VDL NedCar
- Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Bors, es te dit dialek sjpriks.
![](http://178.128.105.246/cars-http-upload.wikimedia.org/wikipedia/commons/thumb/7/75/Nedcar_Born.jpg/220px-Nedcar_Born.jpg)
NedCar ies 'ne producent van personeauto's, gelege in Bor in de gemeinte Zittert-Gelaen in Nederlands Limburg. Bie NedCar wèrke miè es 3900 luuj, woadoor 't bedrief ein van de groatste werkgeversj in Limburg ies. Ouch ies 't de groatste autofabriek van Nederland. Me produceert hie de Mitsubishi Colt CZ3 en de Mitsubishi Colt CZ5. Vreuger höbbe ze de DAF, de Volvo (types 480, de 440, de 460 de S40/V40), en de Mitsubishi Carisma, de Mitsubishi Space Star en de Smart Forfour geproduceerd.
NedCar ies officieel opgeriech in 1991, meh de autofabriek in Bor haet 'n langer historie. In 1967 woort in Bor de ièrsjte DAF geproduceerd. In 1975 begoes me mèt de productie van Volvo's. De fabriek heesj doe Volvo Car B.V., wat later weer zou verandere in Netherlands Car B.V., naodat Volvo, Mitsubishi en de Nederlandse sjtaat 'n samewèrking waore aangegange.
Op 12 juli 2005 maakde NedCar bekènd dat 668 luuj óntsjlage zouwe were, naodat de productie al e paar kièr waor truukgedrièjd (ónder andere vanwege de tegevallende verkoupciefers van de Smart).
In mièrt 2006 woort door DaimlerChrysler bekènd gemaak dat me zou sjtoppe mèt de productie van de Smart ForFour in Bor. In april maakde Mitsubishi bekènd dat d'r 1000 bane bie NedCar gesjrap zouwe were. Op 21 april 2006 waor d'r 'n 24-oerssjtaking.
In de jaore daonao heel de taegesjpood aan. Op 6 februari 2012 kundigde Mitsubishi aan dat 't in 2013 gans zouw sjtoppe; es tot daen tied geine nuje kouper gevónde zouw waere, zouw 't febrik toegaon. Pas op 1 oktober maakde me bekènd dat BMW NedCar wouw euvernumme; 't concern wilt hie de Mini gaon boewe. De Mini weurt bies mièrt 2024 gemaak; al in oktober 2023 geit 't febrik de productie devan aafsjaole.[1]