Xtetl
Un xtetl (ides שטעטל, xtetl en singular e שטעטלעך xteteleh en plural) ia es un site peti con un popla iudi grande, cual ia esiste en Europa sentral e este ante la Gera Mundal Du. La plu parte de los ia es situada en la Zona de Colonia en la Impero Rusce, la Rena de la Congresa de Polsca, la Galisia osteraic e Romania. En ides, un site grande como Lviv o Txernivtsi ia es nomida xtot (שטאָט), un vileta ia es nomida un dorf (דאָרף). En la modo de parla ofisial, un xtetl ia es nomida un "miasteczko iudi", un tipo de colonia cual ia orijina en la antica Comunia de Polsca-Lietuva.
Vista jeneral
[edita | edita la fonte]Un xtetl es definida par Yohanan Petrovsky-Shtern como "un site mercato en posese privata de un maniate polsce, abitada xef ma no sola par iudis" e de la desenio de 1790 asta 1915 xtetles ia es "sujeto de burocratia rusce" car la Impero Rusce ia ajunta la parte este de Polsca, e lo ia maneja la area de colonia iudi. La conseta de cultur de xtetl descrive la modo de vive tradisional de la iudis en Europa sentral e este. Xtetles es representada como comunias relijiosa seguente iudisme ortodox, sosial stable e noncambiante an con atacas e influe esterna.
La declina de la xtetl ia comensa en la desenio de 1840. Fatores contribuinte ia es povria como resulta de cambias en economía (incluinte industriali cual ia feri la artisan tradisional iudi e la move de comersia a sites plu grande), focones repeteda destruinte la casas de lenio, e suprapopla . Ance, la antiiudisme de la manejores imperal rusce e la propriores polsce, e a pos, de la desenio de 1880, la pogromes rusce, ia difisili la vive en la xtetl. La Olocausto ia sinifia de la fini de la xtetles e, an con tre cuatris de la 2 milion iudis vivente en xtetles entre la desenio de 1880 e 1915, tota los ia abandona Europa este.
Istoria
[edita | edita la fonte]![](http://178.128.105.246/cars-http-upload.wikimedia.org/wikipedia/commons/thumb/f/f7/Map_showing_percentage_of_Jews_in_the_Pale_of_Settlement_and_Congress_Poland%2C_c._1905.png/220px-Map_showing_percentage_of_Jews_in_the_Pale_of_Settlement_and_Congress_Poland%2C_c._1905.png)
La istoria de la xtetles la plu vea de Europa este comensa en la sentenio 13 e ia vide periodos longa de tolera e ricia relativa como ance tempos de povria estrema e sufri, incluinte la pogromes de la sentenio 19 en la Impero Rusce.
La Leges de Maio introduida par la tsar Alexandro 3 de Rusia en 1882 ia proibi la iudis es en areas campanial e vilas de min ca des mil persones.
En la sentenio 20 tarda, la iudis hasidiste ia fundi comunias nova en Statos Unida, como Kiryas Joal e New Square, e los frecuente usa la terma "xtetl" per refere a esta enclaves cuando los parla en ides, spesial aceles con strutur de viletas.
En Europa ueste, on considera la comunia ultraortodox en Antwerp como la xtetl ultima.
Cultur
[edita | edita la fonte]En la xtetl, la iudis ia manteni sua lingua propre (ides) e los ia ave un stilo retorica unica, radisida sur la tradisiones de la Talmud.
La xtetl ia es un comunia de fida construida sur un cultur relijiosa con radises profonda. Educa iudi ia es suprema importante: xicos e omes ia spende asta 10 oras per dia studiante en la seminarios iudi. La femes ia fa tota en la casa. En ajunta, xtetles ia ofre instituidas comunial como sinagogas, banios ritual e carnores ritual.
Esta disposa a atas bon ave sua radises en la puntos de vide relijiosa iudi, resomada en la tre colonas par Shimon Hatzaddik en Pirkei Avot:
- La mundo sta sur tre cosas. Sur la Tora, sur la servi [a Dio], e sur atas de amablia umana.
