang selaloe mendjoeroes pada azas dari Taoisme!
Begitoe poen kapan satoe orang, lantaran terlaloe agoengin diri, gila hormat, kemaroek sama kakaja'an, kakoeasa'an dan kamoelia'an, achirnja djadi terbentji dan dimoesoehin oleh orang banjak, hingga teräsing sendirian atawa terdjoengkel dari kadoedoekannja , kapan ia hendak selametin diri terpaksa moesti merobah sikepnja, merendah pada orang, oendoerin diri atawa toeroen dari atas tooneel dimana tadinja ia pikir hendak djalanken rol besar, dan dengen tjari perlindoengan pada azas dari Tao ada harepan ia bisa terlolos dari bintjana jang lebih heibat.
Begitoelah kita bisa dapet liat bagimana Taoisme sabetoelnja boekan sadja bisa dipake, hanja malah selaloe digoenaken dalem practijk dari penghidoepan sahari-hari, dan malah itoe orang-orang jang anggep itoe peladjaran ada terlaloe lembek dan tida practisch, sendirinja di satoe tempo soedah atawa bakal goenaken itoe, maski djoega dengen tida insjaf dan tjoemah sabagian ketjil sadja. (Ajat 4-5).
Sabaliknja dari lembek dan bikin manoesia djadi lemah, itoe tiga azas dari Taoisme malah mengangkat ka tingkatan tinggi. Lantaran mempoenjai prilakoe atawa watek jang lemah-lemboet, saorang Taoist bisa mengambil sikep satoe roepa dan sama-rata terhadep samoea, tida seperti biasanja di doenia, pada jang koeat dan berpengaroeh orang tekoek loetoet dan mendjilat, pada jang hina-dina mengoendjoek kasombongan. Itoe sikep menghormat pada jang koeat dan berpengaroeh, pokonja dari lantaran takoet, maka sikep lemah-lemboet jang berdasar atas watek aseli jang boekan dibikin-bikin, ada bersifat gagah, kerna pada jang koeat dan lebih tinggi ia berlakoe manis boekan lantaran takoet, dan terhadep golongan rendah ia berlakoe lemah-lemboet lantaran soedah bisa tindes dan kalahin itoe tabeat angkoe, sombong dan gila hormat. Panglima jang telah kalahin sariboe moesoeh di medan perang tida begitoe gagah berani seperti saorang jang bisa taloekin hawa nafsoe dan tabeatnja sendiri jang tida baek! (Ajat 6).
Orang tjoemah bisa menoeloeng dan mengasih deng laloeasa kapan ia ada poenja kalebihan. Saorang jang hidoep lojar, hamboerin oewang, tempo, pikiran dan tenaganja satjara tida mengenal wates, apalagi boeat kedjer maksoed jang sia-sia, pastilah tida ada poenja kalebihan boeat dikasih atawa dipake oentoek kaperloean laen orang, dan malah soedah terlaloe bagoes djikaloe ia tida oesah meminta toeloeng dan memindjem dari kanan kiri, baek oewang, maoe poen bantoean tenaga atawa pikiran. Maka siapa bisa berlakoe himat dan saderhana dalem oeroesan oewang, maskipoen hatsilnja ketjil, ia tida perna kakoerangan, dan malah bisa djoega mengasih pada orang jang boetoeh dengen satjara bersih atawa satoeloesnja hati. Begitoe poen kahimatan dalem hal menggoenaken tempo, tenaga dan pikiran, oepaja tida terlaloe diobrek boeat maksoed jang sia-sia, nanti membikin orang bisa bekerdja banjak dalem laen-laen oeroesan jang berfaedah goena kabaekan oemoem. Kapan menginget bagimana banjak jang soedah hamboerin tenaga dan temponja di soe-hian, tempat dansa, medja djoedi, roemah minoeman, dan otaknja dipake meloeloe boeat pikirin maksoed-maksoed jang tjoemah goena kapentingan sendiri sadja, orang poen bisa mengarti kabenerannja Lao Tze poenja oetjapan, „dengen kahimatan akoe bisa berlakoe lojar.” Boekan sedikit orang jang tida perna tjampoer pakerdja'an jang baek goena oemoem soedah madjoeken alesan „bo-ẻng” dan „tida ada tempo” atawa „tida ada kamampoean" dan „koerang pengartian”, lantaran tempo, tenaga dan pikirannja soedah dilojarin goena laen maksoed jang sabagian besar ada sia-sia. (Ajat 7).
