Iulia (uxor Pompeii Magni)
![](http://178.128.105.246/cars-http-upload.wikimedia.org/wikipedia/commons/thumb/c/c8/RSC_0017.jpg/220px-RSC_0017.jpg)
Iulia (nata anno 83/82 a.C.n.; mortua anno 54 a.C.n.) fuit C. Iulii Caesaris filia quam e prima uxore Cornelia, filia Lucii Cinnae quater consulis, genuit. Ac primo Quinto Servilio Caepioni sponsa erat, qui Caesari in consulatu magno auxilio fuit adversus collegam Marcum Bibulum. Sed anno 60 a.C.n. tres potentes cives, Caesar, Pompeius et Crassus, societatem (primum triumviratum dictum) in re publica inierunt, qua honores et provincias inter sese partiri possent. Hanc societatem etiam privatis vinculis firmare decrevere : itaque, spreta fide erga Caepionem, anno 59 a.C.n. Cn. Pompeius Magnus Iuliam in matrimonium duxit; amantissima mariti fuisse traditur, cui filium vel filiam parturiens anno 54 a.C.n. mense septembri mortua, in Campo Martio ex populi voluntate sepulta est, ubi post decem annos et pater Caesar monumentum iuxta filiam accepit.
![](http://178.128.105.246/cars-http-upload.wikimedia.org/wikipedia/commons/thumb/e/e2/RSC_0022_-_transparent_background.png/220px-RSC_0022_-_transparent_background.png)
Quam mortem unam ex praecipuis causis belli civilis fuisse omnes historici antiqui putaverunt, vel potius , si vixisset Iulia aut saltem liberos genuisset, solam potuisse Caesari Pompeium reconciliare existimaverunt. Quapropter tertio libro ineunte Pharsaliae suae poeta Lucanus umbram Iuliae induxit Pompeio in somno visam atque imminentem cladem et mortem marito nuntiantem. Anno 46 a.C.n. Caesar munus populi epulumque in filiae memoriam pronuntiavit.
Fontes
[recensere | fontem recensere]- Appianus, libro secundo Bellorum civilium 19.
- Cicero, libro tertio Epistularum ad Quintuum fratrem, epistula 1.
- Dio Cassius libro XXXIX Historiae Romanae cap. 64.
- Florus, libro secundo Epitomae rerum Romanarum, capite 13.
- Lucanus libro primo Pharsaliae versibus 111-120 necnon libro tertio 7-40.
- Plutarchus "Vita Pompeii", capitulis 47-49 et 53; "Vita Iulii Caesaris" cap. 14, 23 et 55(4).
- Seneca Ad Marciam XIV.
- Suetonius, De Vita Caesarum, in "Vita Divi Iuli", capitulis 1, 21, 26, 84.
- Titus Livius Periochae 106.
- Valerius Maximus, libro quarto Factorum dictorumque memorabilium, 6.4.
- Velleius Paterculus, libro secundo Historiae Romanae, capitulo 47.4.
Bibliographia
[recensere | fontem recensere]- "Julia (5)" in Gulielmus Smith (1844–1849). Dictionary of Greek and Roman Biography and Mythology [📖]. Londinii: Taylor & Walton vol. 2 pp. 640-641