Silek Sungai Patai
Silek Sungai Patai adolah salah satu aliran silek Minang[1][2] nan ado di Tanah Datar. Aliran silek ko barasa dari Nagari Sungai Patai,[3] sabuah nagari nan talatak di Kabupaten Tanah Datar, nan babatehan langsuang jo Kabupaten Lima Puluh Kota. Manuruik sajarah lisan nan ditarimo dari tuo-tuo silek atau guru silek Sungai Patai, silek ko dibaok langsuang dek Syekh Abdul Manan, urang kampuang di Sungai Patai labiah tau jo gala Angku Gaduik atau Tuanku Gaduik.
Goluik jo mancak[suntiang | suntiang sumber]
Di Minangkabau, silek baguno untuak panjago diri atau pamaga badan. Dalam istilah Sungai Patai, basilek di muko musuah disabuik jo goluik. Sadangkan basilek untuak patunjuakan disabuik bungo. Baraja basilek di Sungai Patai dilakukan pado malam ari, nan batujuan untuak maningkekan kalincahan, katajaman raso, jo mangatahui sacaro parasoan arah garakan nan tibo.
Dalam prakteknyo saari-ari, jikok saurang guru silek ditanyo apokah pandai inyo basilek, mako jo kato aluih dan mangecekan maso inyo anyo pandai mancak (pencak). Padahal sabananyo inyo pandai basilek jo manjadi guru silek. Jadi itulah sipaik randah ati ala masarakaik pasilekan, baliau indak maninggikan diri, tapi wakatu jo kanyatoanlah nan ka maagiah tau nan sabananyo.
Lambang[suntiang | suntiang sumber]
Lambang Silek Sungai Patai pado awalnyo alun mampunyoi lambang, tatapi sairiang pakambangan jaman, lambang silek Sungai Patai muncua. Lambang Silek Sungai Patai dibuek kiro-kiro pado taun 1970-an, nan dibuek jo dirancang dek Syafril Murad. Angku Syafril Murad atau dikenal jo panggialan "Purin", barasa dari Bukiktinggi nan datang jo manuntuik ilimu Silek Sungai Patai ka Nagari Sungai Patai.
Dalam Silek Sungai Patai, beliau mamasuakan tigo binatang buas: iyolah gajah, harimau, jo ula. Gajah adolah lambang kakuatan, harimau lambang kabuasan, jo ula lambang lilikan nan dalam filosofi aliran Silek Sungai Patai disabuik kabek. Lambang tasabuik didominasi jo warna kuniang nan malambangkan Luhak Tanah Datar.
Pambarian namo Silek Sungai Patai dilakukan pado wakatu mambuek sasaran atau tampek latihan di ateh ngungun jo bukik selo.
Rujuakan[suntiang | suntiang sumber]
- ↑ Pauka, Kirstin (1998). Theater & Martial Arts In West Sumatra: Randai & Silek of the Minangkabau. Ohio University Press. pp. 27. ISBN 9780896802056. https://books.google.co.id/books?id=vfffbc0N1XsC&pg=PA27&dq=Hiltrud+Cordes+Sungai+Patai&hl=en&sa=X&ved=0ahUKEwjKwMyn6cTeAhWJtY8KHVSrAEAQ6AEIKjAA#v=onepage&q=Hiltrud%20Cordes%20Sungai%20Patai&f=false.
- ↑ Farrer, Douglas S. (2009-06-05) (dalam bahaso en). Shadows of the Prophet: Martial Arts and Sufi Mysticism. Springer Science & Business Media. p. 106. ISBN 978-1-4020-9356-2. https://www.google.co.id/books/edition/Shadows_of_the_Prophet/5H2pjzRD8RAC?hl=en&gbpv=1&dq=silat+sungai+patai&pg=PA106&printsec=frontcover.
- ↑ Maryono, O’ong (2023-03-16) (dalam bahaso en). Pencak Silat in the Indonesian Archipelago. Yayasan Pustaka Obor Indonesia. p. 200. ISBN 978-623-321-202-1. https://www.google.co.id/books/edition/Pencak_Silat_in_the_Indonesian_Archipela/k1e0EAAAQBAJ?hl=en&gbpv=1&dq=silat+sungai+patai&pg=PA200&printsec=frontcover.