Fata
![](http://178.128.105.246/cars-http-upload.wikimedia.org/wikipedia/commons/thumb/5/52/SophieAndersonTakethefairfaceofWoman.jpg/234px-SophieAndersonTakethefairfaceofWoman.jpg)
Ona fata,[1] o fada,[2][3] l’è ona sorta de creatura mitega o legendaria che la se pœu trovà sovenz ind i favel e stori popular de tant cultur europej, come quej di celta, slav, todesch antigh, anglo-sassen e franch per dìnn on quaj. I fat hinn di spiret o di creatur del cel che vegnen despess descrivuu ‘me metafisegh, sopranaturaj o preternaturaj.
I mitt e stori ins i fat gh’hann nò on’origen communna, ma a hinn inscambi ona regœuja di cred popular che riven de di font ben different. I vari teorij de la gent communna intuituu de l’origen di fat porten – soratutt ind i tradizion cristiann – che sien o dij angioj casciaa via del paradis o di demòni minor che vegnen sù direttament de l’inferna. In accord cont i credenz pagann, inveci, i fat hinn concepii ‘me di spiret di mort o dij element de la natura ben pusse vegg de l’omm, e in quell significaa chì a hinn forsi compagn di ninf gregh.
Ind i agn, la parolla “fata” l’è stada dovrada ona quaj vœulta per referìss a di specifegh creatur magegh de l'aspett asquas uman, e che despess ind i stori ghe pias fà di dispett ai personn. Olter vœult, el termen el se dopera per ciamà dij olter creatur magegh, come i gnomm e i gobellitt. I fat hinn donca sossenn soziaa cont el mond de la magïa, e despess i paroll derivaa del termen “fata” hinn devegnuu di sinonem de “incantaa” e “magegh” ind el parlà de tucc i dì.
On temma recorrent ind i legend ins i fat l’è el besogn de tegnìjj fœura e casciàjj via di cà con dij amulett e talisman protettiv, come per esempi, di campann de gesa, di quadrefœuj o di mangià particolar. Primma del rivà de la medesinna moderna, i fat vegneven incolpaa per ogni sorta de malann, spezialment per i poppi nassuu con di deformitaa.
Oltra ai sò origen popular, i fat hinn staa vun di temma pussee commun de la litteradura del Renassiment e de l’art del Romanticesim, e i eren in gionta popular fiss ind el Regn Unii in del cors de l’etaa vittorianna e doardianna. I moviment per la renassenza di cultur celta hann voltaa i fat in vunna di caratteristegh pussee iconegh del sò patrimòni cultural de lor.
Nott
[Modifega | modifica 'l sorgent]- ↑ Vocabolario italiano-milanese, Ambrogio Maria Antonini, 1996.
- ↑ Vocabolario bresciano-italiano, Giovan Battista Melchiori, 1817 – p.244.
- ↑ Vocabolario bergamasco-ttaliano, Stefano Zappettini, 1859.