Imṛabḍn

Imṛabḍn niɣ tawsit n imṛabḍn (s tɛṛabt: **المرابطون**, s tlatint: **Al-Murābiṭūn**) gan yat tmnukda tamaziɣt ilan adasil nns ɣ tuẓẓumt n tglda n lmɣrib n wass ad. tssnkr yat tmnukalt ɣ tasut tiss-11 iɣrrdn ammas n utaram n tfriqt n ugafa d wandlus, tssntu ɣ yisggʷasn n id 1050 tɣama aylliɣ tḍṛ dar yimuwḥḥidn ɣ 1147. tmɣi d twsit sɣ umqqun n lmtuna, igudaln d mssufa, kra n tqbilin n imggudja imaziɣn da ttmussunin tizi nna ɣ ɣaylli ittggan tamurt n muṛiṭan n wass ad d tiniri tutrimt n tgldit tamɣiribit, ar ttmussun ɣ tmnaḍt n gr ḍṛa, nijr, ar asif n sanigal. ɣ uzmz n unɣal nnsn ɣr tfriqt n ugafa, srsn yimṛabḍn tirsal n tmdint n mṛṛakc gin tt d tamaẓunt n tgldit nnsn, ɣ wattayn n 1070.

zzrin yimṛabḍn yat tilalt ilan yan uddur axatar ɣ umzaɣ mgal n tḍuṛi n wandalus (tinnubḍa tamuslmt ɣ yibirya) ɣ yifassn n tglday timasiḥiyin n yibirya, lliɣ nnran yan umulli n tsrdasin d ikkan ayt kastilya d waragun ammas n yimnɣi ittussann s zzalaqa ɣ 1086. yujja tn uyad ad fsrn tanbaḍt nnsn ɣf yat tymbṛaṭurit yutn s 3,000 ikilumitrn sɣ yiffus nns ar agafa nns. inbbaḍn nns, ur jju gin assaɣ n xalif d winnsn, ṭṭfn ɣ udɣar nns ɣ wassaɣ n "agldun n yimuslmn" ("*Amir al-Muslimīn"),* ar ttggan ɣ usga yaḍn iɛbbasiyn ammas n baɣdad d ibrgllidn d yixalifn n tmtti n yimuslmn s wudm amaddud. waxxa mkann, ikka tt inn wakud n tnbaḍt n twsit nnsn igzzul. ḍṛn yimṛabḍnilin nit ɣ tattuyt n udwas nnsn ɣ uzmz ann lliɣ ur murisn ad siddn taɣwwaɣt n yimṣmuḍn s tnssixft n ibn tumrt. Ɣmkad, ikka tt inn ugllid nnsn anggaru isḥaq ibn ɛli ittunɣa ɣ mṛṛakc ɣ yibril n usggʷas n 1147 dar imuwḥḥidn, nna iwin adɣar nnsn amm yat twsit igan tanbbaḍt ɣf lmɣrib amqqran d wandalus.