Tartessos
![](http://178.128.105.246/cars-http-upload.wikimedia.org/wikipedia/commons/thumb/c/ca/Tartessos.png/300px-Tartessos.png)
Tartessos (elinica: Ταρτησσός) ia es un site con porto e la cultur ensircante a la costa sude de Iberia (en Andalusia moderna), a la boca de la Rio Guadalquivir. Lo es prima notada en sitas de Elas e Asia sude-ueste, comensante en la media de la sentenio prima aec. Per esemplo, Herodoto ia descrive lo como ultra la Colona de Hercule (la Streta Jibraltar). De sirca la fini de la sentenio, la nom Tartessos ia es apena notada, e lo es posible ce la site ia es perdeda par deluvias. Descovres arceolojial ia crea un pitur de la cultur – nomida la tartessian – cual inclui no min ca 97 enscrives en la lingua tartessian.
La popla tartessian ia es rica en metales. En la sentenio cuatro aec, la istoriste Eforo ia descrive "un mercato rica nomida Tartessos, con multe stanio portada par la rio, e ance oro e cupre de la paises celta". La comersia en stanio ia es multe profitosa en la eda de bronze, car lo es un parte esensal de bronze vera, e relativa rara. Herodoto ia refere a un re de Tartessos – Arganthionios – probable nomida per sua ricia en arjento.
La popla de Tartessos ia deveni asosiores importante de la fenisias, de ci sua presentia en Iberia ia comensa en la sentenio oto aec, e ci ia construi prosima sua porto propre, Gadir (elinica τΓάδειρα, latina Gades, aora Cádiz).
Alga fontes antica, como Aristotele, ia refere a Tartessos como un rio. El ia dise ce lo deriva de la Monte Pirene (cual nos conose aora como la Pirineo) e flue a la mar estra la Colonas de Hercule. No rio esata como acel esiste en Iberia. Ma, seguente Piteas (sentenio 4 aec), como reportada par Strabo (sentenio 1 ec), la popla nomida Turduli ia ocupa la area cual ia es Tartessos, cual ia es la Rio Baetis (aora la Rio Guadalquivir). En la sentenio 2 ec, Pausanias ia identifia la rio e ia dona detalias de la site:
- "On dise ce Tartesso ia es un rio en la pais de la iberianes, cual flue a la mar par du bocas, e ce entre esta du bocas es la site de la mesma nom. La rio, cual es la plu grande en Iberia, e es mareal, es nomida oji Baetis, e on ave alga ci pensa ce Tartessos ia es la nom antica de Carpia, un site de la iberianes."
La rio es aora nomida la Guadalquivir. La bocas ia es gradal blocida par un parador de arena, e la cambias de la area ia entera Tartessos su pantanes. La area es aora protejeda e es nomida la Parque Nacional de Doñana. Alga alega ce Tartessos es la pais mital de Atlantida.
La lingua
[edita | edita la fonte]![](http://178.128.105.246/cars-http-upload.wikimedia.org/wikipedia/commons/thumb/4/42/Un_signari_sudoccidental_%28Rodr%C3%ADgez_Ramos_2000%29.jpg/300px-Un_signari_sudoccidental_%28Rodr%C3%ADgez_Ramos_2000%29.jpg)
La lingua tartesian es la lingua estinguida de Tartessos. On ave 95 enscrives en un scrive partal alfabetal e partal silabal, probable derivada de la scrive fenisia. La scrives ia es de sirca la sentenio sete aec.
Como tota scrives paleoispanica, con la eseta de la alfabeta elinica-iberian, tartesian usa glifos silabal per la consonantes esplodente, e leteras alfabetal per la otra consonantes, en un misca nomida un semisilabario. Ance como la otra scrives de Iberia antica, lo de tartesian no ia difere entre consonantes con o sin vose (t/d, p/b, k/g). Tartesian es scriveda en un modo continuante, sin spasios entre parolas, cual fa ce la identia de parolas individua es difisil.
Car nos ave poca datos per tartesian, la plu linguistes o no clasi tartesian, o sujesta ce la lingua es un isolida. An si alga nomes tartesian pote es videda como indoeuropean (celta), la plu de la lingua no ave la strutur de silabas de linguas indoeuropean. Lo pare plu simil a lo de iberian antica o euscara. Un esplica posible es ce tartesian es un sustrato "vasconica" (euscara e/o iberian) con un suprastrato celtiberian.
Asi es alga esemplos de enscrives:
- tⁱilekᵘuṟkᵘuarkᵃastᵃaḇᵘutᵉebᵃantⁱilebᵒoiirerobᵃarenaŕḵᵉ[en?]aφiuu [tilekurkuarkastabutebantileboiirerobarenark]
- lii*eianiitᵃa [lii*eianiita]
- eanirakᵃaltᵉetᵃao [eanirakaltetao]
- bᵉesaru[?]an [besaruan]
- lokᵒobᵒoniirabᵒotᵒoaŕaiaikᵃaltᵉelokᵒnanenaŕ [lokoboniirabotoaŕaiaikalteloknanenaŕ]
- [–]ekᵃa[?]ⁱiśiinkᵒolobᵒoiitᵉerobᵃarebᵉetᵉasiioonii [ekaisiinkoloboiiterobarebetasiioonii]
- iŕualkᵘusie : naŕkᵉentⁱimubᵃatᵉerobᵃare[?]ᵃatᵃaneatᵉe [iŕualkusie : naŕkentimubaterobareataneate]
Du radises pare infleta como verbos:
- naŕkᵉe, naŕkᵉen, naŕkᵉeii, naŕkᵉenii, naŕkᵉentⁱi, naŕkᵉenai [naŕke, naŕken, naŕkeii, naŕkenii, naŕkenti]
- bᵃare, bᵃaren, bᵃareii, bᵃarentⁱi [bare, baren, bareii, barenti]