De aardappeleters
![](http://178.128.105.246/cars-http-upload.wikimedia.org/wikipedia/commons/thumb/4/4d/WLANL_-_artanonymous_-_De_aardappeleters.jpg/330px-WLANL_-_artanonymous_-_De_aardappeleters.jpg)
De aardappeleters (La terpomo-manjanti) esas oleo-pikturo da la nederlandana artisto Vincent van Gogh piktita en aprilo 1885 en Nuenen, Nederlando.
Ol rezidas che la Van Gogh-Muzeo en Amsterdam. Preliminara oleo-skisuro di la pikturo esas che la Kröller-Müller-Muzeo en Otterlo, ed il anke facis litografuri dil imajo, qui konservesas exemple che la Museum of Modern Art en New York-urbo. La pikturo egardesas kom un ek la maestroverki da Van Gogh.
Kompozo
[redaktar | redaktar fonto]Dum marto e komenco di aprilo 1885, Van Gogh skisis kladi di la pikturo, e korespondis kun sua fratulo Theo, qua ne favore impresesis da lua lora verko, nek la skisuri quin Van Gogh sendis ad il en Paris. Il prilaboris la pikturo de aprilo 13ma til la komenco di mayo, kande ol esis preske kompleta, ecepte mikra chanji quin il facis per mikra pinselo plu tarde tayare.
Segun Van Gogh il volis piktar rurani realiste. Il intence selektis grosiera e leda modeli, por ke li esez naturala en lua verko:
"Me volis facar ol tale ke on komprenas ke ca homi, qui manjas sua terpomi per la lumo di sua lampeto, kultivis ipsa la sulo per ca manui quin li pozas aden la plado, do ol montras manuala laboro e - ke li do honeste ganis sua nutrivo. Me deziris ke ol montrez tote diferanta vivomaniero kam la nia - civilizita homi. Do me certe ne deziras ke omnu nur admirez od aprobez ol sen savar pro quo."
Skribant a sua fratino Willemina du yari pose en Paris, Van Gogh ankore egardis De aardappeleters sua maxim sucesoza pikturo: "Me opinionas ke la pikturo di la rurani manjanta terpomi quan me facis en Nuenen, esas ya mea maxim bona". Tamen, la verko kritikesis da lua amiko Anthon van Rappard. Ico frapis la su-fido di Van Gogh kom fresha artisto, ed il retroskribis a sua amiko, "vu ... ne darfis kondamnar mea verko tale" (julio 1885), e pose, "Me sempre agas to, quon me ne ja savas agar, por lernar agar lo." (agosto 1885).
Haagana Skolo
[redaktar | redaktar fonto]Van Gogh ofte asociesas kun la Pos-Impresionista movemento, ma fakte lua artala radiki jacis plu proxim hemo che la artisti di la Haagana Skolo, quala Anton Mauve e Jozef Israëls.