Pitiese Spele
![](http://178.128.105.246/content-http-upload.wikimedia.org/wikipedia/commons/thumb/c/c5/Delphi_stadium_DSC06305.jpg/240px-Delphi_stadium_DSC06305.jpg)
![](http://178.128.105.246/content-http-upload.wikimedia.org/wikipedia/commons/thumb/b/b5/Delphi_stadium_starting_line_DSC06301.jpg/160px-Delphi_stadium_starting_line_DSC06301.jpg)
Die Pitiese Spele of Putiese Spele (Grieks: Πύθια Pythia), ook genoem die Delphiese Spele, is een van vier pan-Hellenistiese spele van Antieke Griekeland. Dit is elke vier jaar ter ere van Apollo gehou by sy heiligdom in Delphi.[1] Dit is twee jaar ná elke Olimpiese Spele gehou en tussen elke Nemeïese en Istmiese Spele. Die Pitiese Spele is iewers in die 6de eeu v.C. gestig en het kompetisies in kuns en dans gehad. Dit is volgens mites deur Apollo begin nadat hy die slang Piton doodgemaak en die Orakel van Delphi in plek gestel het. Later is sportnommers bygevoeg.
Die wenners het ’n lourierkrans van die stad Tempe in Thessalië gekry omdat die lourier vir Apollo heilig was. Kleiner weergawes van die spele is in baie ander stede van die Levant en Griekeland gehou.
Mitologie
[wysig | wysig bron]Die Pitiese Spele het glo begin met die mitiese slang Piton. Die slang is deur die jaloerse Hera gestuur om te keer dat die godin Leto die lewe skenk aan Artemis en Apollo, haar tweeling by Zeus. Apollo het wraak gesweer en belowe om Piton dood te maak. Intussen het Piton na Delphi gevlug en daar weggekruip. Apollo het hom daarheen gevolg en ná ’n woeste geveg doodgemaak. Nadat hy Piton begrawe het, het hy die tempel oorgeneem en die Delphiese orakel, die Pitia, in plek gestel. Hy het egter ’n misdaad gepleeg deur Piton dood te maak en Zeus het hom gebied om die Pitiese Spele te stig as ’n manier van boetedoening.[2]
Geskiedenis
[wysig | wysig bron]Die historiese Pitiese Spele het in 582 v.C. begin toe beheer daaroor aan die einde van die Eerste Heilige Oorlog aan ’n raad van 12 Griekse stamme oorgedra is. Daarna het dit nie meer elke agt jaar plaasgevind soos in die verlede nie, maar elke vier jaar, twee jaar voor en ná elke Olimpiese Spele.
In die begin is net musiekkompetisies gehou. Dit was ook op die kleiner feeste belangrik, maar mettertyd is gimnastiek en strydwarenne bygevoeg.
Voorbereidings het ses maande voor die tyd begin. Nege burgers van Delphi, wat die Theoroi genoem is, is na al die Griekse stede gestuur om die begin van die spele aan te kondig en atlete te lok, sowel as om die tydperk van die Heilige Wapenstilstand aan te kondig; die doel was om nie net die Theoroi en atlete te beskerm wat na Delphi gereis het nie, maar ook die tempel van Apollo. As ’n stad in dié tyd in ’n gewapende konflik betrokke was, is sy inwoners verbied om na die heiligdom te kom, aan die spele deel te neem of die orakel te raadpleeg. Terselfdertyd het die wapenstilstand die beheerraad in staat gestel om vir die spele voor te berei. Dit het ingesluit herstelwerk aan al die strukture van die heiligdom, van die tempels tot die strate en fonteine.
Ondanks die opkoms van die Christendom in die 4de eeu in die Romeinse Ryk, het Delphi ’n aktiewe heidense terrein gebly en die spele is tot minstens 424 n.C. gehou.[3]
Verwysings
[wysig | wysig bron]- ↑ Pythian Games, Encyclopædia Britannica.
- ↑ "Apollo's fight with the monstrous python". Greek-Gods.info. Geargiveer vanaf die oorspronklike op 10 Junie 2019. Besoek op 28 Oktober 2015.
- ↑ Gregory, Timothy E. (1991). "Delphi". Oxford Dictionary of Byzantium. Londen en New York: Oxford University Press. ISBN 978-0-19-504652-6.
Eksterne skakels
[wysig | wysig bron]- "Delphi: The Bellybutton of the Ancient World". 20:56 minutes in. Besoek op 24 April 2015.
{{cite news}}
: Cite has empty unknown parameters:|episodelink=
en|serieslink=
(hulp); Onbekende parameter|credits=
geïgnoreer (hulp); Onbekende parameter|network=
geïgnoreer (hulp) Wikimedia Commons het meer media in die kategorie Pitiese Spele.
Hierdie artikel is vertaal uit die Engelse Wikipedia