Akrahreppur
![](http://178.128.105.246/cars-http-upload.wikimedia.org/wikipedia/commons/thumb/6/62/Akrahreppur_kort.png/220px-Akrahreppur_kort.png)
![](http://178.128.105.246/cars-http-upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)
Akrahreppur (áður kallaður Blönduhlíðarhreppur) er fyrrum sveitarfélag í Skagafjarðarsýslu, austan Héraðsvatna, norðan frá Kyrfisá allt suður að Hofsjökli. Aðalatvinnuvegur er landbúnaður og er ekkert þéttbýli í sveitarfélaginu. Grunnskóli hreppsins var á Stóru-Ökrum, í félagsheimilinu Héðinsminni, frá 1949 til 2006 en í kjölfar deilna milli foreldra og kennara var hann lagður niður og síðan hefur nemendum verið ekið í skóla í Varmahlíð.
Fjórar kirkjur eru í Akrahreppi, á Flugumýri, Miklabæ, Silfrastöðum og Ábæ í Austurdal en Ábæjarsókn er nú öll í eyði. Lítils háttar jarðhiti er á nokkrum stöðum í Akrahreppi og var byggð sundlaug á Víðivöllum árið 1938, sem ekki er lengur í notkun. Nú hefur hitaveita verið lögð frá Varmahlíð um mestalla Blönduhlíð.
Í atkvæðagreiðslu 19. febrúar 2022 samþykktu íbúar Akrahrepps og Sveitarfélagsins Skagafjarðar sameiningu sveitarfélaganna undir nafninu Skagafjörður sem tók gildi í kjölfar sveitarstjórnakosninga 2022.[1][2]
Landafræði
[breyta | breyta frumkóða]Sveitarfélagið náði yfir Blönduhlíð og Norðurárdal, Kjálka og Austurdal allan nema hvað bærinn Bústaðir tilheyrði Sveitarfélaginu Skagafirði. Nokkur eyðibýli í Vallhólmi tilheyra einnig Akrahreppi þótt þau séu nú vestan Héraðsvatna, sem hafa breytt um farveg á þessum slóðum. Víðlend afréttarlönd tilheyra sveitarfélaginu, Silfrastaðaafrétt og Nýjabæjarafrétt.
Saga
[breyta | breyta frumkóða]Akrahreppur er sögusvið margra stórviðburða Sturlungaaldarinnar, þar á meðal Örlygsstaðabardaga (fjölmennustu orrustunnar), Haugsnesbardaga (mannskæðustu orrustunnar) og Flugumýrarbrennu.
Skáldið Hjálmar Jónsson bjó á ýmsum bæjum í Akrahreppi á 19. öld og er jafnan kenndur við einn þeirra, Bólu í Blönduhlíð.
Hreppsnefnd
[breyta | breyta frumkóða]Í hreppsnefnd Akrahrepps sátu 5 fulltrúar sem kjörnir voru hlutfallskosningu á fjögurra ára fresti. Síðast var kosið í hreppsnefnd í sveitarstjórnarkosningunum 26. maí 2018.
Oddvitar [3]
- 1875-1878 Gísli Þorláksson á Hjaltastöðum
- 1878-1881 Þorkell Pálsson á Frostastöðum
- 1881-1883 Páll Pálsson á Syðri-Brekkum
- 1883-1886 Rögnvaldur Björnsson í Réttarholti
- 1886-1889 Þorvaldur Arason á Flugumýri
- 1889-1901 Sigtryggur Jónatansson á Syðri-Brekkum og Framnesi
- 1901-1937 Gísli Björnsson á Stóru-Ökrum og Vöglum
- 1937-1958 Jóhannes Steingrímsson á Silfrastöðum
- 1958-1986 Jóhann Lárus Jóhannesson á Silfrastöðum
- 1986-2002 Broddi Björnsson á Framnesi
- 2002-2018 Agnar Halldór Gunnarsson á Miklabæ
- 2018-2022 Hrefna Jóhannesdóttir
Heimildir
[breyta | breyta frumkóða]- ↑ „Skagafjörður verður eitt sveitarfélag“, RÚV, 2022-02-20, skoðað þann 2022-04-05.
- ↑ Jónsdóttir, Hallgerður Kolbrún E. „Sameinað Sveitarfélag Skagafjarðar og Akrahrepps fær nafn - Vísir“. visir.is. Sótt 17. júní 2022.
- ↑ Byggðasaga Skagafjarðar IV. bindi Akrahreppur, ritstjóri Hjalti Pálsson, bls 50