Hestia
![Vesta Giustiniani (Rom).](http://178.128.105.246/cars-http-upload.wikimedia.org/wikipedia/commons/6/6b/Hestia-meyers.png)
Hestia (greek.. Εστία) is en Göddin ut de Greeksche Mythologie in de Antike. Se hett mit den Heerd in de Familie un in den Staat to kriegen un is ok för dat Füür in düsse Herden tostännig. Ok de Familien höllt se tohopen. Se is den Kronos un de Rhea ehr öllste Dochter un den Zeus, den Poseidon un den Hades sien Suster. Ehr Vadder hett ehr dalslaken, just so as de annern Geswister, bloß Zeus nich. Tohopen mit siene Mudder hett Zeus ehr rett’.
Se is en Jungfru ween un hett ok swaren, dat se dat jümmerlos blieben woll, ofschoonst (oder vunwegen dat) Poseidon un Apollon driest achter ehr ran weern. Zeus hett ehr denn schunken, dat se ewig Jungfru blieben scholl.
Up en Fier vun de Gödder hett de Gott Priapos sehn, dat se slapen dö un woll sik an ehr ranmaken. Man just in den Momang hett en Esel schreet un Hestia waak up un neih ut. Dor weer Priapos so vergrellt, dat he den Esel doot slahn hett. As Dionysos mank de Olympiers upnahmen weern scholl, dor hett Hestia Bott geven un den Platz free maakt.
Se weer de Göddin vun allens, wat mit dat Huus to kriegen harr un ok vun den Segen in dat Huus. Dormols weer de Hillige Heerd de Middelpunkt vun jedet Huus. Se is ok as Vörsittersche bi de Opfers ankeken wurrn, vunwegen dat de Opfers up den Heerd bröcht wurrn sünd. Bi dat Eten vun dat Fleesch vun de Opfers kreeg se to Anfang un to Enn wat af. Bi den Heerd un sien Göddin hefft se dormols de Hilligen Eeden swaren. Un ok, wenn en Verdrag afslaten wurrn is, weer Hestia de Göddin, de denn anropen wurrn is. De Heerd weer ok en Asyl för Lüde, de sik schulen mössen un tohopen mit Zeus weer Hestia de Göddin, de up so’n Lüde passen dö. Vunwegen dat se de Schutzgöddin vun dat Huus weer, weer se ok för jeden Bund mank de Staaten tostännig. In de greekschen Staaten weer dat Prytaneion up ehren Naam wieht. Se harr dor en Altar un dor brenn to ehr Ehren en ewig Füür up. Wenn Siedlers vun en Staat wegtögen in’e Frömd, denn nehmen se Füür mit vun düssen Altar. Dat brennen se denn in jem ehr tokümstig Heimat up’n Heerd wedder an.
Bi de Römers is Hestia mit de Göddin vun dat Füür Vesta öbereen sett wurrn. Man in dat Leben vun den Röömschen Staat hett Vesta en veel gröttere Rull speelt, as in Grekenland.
Vunwegen dat se rein weer un vun de Mannslüde nix weten woll, is se in de Kunst jümmers as en anstännig Froonsminsch wiest wurrn. Jummers kickt se en beten eernsthaftig un steiht oder sitt ganz ruhig. Anstännig anplünnt is se ok un nix vun de Kledaasch fehlt. Dat geev in de Antike man wenig Standbiller vun de Hestia. An’n meisten beröhmt is woll den Skopas sien Statue. Un denn gifft dat noch en paar Biller, dor weet een nich so genau: Is dat nu Hestia oder nich? So en is de „Vesta vun Giustiniani“ in dat Museo Torlonia in Rom (kiek dat Bild an). Up röömsche Münten is se mit dat Palladion un mit dat Simpulum to sehn.