Rheingau
![](http://178.128.105.246/content-http-upload.wikimedia.org/wikipedia/commons/thumb/4/46/Nassau_Rheingaukreis.png/220px-Nassau_Rheingaukreis.png)
![](http://178.128.105.246/content-http-upload.wikimedia.org/wikipedia/commons/thumb/4/42/Assmannshausen_Hoellenberg.jpg/220px-Assmannshausen_Hoellenberg.jpg)
![](http://178.128.105.246/content-http-upload.wikimedia.org/wikipedia/commons/thumb/1/16/Beethoven_%26_L%27Europe_in_R%C3%BCdesheim_01.jpg/220px-Beethoven_%26_L%27Europe_in_R%C3%BCdesheim_01.jpg)
Die Rheingau (letterlik "Ryndistrik") is 'n kulturele landskap in die Duitse deelstaat Hesse, geleë aan die regteroewer van die Ryn. Dit strek tussen die nedersettings Walluf en Lorchhausen langs die rivier en, as golwende heuwelland, tot die hoofkam van die Taunus-bergreeks. Die Rheingau maak deel uit van die uitgestrekte Ryn-Mainvlakte en vorm die kerngebied van die gelyknamige wynboustreek. In administratiewe opsig maak dit deel uit van die distrik Rheingau-Taunus-Kreis.
Die Ryn, wat hoofsaaklik in noordelike rigting vloei, maak hier oor 'n afstand van 30 km 'n westelike draai tot by die bekende Binger Loch-rif. Die Rheingau se landskapsvorme word gevolglik deur suidelike hellings oorheers. Met 3 000 hektaar wingerde is die Rheingau een van die belangrikste wynboustreke in Duitsland wat veral met Riesling-witwyne verbind word. Wynbou het beslissende invloed op die kultuur en leefstyl van die Rheingau uitgeoefen. Wynfeeste, kastele, kloosters, wandelpaaie en die Rynlandskap maak van die Rheingau 'n eersterangse toeristelokpunt.[1]