Clay Regazzoni
![](http://178.128.105.246/cars-http-upload.wikimedia.org/wikipedia/commons/thumb/e/e7/Anefo_924-6609_Clay_Reggazoni%2C_Catherine_Blaton%2C_Jacky_Ickx_Zandvoort_18_06_1971_-_Cropped.jpg/220px-Anefo_924-6609_Clay_Reggazoni%2C_Catherine_Blaton%2C_Jacky_Ickx_Zandvoort_18_06_1971_-_Cropped.jpg)
Gian-Claudio Giuseppe «Clay» Regazzoni (* 5. September 1939 in Porza; † 15. Dezember 2006 dicht bi Fontevivo bi Parma, Italien) weer en Swiezer Automobilrennfohrer. He is van 1970 bit 1980 in de Formel 1 antreeden un wurr 1974 Viezweltmeester.
Karriere
[ännern | Bornkood ännern]Clay Regazzoni fung sien Loopbahn 1963 an, is af 1965 in de Formel 3 antreeden un is 1967 van Brabham to den italieenschen Rennstall Tecno wesselt. 1968 is he in de Formel 2 fohren. 1969 weer he för en körten Tiet bi Ferrari, gung aber weer torüch to Tecno. 1970 fung, nu weer he all 30 Johr olt, sien Formel-1-Karriere bi Ferrari an un he wurr glieks Dart van de Weltmeesterschap. Parallel is he in dat Johr ok noch in de Formel 2 bi Tecno fohren un wurr dor Europameester.
![](http://178.128.105.246/cars-http-upload.wikimedia.org/wikipedia/commons/thumb/9/99/Regazzoni%2C_Clay_im_Ferrari_312_P_am_29.05.1971.jpg/220px-Regazzoni%2C_Clay_im_Ferrari_312_P_am_29.05.1971.jpg)
![](http://178.128.105.246/cars-http-upload.wikimedia.org/wikipedia/commons/thumb/7/7b/Regazzoni%2C_Clay_am_31.07.1976_-_Ferrari_312T.jpg/220px-Regazzoni%2C_Clay_am_31.07.1976_-_Ferrari_312T.jpg)
![](http://178.128.105.246/cars-http-upload.wikimedia.org/wikipedia/commons/thumb/d/d6/Grab_von_Clay_Regazzoni_2013-04-21_%281%29.jpg/220px-Grab_von_Clay_Regazzoni_2013-04-21_%281%29.jpg)
Nah een Johr 1973 bi B.R.M. kehr Regazzoni gemeensam mit sien Teamkolleeg Niki Lauda to Ferrari torüch. Dat Duo Lauda/Regazzoni führ in de folgend Johren de dormals spoodlos „Scuderia“ torüch an de Tipp, in dree Johren wunn Lauda 12mal un Regazzoni dreemal. Nah en van hüm veroorsakten Kollision mit Niki Lauda bi den Grooten Pries van Grootbritannien 1976 in Brands Hatch muss Regazzoni mit Enn’n van dat Johr dat Ferrari-Team verlaaten. 1977 is he to dat Ensign-Team van Mo Nunn wesselt un hett in de Saison fiev WM-Punkte haalt. Dorto verpass he bi dat Rennen in Fuji den tweeten Platz dör en Motorschaden. 1978 wurr he Liddmaat van dat Shadow-Team, kunn dor aber kien hooch Platzeeren recken. Sien Teamkolleeg dor weer Hans-Joachim Stuck.
För 1979 wurr he van Frank Williams as tweet Pilot neben Alan Jones ünner Verdrag nommen. Nahdem dat eerst nich so goot leep, belegg Regazzoni mit den Williams FW 07 den fieften Platz in de Fohrerwertung un hett bi dat Rennen in Silverstone den eersten GP-Sieg för dat Williams-Team (vör René Arnoux un Jean-Pierre Jarier) haalt. Dennoch hett Williams för 1980 Carlos Reutemann as nee Piloten haalt, wiel nah eegen Utseggen nich de beste sonnern de flinkste Nummer twee in’t Team hemm wull. Regazzoni kehr doruphen to Ensign torüch.
