Nereht (lidn)

Nereht
Нерехта
Lidnanznam;	Flag;
Valdkund	Venäma
Eläjiden lugu (2021)	19,977 ristitud
Pind	17,22 km²
Pämez'	Mihail Semenov; (sulaku 2024—,; velgusentäutai)
Telefonkod	+7−49 431-xx-xxx
Avtokod	44
Aigvö	UTC+3 (MSK+0)

Nereht (ven.: Не́рехта) om Venäman lidn, lidnankund da raudtesol'm Kostroman agjan suvipäivlaskmaižes čogas. Se om Nerehtan rajonan administrativine keskuz.

Istorii

Eländpunkt mainitase ezmäižen kerdan vl 1214 kut Vsevolod III Sur' Peza-ruhtinasen lapsiden ridan objekt. Lidnan keskuz sijazihe Nereht-jogen oiktal randal 16. voz'sadahasai. Šingotihe keitandsolan samižel 15.-18. voz'sadoil. Nereht sai makundan lidnan oficiališt statusad vl 1778. Torguz oli lidnas joga nedalil, koume jarmankad vodes oleskeli edel 20. voz'sadad.

Nereht šingotase mašinansauvomižel (mehanine tegim, elektrolämbitimed), sauvondmaterialiden pästandal (järed savičun tegim), turizmal, mugažo meblin fabrik (stal'cad, ištmed) i suvenirfabrik ratas lidnas.

Geografijan andmused

Lidn sijadase rajonan päivlaskmas, Nereht-jogen (Volgan oigedpol'ne bassein) hural randal, 100 m ü.m.t. keskmäižel korktusel.

Matkad Jaroslavlin agjan röunhasai om kuz' kilometrad päivlaskmha orhal, agjan Kostrom-keskushesai om 40 km pohjoižpäivnouzmha orhal, 45 km avtotedme vai raudtedme. Lähembaižed lidnad sijadasoiš 30..40 kilometras orhal, ned oma: Kostrom pohjoižpäivnouzmha, Volgorečensk päivnouzmha, Furmanov suvipäivnouzmha, Gavrilov Jam suvipäivlaskmha-päivlaskmha, Jaroslavl' lodeheze.

Tobmuz

Nereht om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline Administracijan pämez' om Viktor Odinokov (reduku 2016 — keväz'ku 2024). Lidnan Deputatoiden nevondkundan ezimez' om Lüdmila Bulanova vn 2021 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 22 828 ristitud, rajonan kaks' koumandest, vn 2021 — 19 977 ristitud. Kaik 21 403 eläjad oli lidnas vl 2017. Kaikiš suremb lidnan ristitišt oli 28..30 tuhad eläjid vll 1989−2000 (30 100 rist. vl 1992).

Rahvahad (enamba 0,4 % vl 2021): venälaižed — 95,4 %, toižed rahvahad — 2,1 %, rahvahuden ozutandata — 2,5 %.

Ortodoksižen hristanuskondan üks'toštkümne pühäpertid^[1] oma kaičenus i saudud lidnas: Jumalanmaman Kazanin jumalaižen päjumalanpert' (1709, ei ole avaitud, leibtegim radab siš, no voib libuda kellčuhunduses), kuz' jumalanpertid i nell' časounäd. Niiden ližaks üks' časoun' (oli vll 1680−1930) om pandud mantazole i ei ole kaičenus.

Lapsiden opendusen aluzkundad oma severz'-se päivkodid, nell' keskškolad (nomer 1..4), gimnazii, lapsiden sädamižen «Avtograf»-pert', muzikškol, čomamahtoine škol, sportškol. Nerehtan politehnine tehnikum^[2] om lidnan professionaližen opendusen aluzkundaks.