Ržev
Lidnanznam![]() |
Flag![]() |
Valdkund | Venäma |
Eläjiden lugu (2020) | 57,515 ristitud |
Pind | 56,17 km² |
![]() | |
Telefonkod | +7−48 232-xx-xxx |
Avtokod | 69 |
Aigvö | UTC+3 (MSK+0) |
![](http://178.128.105.246/cars-http-upload.wikimedia.org/wikipedia/commons/thumb/9/9d/%D0%9A%D0%B0%D1%80%D1%82%D0%B0-%D0%B3%D0%BE%D1%80%D0%BE%D0%B4%D0%B0-%D0%A0%D0%96%D0%95%D0%92%D0%90.png/250px-%D0%9A%D0%B0%D1%80%D1%82%D0%B0-%D0%B3%D0%BE%D1%80%D0%BE%D0%B4%D0%B0-%D0%A0%D0%96%D0%95%D0%92%D0%90.png)
Ržev (ven.: Ржев) om Venäman lidn Tverin agjan suves. Se om agjan kahtenz' surtte lidn, Rževan ümbrikon administrativine keskuz. Edel 2022. vot lidn ei mülünd Rževan rajonha (om tühjitadud) i oli erigoittud ümbrikoks.
Istorii
[vajehta | vajehtada lähtetekst]Eländpunkt mainitase ezmäižen kerdan vl 1019 Uz'lidnan käskuzkirjeižes, vl 1216 — lidnuseks Volodimiran Ržev, Rževk i Ržov-nimidenke (ven.: Ржева Володимирова, Ржевка, Ржов), lidnan statusanke. Lidn oli Rževan ruhtinazkundan keskuseks vll 1226−1356 da 1410−1526, rat'kaigas se oli alištadud Litvan Surele ruhtinazkundale.
Rževan ižandusen päsarakod oma mašiništonsauvomine (termostatad da stökolpuhtastimed avtoiden täht, sauvondlibutimed da liftad), sömtegimišt, sauvondmaterialiden pästand (savič), pun ümbriradmine, omblendfabrik om saudud.
Geografijan andmused
[vajehta | vajehtada lähtetekst]Lidn sijadase Volgan randoil, 190 m ü.m.t. keskmäižel korktusel. Se om ezmäine lidn jogel mödvedhe. Matkad Tverihesai om 117 km pohjoižpäivnouzmha avtotedme. Lähembaine lidn om Zubcov 25 km suvipäivnouzmha M9-trassadme. Om kaks' päraudtestancijad «Moskv — Rig»- i «Toržok — Väz'm»-keskustoil. «Baltii»-avtote (M9) sijadase ühtes kilometras suvhe lidnan röunaspäi.
Ržev om lidnümbrikon üks'jäižeks eländpunktaks. Rževan oiged randpol' nimitase Rusttan Armijan poleks (ven.: Красноармейская сторона), hura randpol' — Nevondkundaližeks poleks (ven.: Советская сторона), ned oma lidnan istorižed rajonad.
Eläjad
[vajehta | vajehtada lähtetekst]Vn 2010 Venäman rahvahanlugemižen mödhe lidnan eläjiden lugu oli 61 982 ristitud. Kaikiš suremb lidnan ristitišt oli läz 70 tuhad eläjid vll 1982−1998 (70 900 rist. vl 1992). Kaik 59 804 eläjad oli lidnas vl 2017. Nügüd'aigan lidn otab viž kudendest ümbrikon ristitištos.
Ortodoksižen hristanuskondan 17 pühäpertid[1] oma letud lidnas vspäi 1839: Jumalanmaman Okovcan jumalaižen kafedraline päjumalanpert', Sündun Voznesenjan päjumalanpert', kümne jumalanpertid i viž časounäd. Mugažo vanhuskolaižiden pühäpert' (1910. voz') om avaitud. Niiden ližaks läz kümned jumalanpertid ei ole kaičenus.
Rževan kolledž[2] (enččel agrarine kolledž i mašiništonsauvondan tehnikum), tehnologine[3] i medicinine[4] kolledžad oma lidnan professionaližen opendusen aluzkundoikš.
Edeline lidnan pämez' oli Vadim Rodivilov vn 2014 redukuspäi.
Galerei
[vajehta | vajehtada lähtetekst]-
Lidnan administracijan sauvuz (2008)
-
Jumalanmaman Okovcan jumalaižen kafedraline päjumalanpert', vn 2019 nägu
-
«Ržev»-adivpert' vl 2021
-
Raudteradnikoiden läžundkodi (2011)
-
Ržev-Baltiiskii (Ržev-II)-päraudtestancijan sauvuz vl 2004
Homaičendad
[vajehta | vajehtada lähtetekst]- ↑ Rževan pühäpertid sobory.ru-saital. (ven.)
- ↑ Rževan kolledžan sait (rzcoll.ru). (ven.)
- ↑ Rževan tehnologižen kolledžan sait (ртк-ржев.рф). (ven.)
- ↑ Rževan medkolledžan sait (rzhevmedkollege.ru). (ven.)
Irdkosketused
[vajehta | vajehtada lähtetekst]![]() |
Ržev Vikiaitas |
Tverin agjan lidnad | ||
Andreapol' | Belii | Bežeck | Bologoje | Kaläzin | Kašin | Kimri | Konakovo | Krasnii Holm | Kuvšinovo | Lihoslavl' | Nelidovo | Ostaškov | Päivlaskmpol'ne Dvin | Ržev | Staric | Zubcov | Toropec | Toržok | Tver' | Udoml' | Ves'jegonsk | Višnii Voločok | ||