Quatro Marzo
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← El pensier | Edission e fonte ▼ | Burasche del cuor → |
Quatro Marzo
Xe un ano ancuo, mia povara inocente,
che ti riposi là sul campo santo
del povaro paese, e pur el pianto
me xe cascà più volte inutilmente
mia povara ninina! E come e quanto
te go davanti a mi sempre presente!
oh come mai me afano cuor e mente
a ti pensando, o bela e cara tanto!
E so che passarà tanti ani ancora
se tanto durarà la vita mia,
senza che un zorno solo, una sol'ora
desmentegar te possa, o mia Maria!
Xe un ano ancuo che ti xe morta, o mora
ma sempre viva in mi ti xe scolpìa.