Uganda

Uganda atau sacaro rasmi Republik Uganda adolah sabuah nagara nan takuruang daratan di Afrika Timur. Nagara ko babatehan jo Kenya di timur, Sudan Selatan di utara, Republik Demokratik Kongo di barat, Rwanda di barat daya, sarato Tanzania di selatan. Salah ciek danau tagadang di dunia, Danau Victoria, barado di selatan nagara ko, sarato kota-kota pantiang talatak di sakitarnyo, tamasuak ibu kota Kampala.^[1][2][3]

Politik Uganda tajadi dalam karangko otoriter, di mano Presiden Uganda kini ko Yoweri Museveni alah manjabat sajak 1986. Partai politik pernah dilarang sajak tahun itu hinggo 2006. Walaupun referendum tantang politik multi partai pado tahun 2005 dimanangan dek pro-demokrasi, nyatonyo Museveni masih dapek manguasoi politik Uganda.^[4][5] Presiden manunjuak surang wakia presiden jo surang pardana mantari untuak mambantunyo dalam pamarentahan. Kuaso legislatif dipacik dek Majelis Nasional nan tadiri dari 449 anggota.^[6] Paradilan sacaro teori independen dari eksekutif jo legislatif.

Manuruik revisi Prospek Populasi Dunia tahun 2022, total panduduak Uganda adolah 45.853.778 pado tahun 2021.^[7][8] Nagara ko tamasuak limo ta ateh dalam tingkek kasuburan total, yakni 5,97 anak lahia per padusi.^[9] Salain tu, nagara ko pado tahun 2021 manampiang labiah dari 1,4 juta pangungsi dari nagara-nagara tetangga, takah Sudan Selatan jo Republik Demokratik Kongo.^[10][11]