Hal dengen merendahin diri orang bisa lakoeken pakerdja'an besar, inilah ada berdasar atas itoe boekti, bahoea gerakan jang besar ada lebih gampang berhatsil kapan mendapet orang banjak poenja bantoean, serta tida ada jang menentangin. Tetapi saorang jang anggep dirinja pinter dan pande, dengen oendjoek sikep sombong, angkoeh dan gila hormat, waoesah harep bisa dapet toendjangan dan sympathie dari orang banjak, jang malah berbalik memoesoehin dan menentangin segala gerakannja. Sekalihpoen ia betoel-betoel mempoenjai kapandean, hatsil dari pakerdja'annja tida bisa terlaloe diharep, atawa sa'ande bisa berhatsil, tida nanti berdjalan lama. Maka Lao Tze menasehatin soepaja orang jang hendak kasih tenaganja boeat kabaekan oemoem lebih doeloe merendahin diri, bikin dirinja seperti itoe boejoeng kahormatan jang dipake meriasin medja sembahjang di djeman koeno, symbool dari satoe pemimpin jang dipoedja dan diendahin oleh orang banjak. (Ajat 8).
Komoedian Lao Tze bandingin tjara hidoepnja manoesia dalem iapoenja djeman, jang ia namain „djeman sekarang", jang sanget bertentangan dengen itoe tiga azas paling berharga dari Taoisme, hingga kasoedahannja membikin seloeroeh negri mendjadi kaloet, kerna perboeatan jang bertentangan sama Tao tida bisa berachir laen dari kamoesna'an. (Ajat 9-12).
Boekan sadja dalem kahidoepan sahari-hari, hanja dalem peperangan atawa pertempoeran, fihak jang berlakoe lemah-lemboet, kapan djadi penjerang, tentoe beroleh kamenangan, dan kapan djadi penangkis, bisa pelihara kasantosa'annja. Inilah ada dari lantaran sikep jang lemah-lemboet bisa menarik sympathie dan persobatan, hingga apa jang dengen kakoeatan sendjata belon tentoe tertjapei, dengen boedi manis orang bisa dapetken, kapan toedjoeannja berdasar atas kapantesan dan ka'adilan.
Di antara bangsa Barat ada terdapet satoe pepatah koeno, tjara Inggris: „Pride goes before a fall,” artinja: Kasombongan moentjoel dimoeka orang maoe djatoh, jaitoe: siapa bakal tjilaka biasanja kasih oendjoek kasombongan lebih doeloe. Laen pepatah, jang kita rasa berӓtsal dari agama Kristen, ada bilang kira-kira begini: Siapa hendak dimoesnaken oleh Toehan, lebih doeloe dibikin djadi seperti gila. Ini „gila“ boekan otaknja miring, hanja kalakoeannja banjak jang bertentangan dengen pikiran sehat. Tetapi Lao Tze poenja oetjapan adalebih aloes dari itoe doea pepatah: „Kapan Thian hendak melindoengin satoe orang, ia lipoetin padanja dengen tabeat jang lemah-lemboet." Maski perkata'annja laen, tapi maksoednja saroepa dengen itoe doea pepatah di atas, kerna orang jang bertabeat kasar, angkoeh, sombong dan gila hormat, teranglah tida aken dapet perlindoengan dari Thian, hingga di doenia ia aken tertimpah bintjana, kasedihan dan kasangsara'an teroes-meneroes, dan di acherat ia aken terpendem di Kamaloka dalem tempo jang lama. Maka kapan diselidiki betoel-betoel itoe tiga azas dari Taoisme jang dinamain „Tiga barang berharga", lantes ternjata disitoe ada terdapet koentji-koentji dari kaberoentoengan dan katentreman kekel, dan apa jang Lao Tze adjar boekan samatjem philosofie tinggi jang tida sembarang orang mampoeh djadjakin, hanja peratoeran hidoep jang bisa didjalanken dalem pergaoelan sahari-hari dan jang kafaedahannja bisa lantes dipetik dan diboektiken. (Ajat 13-14).
![](http://178.128.105.246/cars-http-upload.wikimedia.org/wikipedia/commons/thumb/e/e0/Tao_Teh_King_%28page_313_crop%29.jpg/100px-Tao_Teh_King_%28page_313_crop%29.jpg)