Michael Smith (Chemiker)

Michael Smith, CC, OBC (* 26. April 1932 in Blackpool, England; † 4. Oktober 2000 in Vancouver, Kanada) weer en kanaadsch Chemiker. He kreeg 1993 den Nobelpries för Chemie gemeensam mit Kary Banks Mullis.

1956 is he nah Kanada utwannert un wurr 1963 kanaadsch Staatsbörger. Michael Smith hett Chemie studeert un kreeg 1956 sien Doktertitel an de Universität Manchester. Dornah keem en Forschungsupenholt in Vancouver bi Har Gobind Khorana, Medizin-Nobelpriesdräger van 1968. Smith gung 1960 mit de Arbeitsgrupp vun Khorana nah Wisconsin, kehr aber 1961 weer nah Vancouver torüch, wo he 1966 Perfesser för Biochemie an de University of British Columbia wurr.

He kreeg 1993 den Nobelpries för Chemie för sien grundleggend Bidrääg to dat Etableeren vun de Oligonukleotid-baseerend, oortsspezifischen Mutagenese vun de Desoxyribonukleinsüür (DNA) un sien Entwicklung för Proteinstudien. 1986 weer he mit den Gairdner Foundation International Award uttekent wurrn. 1981 wurr he in de Royal Society of Canada upnommen, 1995 in de Canadian Medical Hall of Fame un 1996 in de National Academy of Sciences vun de Vereenigte Staten.^[1]

Mit sien Fru Helen Wood Christie harr he dree Kinner. 1983 hemm se sück aber trennt.

• Indrag up de Sieden vun den Nobelpries (engelsch)
• Michael Smith Laboratories an de University of British Columbia
• Kanadische Nobelpreisträger (Memento von’n 21. Februar 2001 in dat Internet Archive) (engelsch)
• Indrag bi academictree (engelsch)

1. ↑ Caroline R. Astell: Michael Smith. 26 April 1932 – 4 October 2000. In: Biographical Memoirs of Fellows of the Royal Society. Band 47, 2001, S. 429–441, doi:10.1098/rsbm.2001.0025.