Metropolitana di Roma
Moltreinstelsel van Rome
Opening
10 Februarie 1955
Bedryf deur
ATAC
Totale lengte
59,4 kilometer
Spoorwydte
Standaardwydte van 1 435 mm
Elektrifisering
Oorhoofse kraglyne
Metropolitana di Roma (kort: Metro) is die amptelike naam van die Italiaanse hoofstad Rome se moltreinstelsel. Die stelsel bestaan tans uit drie lyne met standaardspoorwydte (A, B en C) waarvan twee - A en B - mekaar x-vormig in die middestad by die stasie Termini kruis. Die stasie San Giovanni is die kruispunt van die metrolyne A en C. Lyn C is sedert 2007 in aanbou en tans gedeeltelik in bedryf. Dit verbind 'n oostelike voorstad met die historiese sentrum. Oorspronklike planne het voorsiening gemaak vir 'n uitbreiding tot die Piazza Venezia en verder tot die noordwestelike stadsbuurte rondom die Vatikaanstad.
![](http://178.128.105.246/content-http-upload.wikimedia.org/wikipedia/af/thumb/8/84/Boubedrywighede_vir_die_nuwe_moltreinlyn_C_vlakby_die_Kolosseum.jpg/220px-Boubedrywighede_vir_die_nuwe_moltreinlyn_C_vlakby_die_Kolosseum.jpg)
Nadat die koste vir die projek handuit geruk het (onder meer deur die nodige stabilisering van historiese geboue langs die roete), is in Oktober 2019 besluit om lyn C tot 'n totale lengte van 20 km te beperk, waarby die kruispunt met lyn B na verwagting in 2023 geopen sal word. Twee ondergrondse boormasjiene is naby die Kapitool vir goed buite bedryf gestel en in 'n betonkamer begrawe.[1]
Die moltrein-netwerk, wat deur Rome se openbare vervoeronderneming ATAC bedryf word, dek net 'n gedeelte van die stadsgebied en word aangevul deur drie treinlyne wat die sentrum met die voorstede verbind, bus- en tremlyne (almal bedryf deur ATAC) en die sogenaamde FL-lyne (Italiaans: Ferrovie Laziali) van Italië se nasionale spoorwegmaatskappy Trenitalia.