Bessie
![](http://178.128.105.246/content-http-upload.wikimedia.org/wikipedia/commons/thumb/8/81/Tomaat_dwarsdoorsnede.jpg/220px-Tomaat_dwarsdoorsnede.jpg)
In die algemene spreektaal is 'n bessie die kleinerige vrug van 'n plant. In botaniese terme is 'n bessie egter, ongeag grootte, 'n eenvoudige, vlesige vrug met 'n enkele vrugbeginsel. Die soort bessies word "egte" of "ware bessies" genoem om hulle van valse bessies te onderskei. Volgens die definisie is tamaties, koejawels en druiwe egte bessies, maar moerbeie ('n saamgestelde vrug) en aarbeie ('n bykomstige vrug) is nie.
![](http://178.128.105.246/content-http-upload.wikimedia.org/wikipedia/commons/thumb/4/48/True.berries.jpg/220px-True.berries.jpg)
![](http://178.128.105.246/content-http-upload.wikimedia.org/wikipedia/commons/thumb/3/31/Berries_%28USDA_ARS%29.jpg/220px-Berries_%28USDA_ARS%29.jpg)
Bessies kan verskillende vorme hê, van rond tot langwerpig, en kan eenhokkig of meerhokkig wees. Die vrugwand (die eksokarp) van 'n bessie kan dun (soos by rooibessies of druiwe) of dik (soos by spanspek) wees. Die bessie se sade is in die vleis (die mesokarp) ingebed.
Meeste bessies is klein, sappig en helder van kleur sodat hulle maklik deur voëls en ander diere raakgesien kan word. Plante wat bessies produseer maak hoofsaaklik op diere staat om die sade daarin te versprei. Sommige van die sade sal slegs ontkiem as dit deur 'n spysverteringstelsel gaan, waarna die saadhuid onder invloed van die verteringssap en mikrobiese inwerking vir water deurdringbaar word.
Mense gebruik hoofsaaklik groter bessies vir voedselproduksie. Die meeste wilde spesies dra kleiner bessies. Nie alle bessies is eetbaar nie en sommige daarvan is giftig vir mense.
Eksterne skakels
[wysig | wysig bron]Wikimedia Commons het meer media in die kategorie Bessie.
Wikiwoordeboek het 'n inskrywing vir bessie.