Aber in dat veert WM-Rennen 1980 weer sien Karriere nah en sworen Unfall to Enn’n Bi den Grand Prix in Long Beach leeg Regazzoni an veert Stäe, as in de Bremszoon nah de Shoreline-Drive-Geraden (den flinksten Deel van de Streck) sien ut Titan maakt Bremspedal breeken dee. He is denn ungebremst in den in de Utloopzoon stahnd Brabham BT49 van den Argentinier Ricardo Zunino un in de dorachter van Autoreifen blots minn schuult Betonmüür rast. Dat Bargen van Regazzoni ut den düchtig tosommenstuukten Ensign düer temelk lang. Regazzoni wurr mit mehreren Ünnerschenkelfrakturen as ok Kopp- un Rüggwirbelbesehren in dat St. Mary Hospital brocht. De Wirbelbesehren weern so swoor, dat he sietdem lahm weer.
All 1973 is Regazzoni den Dood blots knapp entgahn, as he bi den Grooten Pries van Süüdafrika in Kyalami nah en Unfall mit Mike Hailwood un Jacky Ickx sien B.R.M. in Flammen upgung. Hailwood kunn den bewusstlosen Regazzoni aber noch ut dat brennen Cockpit rutluuken un Regazzoni keem so mit Brandwunden dorvan. Wu völ Glück he bi dissen Unfall harr, wies sück blots een Week Later bi den Grand Prix van den Nedderlannen in Zandvoort, as Roger Williamson ut Grootbritannien ebenfalls en Füürunfall harr, aber dorbi to Dood keem.
Regazzoni hett insgesamt 132 Grand Prix bestreeden, keem dorbi up 5 Pole-Positions, 5 Siege un 212 WM-Punkte un fohr 15 flinkste Runnen. Sien gröttste Spood weer de Viezweltmeesterschap 1974.
Sien letzt Johren
[ännern | Bornkood ännern]Trotz sien Lähmung is Regazzoni wieder Rennen fohren. Mit en Handgasvörrichtung nehm he in de 1980er un 1990er Johren mehrmals an de Rallye Paris–Dakar un anner ähnlich Rennen deel. Ok in dat nee Johrduusend is he verscheeden Kart-, Fohrrad- (up Spezial-Dreerad) un Autorennen (GP Tunis 2004 up en 1964er Ford Mustang 289, Tour de España 2004 up Lancia Aurelia BT20 2500 GT usw.) fohren. Parallel dorto hett he sück för medizinische Forschungsprojekte för Querschnittgelähmte insett un as Feernsehkommentator arbeit. 1996 hett hüm de FIA sien Andrag um en Lizenz för de Sportwagenweltmeesterschap verwiegert.
An‘n 15. Dezember 2006 is Clay Regazzoni up de Schnellstraat bi Fontevivo westlich van Parma in Böveritalien mit sien Chrysler Voyager mit dat dat Heck van en Lastwagen kollideert. Nah Angaven van de italieensch Nahrichtenagentur ANSA weer he sofort dood.De Unfallorsaak bleev unklar; to Unfalltiet weern best Straaten- un Sichtverhältnisse, dat gifft kienn Henwiesen, dat he to flink fohren is. Technische un gesundheitliche Probleme hett man ok nich funnen. Clay Regazzoni hett sien Levenspartnerin, sien Ehefru as ok hör beid Kinner achterlaaten.[1] He is up den Karkhoff van Porza begraven.[2]
Literatur
[ännern | Bornkood ännern]- Marco Marcacci: Clay Regazzoni] In: Historisches Lexikon der Schweiz. 18. Januar 2012.
- Clay Regazzoni sien Nahroop in LaRegione 16. un 18. Dezember 2006.
Weblinks
[ännern | Bornkood ännern]- Website van Clay Regazzoni (italieensch un engelsch)
- Aiutiamo la paraplegia – Club Clay Regazzoni Onlus (italieensch)
- Clay Regazzoni up swissinfo.ch/ger/
- Un inedito Clay Regazzoni commenta la stagione 1971 up lanostrastoria.ch/entries/
- Clay Regazzonis Erinnerung up srf.ch/sport/motorsport/formel-1/
Enkeld Nahwiesen
[ännern | Bornkood ännern]- ↑ Pierre A. Gränicher, Sandro Brotz, Alexander Sautter: In Clays Sarg liegt eine gelbe Rose. In: SonntagsBlick. 16. Dezember 2006.
- ↑ Clay Regazzoni Werdegang up destobesser.com/article/