Jimi Hendrix
|
Jimi Hendrix
James Marshall Hendrix | |
|---|---|
| |
Jimi Hendrix, 1967.
| |
| Naissença | 27 de novembre de 1942 a Seattle, Washington |
| Decès | 18 de setembre de 1970 Londres, Reialme Unit |
| País d’origina |  Estats Units
|
| Profession(s) | cantaire e musician |
| Genre(s) | rock, blues |
| Annadas activas | 1963 - 1970 |
James Marshall Hendrix, nascut Johnny Allen Hendrix e mai conegut coma Jimi Hendrix (Seattle, 27 de novembre de 1942 - Londres, 18 de setembre de 1970) foguèt un guitarrista e cantautor american. Èra un dels melhors guitarristas de l'istòria del rock e del blues e es considerat coma un dels musicians mai importants del sègle XX. Fondèt lo grop angloamerican The Jimi Hendrix Experience, que foguèt actiu de 1966 a 1970.
Es celèbre per sas innovacions musicalas durant lo periòde psiquedelic de la fin de las annadas 1960.
Moriguèt tragicament a l'edat de 27 ans dins sa cambra d'otèl a Londres en 1970 en seguida d'una asfixia deguda a l'absorcion de barbiturics.
Biografia
[modificar | Modificar lo còdi]
Johnny Allen Hendrix nasquèt en 1942 a Seattle, vila de l'estat de Washington, primièr enfant de James Allen "Al" Hendrix e de Lucille Hendrix (nascuda Jeter), d'origina cherokee. Sos parents s'èran rescontrats durant un balèti a Seattle en 1941, quand Lucille aviá pas que 16 ans. Pr'amor qu'èra militar e mobilizat dins una basa de l'armada americana en Oklahoma, Al Hendrix vegèt son filh sonque tres ans aprèp sa naissença. La maire, Lucille, èra incapabla d'abalir lo dròlle per encausa de son problèma d'alcoolisme. Al Hendrix recuperèt alara son filh, que rebategèt James Marshall en omenatge a son fraire defunt, Leon Marshall Hendrix, e prepausèt a Lucille de viure amassa. Aguèron puèi un segond filh, Leon Hendrix, en 1948. Pr'aquò, lo parelh s'aveniá pas, e aprèp mantuna disputa acabèt per divorciar lo 17 de decembre de 1951.
Jimi anèt a l'escòla elementara Horace Mann de Seattle e aviá pres la tissa de portar una escoba amb el per imitar una guitarra. Aquela abitud foguèt remarcada per una psicologa de l'escòla que decidiguèt d'escriure al cap d'un temps una letra per demandar una subvencion escolara pels enfants desfavorizats en insistir que lo laissar sens guitarra li podriá causar de sequelas psicologicas. Sos esfòces foguèron de badas e mai son paire refusèt de li crompar una guitarra.
