Tetris
![](http://178.128.105.246/cars-http-upload.wikimedia.org/wikipedia/commons/thumb/9/9c/Typical_Tetris_Game.svg/220px-Typical_Tetris_Game.svg.png)
![](http://178.128.105.246/cars-http-upload.wikimedia.org/wikipedia/commons/thumb/3/39/Tetrominoes_IJLO_STZ_Worlds.svg/220px-Tetrominoes_IJLO_STZ_Worlds.svg.png)
Tetris lii videospellâ, mon vuávái ryeššilâš Aleksei Pažitnov ive 1984.[1][2] Tetris šoodâi tállán hirmâd pivnohin, já tast láá rahtum versioh masa puoh tiäturáid já spellâmkonsoláid. Spellâ lii ain-uv uáli jo piivnoh, já maailmmiäštárvuotâkištoh uárnejuvvojeh jyehi ive.
Spellâm
[mute | mute käldee]Speelâ pajeroobdâst kaččeh tagareh kuboleh, moh láá rahtum neelji uccâ neljiháást. Kubolijd ferttee sirdeđ já jurâttiđ toin naalijn, ete ruuvdu vyeliroobdân šaddeh oles raddalâsah, main ij lah ohtâgin kuárus koskâ. Ko šadda tievâslâš raddalâs, te tot meddâlistoo ruuvdust, já speelâst šadda kuuloold jotelub ubâ ääigi.
NES-versio
[mute | mute käldee]Ohtâ pivnohumos versioin lii Nintendo Entertainment System (NES) versio, mii rahtui ive 1989.[3] Aalgâst lâi taggaar juurdâ, et NES-versio puovtij spellâđ tuše tääsi 29 räi, tastko kubolijd ij pyevti sirdeđ tuárvi jotelávt ruuvdu robdáid.[4] Ive 2011 Thor Aackerlund[5] já ive 2020 Chris Martinez keksijn kuittâg uđđâ vuovijd kevttiđ stivrimpiergâs, moh taheh máhđulâžžân vyeittiđ tääsi 29.[4] NES-versiost láá maaŋgah eres-uv čuolmah já bugeh. Ovdâmerkkân tääsist 148 kubolij ivneh láá nuuvt tevkkâdeh, et taid ij uáini pyereest.[4] Tääsist 157 spellâ jaska toimâmist, tastko NES-spellâmkonsol ij innig paste peividiđ spellâmkiedi já numerijd tuárvi jotelávt.[4]
Willis Gibson
[mute | mute käldee]Juovlâmáánu 2023 loopâst 13-ihásâš Willis Gibson (jiellâhnommâ Blue Scuti) šoodâi vuossâmuš spellen maailmist, kote lii vuáittám Tetris.[3][6][7] Sun luhostui juksâđ ton táásán, mast spellâ jaska toimâmist. Nuuvt puáhtá ettâđ, et sun vuotij speelâ.[4]
Fáádást eres soojijn
[mute | mute käldee]Wikimedia Commonsist láá koveh teikkâ eres tiätuvuárháh fáádást Tetris.
Käldeeh
[mute | mute käldee]- ↑ Tetris compie 25 anni, ma non li dimostra www.corriere.it. Čujottum 9.1.2024. (italiakielân)
- ↑ Pingitore, Silvia: Interview with Tetris creator Alexey Pajitnov The Shortlisted. 19.3.2023. Čujottum 9.1.2024. (eŋgâlâskielân)
- ↑ 3,0 3,1 Orland, Kyle: 34 years later, a 13-year-old hits the NES Tetris “kill screen” arstechnica.com. 2.1.2024. Čujottum 9.1.2024. (eŋgâlâskielân)
- ↑ 4,0 4,1 4,2 4,3 4,4 Brecciaroli, Fabrizio: Tetris lii vuoittum anarasaavis.fi. 9.1.2024. Čujottum 9.1.2024.
- ↑ Sweet, Jacob: The Revolution in Classic Tetris newyorker.com. 26.3.2021. Čujottum 9.1.2024. (eŋgâlâskielân)
- ↑ Deb, Sopan: Boy, 13, Is Believed to Be the First to ‘Beat’ Tetris nytimes.com. 3.1.2024. Čujottum 9.1.2024. (eŋgâlâskielân)
- ↑ Montgomery, Blake: Oklahoma 13-year-old believed to be first person ever to beat Tetris theguardian.com. 3.1.2024. Čujottum 9.1.2024. (eŋgâlâskielân)