Sigrid Kaag
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
![](http://178.128.105.246/cars-http-upload.wikimedia.org/wikipedia/commons/thumb/2/23/Sigrid_Kaag_in_2018.jpeg/220px-Sigrid_Kaag_in_2018.jpeg)
Sigrid Agnes Maria Kaag (Rijswijk, 2 november 1961) is 'n Nederlandse diplomaot en politica vaan D66. Ze waor vicepremier en minister van Financieje in 't Kabbinèt Rutte-IV en minister vaan Boetelandsen Handel en Oontikkelingshölp in 't Kabbinèt Rutte-III. Daoveur heet Kaag allein 'n portefeuille, gein ministerie, oonder ziech. Vaan 2013 bis 2014 waor zie Speciaol Gezant vaan de Vereinegde Naties in Syrië, boe zie 'n succesvol oontwaopeningsmissie leide mèt es doel de sjemische waopes vaan de Syrische regering vaan Bashar al-Assad te vernetege. Neve häör ministersjap waor zie ouch vaan 13 fibberwarie bis 7 miert 2018 ad interim (of woernummend) minister vaan Boetelandse Zake. Zie moos tijdelek dat ministersjap euvernumme, umtot Halbe Zijlstra nao e sjendaol oontslaag naom es Minister vaan Boetelandse Zake. Heinao naom Stef Blok dat ministersjap euver vaan Kaag. Dat is zoe gegaange, umtot de VVD 'ne minister op dee pos waor belaof, en Kaag lid is vaan D66.
Kaag raakde al gaw populair bij häören achterban. Veur de Twiede Kamerverkezinge vaan 2021 woort ze tot liestrèkker verkoze. Mèt de slogan Tijd voor nieuw leiderschap solliciteerde ze mèt naodrök nao 't ierste-ministersjap. De verkezingsoetslaag waor evels neet zoe groet wie verwach, en 't lökde häör neet de gewunste centrumlinkse coalitie te make.
Op 16 september 2021 traoj ze aof oet 't demissionair kabinèt nao 'n motie vaan aofkäöring. De Twiede Kamer meinde tot ze foute hej gemaak bij de evacuatie vaan lui oet Afghanistan naotot de Taliban de mach dao hadde gegrepe.
Kaag is 'ne polyglot, zie sprik zès taole vloeiend: Nederlands, Ingels, Frans, Spaons, Duits en Arabisch. Häören ech mèt 'ne vreugere Palestijnsen ambassadäör en Fatah-politicus in Zwitserland, boemèt zie veer kinder heet, zörgde veur haat in veural rechspopulistische kring. Oetgerekend woort tot ze op sociaol media eder kerteer e haatberiech kraog. Dèks brachte de haters häör in verband mèt extremistische complottheorieë.