Bataia de Maclode
![]() |
Quell articol qì l'è scrivud in Lombard, cond l'ortografia Scriver Lombard. |
![](http://178.128.105.246/cars-http-upload.wikimedia.org/wikipedia/commons/thumb/e/e7/Giuseppe_Gatteri_-_Battaglia_di_Maclodio%2C_1427.jpg/290px-Giuseppe_Gatteri_-_Battaglia_di_Maclodio%2C_1427.jpg)
La bataia de Maclode l'è stait un fait bellig de le Guerre de Lombardia.
L'è staita combatida ol 12 de otover del 1427, intra i forze del Ducad de Milan e de la liga contra i Visconts (qe la g'hiva dent la Republega de Venezia, de Firenze e ol Marqesad de Mantoa).
Ol contest
[Modifega | modifica 'l sorgent]Despò de la granda espansion de Milan sota ol domini de Jann Galeaz Viscont (qe l'era rivad fina a Padova e Siena), a causa de la so mort improvisa e a la deboleza del so s'ciet (Joann Maria), qe l'era miga rivads a fermar i lote intra i fazion interne, i olter stats arent i hera descaçads vià i milanes dei ulteme conquiste, e i era rivads infina a circar de conquistar anc la stessa Lombardia. Cond el nœv Duca Filip Maria, la situazion interna l'era meiorada, ma ol ducad l'era semper circondad dei nemix, e ind el 1426 Bressa l'era staita conquistada dei venezian.
-
Ol Ducad ind el 1402
-
Ol Ducad ind el 1500
I forze in camp
[Modifega | modifica 'l sorgent]L'armada veneziana l'era comandada del Carmagnola e del Nicolò de Tolentin, e l'era componida de 18.000 cavaller e 8.000 fants. Qella milanesa la g'hera al coo Pandolf Malatesta, Francesc Sforza e Nicolò Picinin, e l'era in inferioritaa numerega: adoma 12.000 cavallier e 6000 fants.
La bataia
[Modifega | modifica 'l sorgent]I forze veneziane i è vegnide for de Bressa e i ha marçad fina a Maclode, su la strada per Cremona e arent a l'Oi. Quand qe i è rivads i milanes, ol Carmagnola l'ha fait tacar per prime i so trœpe, e quand qe ol Malatesta l'ha respondid, l'ha fait ritirar i so omegn in mez a una zona de palta e piena de arbor. Al segur, i venezian i ha pudid tirar contra i milanes (qe i è indaits adree ai nemix) coi s'ciop e i balestre. Per completar la trapola, ol Tolentin l'ha tacad del de dree i milanes con 2000 omegn. Circondads, ol Picinin e ol Sforza a la fin i g'è rivads a scapar, cond un poo de trœpe, col sfrondar ol sqierament venezian; ma ol Malatesta l'ha duxid render-s e l'è stait brocad insema a 9000 omegn e i artelerie.
I conseguenze
[Modifega | modifica 'l sorgent]Despò de la fraca dei milanes, a Bergem la fazion guelfa l'ha descaçad i gibellin (favorevol ai milanes) e l'ha fait at de dedizion a Venezia, e i Visconts i ge riverà plu a reciapar ol controll de la Lombardia orientala, anc se la guerra l'indarà inanz fina a la pax de Lod.
Bibliografia
[Modifega | modifica 'l sorgent]- (IT) Andrea Frediani, La storia del mondo in 1001 battaglie, Newton Compton Editori, ISBN 9788854181991, ISBN 9788854188037