Muswell Hill
Muswell Hill | |
---|---|
Voorstad | |
![]() Muswell Hill se Broadway | |
Koördinate: 51°35′31″N 0°08′35″W / 51.59194°N 0.14306°W | |
Land | ![]() |
Land | ![]() |
Graafskap | Groter Londen |
Borough | Haringey |
Tydsone | UTC±00:00 (MGT) |
• Somertyd | UTC+01:00 (BST) |
Poskode | N10 |
Skakelkodes | 020 |
Muswell Hill is 'n voorstad in die noorde van Londen wat grotendeels in die groen distrik London Borough of Haringey, sowat 9 kilometer noord van Charing Cross en 9 kilometer noord van die City of London, tussen die vermaakplek Alexandra Palace en Highgate Woods geleë is. Muswell Hill is op meer as 100 meter bo seevlak een van die hoogste punte in Groter Londen en staan vir sy skoon vars lug bekend. Alhoewel twee besige winkelstrate, Broadway en Fortis Green Road, deur die voorstad loop, het die buurt steeds sy landelike dorpskarakter bewaar.
Die meeste woonhuise in die gebied dateer uit die Edwardiaanse tydperk, met enkele Victoriaanse asook huise uit die 1920's en 1930's daartussen. Terwyl ook baie woonstelgeboue ontstaan het en groter woonhuise in woonstelle opgedeel is, het die groot vraag na ruim gesinshuise daartoe gelei dat ou huise tans weer in hul oorspronklike glorie as enkelgesinshuise herstel word. Groot dele van die gebied is vanweë sy voortreflike voorbeelde van Edwardiaanse boukuns tot bewaringsgebied verklaar.[1] So het ook die Edwardiaanse voorkoms van Broadway en Fortis Green Road bewaar gebly.
As gesogte voorstad lok Muswell Hill tans huiskopers uit die professionele middelklas wat onder meer in die kreatiewe of mediabedryf werksaam is. 'n Bekende vroeëre bewoner was Oliver Tambo wat dekades lank as ANC-leier gedien het. Tambo het tussen 1960 en 1990 'n Edwardiaanse huis met drie verdiepings bewoon wat ook as vergaderplek vir ANC-aktiviste gedien het. Gedurende sy staatsbesoek in die Verenigde Koninkryk het die Suid-Afrikaanse president Jacob Zuma in 2010 'n besoek aan die huis gebring. Dit is nog in dieselfde jaar deur die Suid-Afrikaanse regering vir ₤1,7 miljoen gekoop om as woning vir 'n senior personeellid van die Suid-Afrikaanse Hoë Kommissie in Londen te dien.[2]
Geskiedenis
[wysig | wysig bron]![](http://178.128.105.246/content-http-upload.wikimedia.org/wikipedia/commons/thumb/a/a2/Mus_h.jpg/200px-Mus_h.jpg)
Die vroegste geskrewe verwysings na Muswell Hill dateer van die 12de eeu. Die gebied was destyds in besit van die biskop van Londen en Lord of the Manor of Haringey ("Heer van die Haringey-landgoed") wat 65 akkers (263 000 m³) grond oos van Colney Hatch Lane aan 'n nuutgestigte nonneklooster, St Mary's Priory in Clerkenwell, geskenk het. Die nonne het daar 'n kapel opgerig en dit "Ons Dame van Muswell" genoem.
Die naam Muswell word teruggevoer op 'n natuurlike waterbron (Mossy Well in Engels) waaraan wonderdadige kragte toegeskryf is. 'n Tradisionele volksverhaal vertel van 'n Skotse koning wat van 'n siekte genees het nadat hy die water gedrink het. So het die gebied in die Middeleeue aantreklik geword vir pelgrims op soek na genesing.[3]
Die Moselle-rivier, wat in Muswell Hill en Highgate ontspring, het sy naam aan dié distrik te danke. Oorspronklik het dit bekend gestaan as Mosa of Mosella, aldus die twee naamvariante wat die Tottenhamse geskiedkundige Eerw. William Bedwell (1561-1632) in sy werk A Briefe Description of the Town of Tottenham Highcrosse in Middlesex (1631), die vroegste beskrywing van die rivier, gebruik het.
In die 18de eeu was Muswell Hill 'n klein nedersetting waar alleenstaande wonings met groot tuine oor 'n groter gebied verstrooi gelê het. In 1787 het 'n besoeker kommentaar gelewer oor die dorp en die uitsig wat hy as die mooiste binne 'n omtrek van 100 myl (160 kilometer) van Londen beskryf het. Muswell Hill het in die volgende halfeeu nouliks verander. Een van die merkwaardigste wonings in dié tyd was The Limes, 'n drieverdiepinghuis met 'n portiek (oorwelfde ingang) en tweeverdiepingvleuel wat by die hoek van Muswell Hill en Colney Hatch Lane gestaan het. Die indrukwekkende poort was wyd genoeg vir twee rytuie, terwyl die villa se groot erf tot by Tetherdown gestrek en 'n meer ingesluit het. Die dorp se vywer en die steengebou van die Green Man-kroeg was teenoor die woning geleë.
Vervoer
[wysig | wysig bron]![](http://178.128.105.246/content-http-upload.wikimedia.org/wikipedia/commons/thumb/8/87/107-123_Muswell_Hill_Road_%282%29.jpg/220px-107-123_Muswell_Hill_Road_%282%29.jpg)
Vanweë sy ligging bo-op 'n heuwel word Muswell Hill nie deur 'n moltreinlyn bedien nie. Daar is egter 'n aantal dubbeldek-busroetes wat die voorstad met nabygeleë stasies van London Underground verbind, soos Highgate, Bounds Green, East Finchley, Finsbury Park en Turnpike Lane, asook met spoorwegstasies naby Alexandra Palace en Hornsey. Transport for London se busroete 43, wat deur Metroline bedryf word, loop Sentraal-Londen toe en verbind Muswell Hill met Highgate, Highbury, Islington, Shoreditch, die City of London en London Bridge-stasie. Die rit bergop in 'n dubbeldekkerbus - in rigting Muswell Hill - is 'n besondere ervaring vir besoekers. Die rit bergaf bied 'n uitsig oor Londen se middestad en die wolkekrabber The Shard, waarby die fasade se kleurespel - afhangende van die weersomstandighede - steeds wissel.
Verwysings
[wysig | wysig bron]- ↑ Kinley Folkard & Hayward: Completely London. Where to live in London - Muswell Hill area guide
- ↑ The Telegraph, 12 Maart 2010: South African government buys ANC leader's Muswell Hill home
- ↑ Nick Barratt: Greater London. The Story of the Suburbs. Londen: Random House Books 2014, bl. 105
Eksterne skakels
[wysig | wysig bron]- Geskiedenis
- Media