Messier 33
![](http://178.128.105.246/cars-http-upload.wikimedia.org/wikipedia/commons/thumb/2/2f/M33HunterWilson09.jpg/220px-M33HunterWilson09.jpg)
La galaxia dau Triangle (tanben dicha Messier 33 ò NGC 598) es una galaxia espirala que fa partida dau Grop Locau e qu'es benlèu un satellit de la galaxia d'Andromèda. Situada dins la constellacion dau Triangle ai coordenadas 01h 33 m 50,904 s e +30° 39′ 35,79″, es a una distància mau coneguda qu'es estimada entre 2,38 e 3,07 milions d'ans lutz de la Tèrra. Amb un diamètre de 50 000 a 60 000 ans lutz e una massa d'aperaquí 60 milions de massas solaras, es la tresena galaxia pus importanta dau Grop Locau après la galaxia d'Andromèda e la Via Lactèa.
Descubèrta en 1764 per l'astronòm francés Charles Messier (1730-1817), a una magnitud aparenta de +6,27 e una talha angulara relativament importanta de 70,8' × 41,7'. En causa d'aquelei caracteristicas, son observacion necessita un camp larg e un grossiment feble e es donc relativament malaisada per leis astronòms amators.