Wp/yua/Báab
![](http://178.128.105.246/cars-http-upload.wikimedia.org/wikipedia/commons/thumb/d/de/Swimming_at_the_2008_Summer_Paralympics_-_women_Freestyle_swimming.jpg/220px-Swimming_at_the_2008_Summer_Paralympics_-_women_Freestyle_swimming.jpg)
Báab: Jejeláas ba'ax ku na'ata'al ka'ach tu yóok'lal le t'aana'. Yáax jump'éele' leti' u k'aaba' junxóot' che' táaxjaaykuunsa'an u ni' ku meyaj ti' Aj báab utia'al u bin u páapayche'etik ja' utia'al u beetik u bin cheemilja' yóok'ol ja' Báab Aj Báab, bey u ya'a'al ti' máax ku yokol yéetel u yojel u bulubáa yéetel bin ichil nonoj aka'an ja' je'el bix u ja'il áaktun, ts'ono'ot, áak'al, k'áak'náab kex ma' u k'a'abetkuunsik u láak' mixba'al, chen likil u bin u páapayk'a'atik ja'e' ku béeytal u bin ichil je'ex u bin kay wáa u láak' u kajnáalilo'ob ja'e'. Kex tumeen xan ku ya'ala'al Aj báab ti' máax ku bin ichil cheemilja' ku beetik u bin yóok'ol ja' ka'alikil táan u bin u páapayche'etik ja' yéetel u báab. Le báabo', úuch ka'ache' ku ya'ala'al xan ti' u me'ex cheemil ja'
Bejla'e' yaan kúuchilo'ob chen wíinik beetmajil tu táankabil u yotoch, ku k'aaba'tik áaktunch'e'en wáa xpéek'ch'e'entuun utia'al u bin máak báab wáa u kan máak báab, beeyxan chen utia'al u bin máak t'ubtal ich ja' utia'al u síiskunsik u yóol tu k'iinilo'ob seten ooxolil.
Yaan xan máak chen tumeen uts tu yiche' ku kanik báab, yaan xane' ku kanik tumeen ku ch'a'ak bey jump'éel meyaje', wáa utia'al u táakpajal ichil ketlamo'ob. Bey meyaje' ku k'a'abetkuunsa'al aj báabo'ob tu chi' k'áak'náab je'el bix Cancún, Acapulco, Mazatlán wáa u láak' tu'uxo'ob ku seten bin ya'abach máak u máans ooxolil wáa u jayk'íintuba'obe', tumeen yaan k'iine' yaan máak kex ma' u yojel báabe' ku yokol ich ja' wáa ich k'áak'náabe' ku máan u búulul u ni', aj báab túune' ti' yaan utia'al u pulubáa u tokbeso'ob utia'al ma' u kíimilo'obni'. Yaan máaxo'ob ku kanik u jejeláasil báabe' ku táakbesikubáa xan ichil jejeláas ketlamo'ob yóok'ol kaab je'el bix le ku k'aaba'ta'al Juegos Olímpicos ku beeta'al jejeláas kaajo'ob tu yóok'ol kaab yéetel jejeláas ja'abo'obo'. Yaan xan u láak' ketlam báaxalo'ob ku beeta'al tu'ux ku táakpajal máako'ob ma' jach no'oja'an u wíinklalo'ob ku k'aaba'tik Juegos Paraolímpicos
Yukataane' yaan máako'ob ts'o'ok u náajaltiko'ob jejeláas chíimpolal tu yóok'lal báab je'el Rommel Pacheco Marrufo yéetel juntúul táankelem xi'ipal u k'aaba' Juan Diego Cervera Madera
David Mauricio Mier yéetel Pedro Pablo Silveira Cervera