Juancho Irausquin

Juancho Irausquin
Juancho Irausquin na 1954
Informacion basico
Nomber completo	Juan Enrique Irausquin
Nacemento	3 di december 1904
Fayecimento	21 di juli 1962
Pais	Aruba
Partido	PPA
Funcion
1950-1954	Miembro di Conseho Insular
1954-1956	Miembro di Parlamento
1954-1956	Presidente di Parlamento
1956-1962	Minister di Finansa y Bienestar

Juan Enrique (Juancho) Irausquin (☆ 3 di december 1904 na Aruba - † 21 di juli 1962 na Aruba) tabata un bankero y politico Arubiano. E tabata minister den gabinete Jonckheer I y II. E ta conoci pa su trabou politico cu a sirbi como base pa formalisa turismo como un pilar economico di Aruba.

Famia Irausquin a imigra for di Venezuela, pero ta specula cu e origen di e famia ta na Spaña, specificamente e region Basco di e pais.^[1] Irausquin tabata casa cu Maria Irausquin-Wajcberg (tambe skirbi: Waitzberg), politico y prome hende muhe elegi como miembro di e Conseho Insular di Aruba. Irausquin no tabatin yiu.

Na 1962, den funcion di minister di Antias Hulandes, Irausquin a fayece di un ataca di curason na edad di 57 aña.

Irausquin a continua su estudio secundario na Corsou, cu vaknan di economia. El a cuminsa traha na edad di diescuater aña na Hollandsche Bank, unda el a subi rápidamente na e posicion di apoderado. Na 1929 el a cambia pa John G. Eman Banking Department, ku tambe tabata haci negoshi bancario y cua na 1936 a bira e prome banco comercial di Aruba, Aruba Bank. El a wordo nombra como director y na 1951 a bay cu retiro. Durante e periodo aki el a ocupa diferente otro funcion, entre otro como presidente di Camara di Comercio y cofundado di Rotary Club Aruba.

Irausquin a cuminsa su carera politico riba lista di partido AVP, ora el a wordo elegi como miembro di parlamento di Antias Hulandes, na 1947.^[2] Na 1949, Irausquin, hunto cu entre otro Porfirio (Fichi) Croes, a bandona partido AVP y a forma un partido nobo: Partido Patriotico Arubano (PPA)^[2].^[3]. E partido aki a crece den popularidad lihe, entre otro danki na e sosten di migrantenan laboral di e islanan bisiña.

For di 1949 e tabata miembro di parlamento di Antias Hulandes pa PPA. El a contribui grandemente den e delegacion Antiano na Ronde Tafel Conferentie (RTC) di 1948 y 1952-1954. For di 1954 e tabata presidente di parlamento for di 1954 te su nombramento na 1956 como minister den gabinete Jonckheer I, di kua e tabata e formador tambe.^[4] Den e gabinete Jonckheer II el a manehá e carteranan di finansa y bienestar te na su morto repentino dia 21 di yüli 1962.^[2] Den su trabou como bankero y como Minister di Finansa el a enfatisa e importancia di turismo pa e economia di e isla. Esaki a culmina den un plan pa desaroya e infrastructura, entre otro e expansion di waf y aeropuerto, e desaroyo di un planta di desalinisacion di awa (awendia: WEB) y planta di electricidad (awendia: Elmar). Diferente proyecto social, manera e inauguracion di un Hotel Vakschool y Horacio Oduber Hospital tambe a forma parti d e plan aki. ^[1]

• Diferente caya y edificionan na paisnan den Caribe Hulandes ta carga nomber di Irausquin. Importante pa nota cu ta uza dos manera pa spel e fam: Yrausquin y Irausquin: Juancho Irausquin Boulevard na Aruba y Juancho Yrausquin Boulevard na Philipsburg, Sint Maarten; Plaza Juan Enrique Irausquin, inaugura na 1965 cu su estatua dilanti postkantoor na Oranjestad, Aruba.^[5]
• Juancho E. Yrausquin Airport, e aeropuerto di Saba. El a habri na september 1963 bou di nomber di Irausquin, na honor di su esfuersonan pa realisa e financiamento di e aeropuerto. Casa di Irausquin a efectua e apertura despues di e fayecimento di Irausquin na 1962.
•  Hulanda: Cabayero (Ridder) den Orden di Oranje-Nassau, otorga despues di su fayecimento, na nomber di Reina Juliana.