Viçinato delizioso
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← Pro Hominibus | Edission e fonte ▼ | In montagna → |
Viçinato delizioso
Viçin de casa mia ghe xe un portento
de sonador da piano, e, povareto,
l'è tanto inamorà del so strumento,
che gnanca un'ora el me lo lassa quieto.
Ma che sentissi come el ghe dà drento
saltando da 'na polca al minueto,
da 'na romanza co del sentimento
a 'na trivialità de bruto efeto!
El so preludio, po, xe na marciada
che lu ripete, incastra e po 'l me sona
da novo ancora in fin de la fritada.
La xe 'na marcia vecia, anzi veciona,
che mi, ma sensa gnanca torla in man,
so za che la se ciama..... Marcia can!