Carita (tzedaka) es un elemento xef en la cultur iudi asta oji. Carita ia es esensal per la iudis de la xtetl, multe de los esente povre. Atas de filantropia ia aida instituidas sosial como scolas e orfanerias. Iudis ia vide carita como un oportunia per fa un ata bon (mitzvah).
Cosas material es no despetada no lodada estrema. Eruditia e educa ia es la mesura ultima de valua en la comunia, en cuando mone ia es de grado du. Laboras manual ia es despetada e an la plu povres ia atenta labora en alga cual ia nesesa la usa de capasias como sapatores o taliores. La xtetl ia ave un etica de labora cual ia valua asidua e ia critica pigria. Studia ia es considerada la labora la plu valuada e la plu difisil. Omes erudita de la seminarios iudi ci no ia pote dona comeda a sua sposas par causa de mone ia es lodada como la iudis ideal.
Representas
[edita | edita la fonte]En leteratura
[edita | edita la fonte]La xtetl ia es "inventada du veses, un en la sentenio 18 par comanda manejal, cual ia dona lo un esense corpal, e denova en la sentenio 20, per servi como consola a iudis esuan". Umor iudi ia presenta los como sites de foles. Alga xtetles notables es Kasrilevke, la situa de multe naras pas Sholem Aleichem e Anatevka, do la musical "Violiniste sur la Teto" es situada.
Devorah Baron ia fa aliya a la Autoria Brites de Filastin en 1910 a pos un pogrom ia destrui sua xtetl prosima a Minsk ma el ia segue scrivente sur la vive en la xtetl.
Multe de la libros de Joseph Roth es fundida sur xtetles de la Impero Osteraic-Magiar e spesial sua vila de nase Brody.
Multe de la naras corta e novelas de Isaac Bashevis Singer es locada en xtetles. Sua madre ia es fia de la rabi de Biłgoraj, un vila en Polsca sude-este. Singer ia vive en Biłgoraj cuando ia es un enfante e sua vive ala ia impresa el.
La novela Everything Is Illuminated de Jonathan Safran Foer nara la istoria imajinal en la xtetl ucrainsce de Trachimbrod (Trochenbrod).
La libro per enfantes Something from Nothing es un ajusta de un nara iudi cual aveni en un xtetl naral.
La capitol Shtetl de la program Frontline ia nara la relatas entre cristianes e iudis polsce.
La nara corta "Shtetl Days" de Harry Turtledove comensa en un xtetl pareda a la de la obras de Alecheim ma la trama ia cambia, suvertinte la jenero.
Depinta
[edita | edita la fonte]Multe artistes iudi de Europa sentral e este ia dedica multe de sua careras artal a depinta la xtetl. Estas inclui Marc Chagall, Chaim Goldberg e Mane Katz. Sua contribui ia es lasa un rejistra permanente en color de la vive cual es descriveda en leteratur.
Filma
[edita | edita la fonte]- Fiddler on the Roof, 1971
- Yentl, 1983
Filmas atestante
[edita | edita la fonte]- Shtetl, 1996
- Return to My Shtetl Delatyn, 1992
Bibliografia
[edita | edita la fonte]- Eliach, Yaffa (1998) There once was a world: a nine-hundred-year chronicle of the Shtetl Eishyshok. Boston [u. a.], ISBN 0-31-623239-4.
- Gennady Estraikh, Mikhail Krutikov (2000) The shtetl: reality and image. (= Studies in Yiddish 2), Oxford.
- Eva Hoffman: Shtetl. The life and death of a small town and the world of Polish Jews. Houghton Mifflin, Bosto,n 1997, ISBN 0-395-82295-5.
- Dan Miron: The image of the Shtetl and other studies of modern Jewish literary imagination. Syracuse 2001.
- Yohanan Petrovsky-Shtern: The Golden Age Shtetl: A New History of Jewish Life in East Europe. Princeton, NJ: Princeton University Press 2014. ISBN 978-0-691-16074-0, ukr. Kiew 2019.