Russian Hill
Russian Hill | |
---|---|
Stadsbuurt | |
Die woonstelblokke op Russian Hill bied 'n panoramiese uitsig oor die misbanke wat vanuit die Stille Oseaan oor San Franciscobaai kruip | |
Koördinate: 37°48′6″N 122°25′11″W / 37.80167°N 122.41972°W | |
Land | ![]() |
Deelstaat | ![]() |
Stad | ![]() |
Oppervlak | |
• Totaal | 1,03 km2 (0,397 vk. myl) |
Hoogte | 0,09 m (,3,4 ft) |
Bevolking | |
• Totaal | 13 146 |
• Digtheid | 13 000/km2 (33 000/vk. myl) |
Tydsone | UTCUTC -8 (Pasifiese tydsone) |
• Somertyd | UTC -7 (PDT) |
Poskode (ZIP code) | 94109, 94133 |
Skakelkodes | 415/628 |
Russian Hill is 'n welvarende en digbevolkte woonbuurt in die noorde van die Noord-Kaliforniese metropool San Francisco. Die kwartier is na een van San Francisco se 44 heuwels genoem, Russian Hill, wat onder die stad se oorspronklike "Sewe Heuwels" gereken word. Russian Hill bied panoramiese uitsigte oor die Bay Area, insluitende Bay Bridge, Marin County, die Golden Gate-brug en die historiese gevangeniseiland Alcatraz. Tussen Russian Hill en die teenoorliggende Telegraph Hill strek North Beach-vallei, een van die gewildste buurte in San Francisco wat sy besondere Mediterreense atmosfeer aan Italiaanse en Franse immigrante te danke het. North Beach was, soos sy naam reeds aandui, oorspronklik 'n kusgebied voordat hier in die 1870's 'n industriële landaanwinningsprojek verwesenlik is.
![](http://178.128.105.246/content-http-upload.wikimedia.org/wikipedia/commons/thumb/4/44/Russian_Hill.jpg/220px-Russian_Hill.jpg)
![](http://178.128.105.246/content-http-upload.wikimedia.org/wikipedia/commons/thumb/c/c6/Lombard_Street_San_Francisco.jpg/220px-Lombard_Street_San_Francisco.jpg)
Oorsprong van die heuwelnaam
[wysig | wysig bron]Die buurt en heuwelpiek se naam het sy oorsprong in die tyd van die Kaliforniese goudstormlope toe 'n Russiese begraafplaas deur setlaars ontdek is. Russiese vloot- en handelskepe het vanaf 1806 dwarsdeur die 19de eeu besoeke aan San Francisco gebring, en volgens historiese persberigte uit die 1860's en 1870's is bemanningslede van 'n Russiese oorlogskip, wat tydens 'n besoek aan San Francisco hier oorlede is, gedurende die eerste helfte van die 19de eeu op Russian Hill begrawe.[1]
Ander bronne vermeld dat Russiese robbe- of seeotterjagters uit Sitka in Alaska hier ter ruste gelê is wat in 1806 aan boord van 'n skip van graaf Nikolai Rezanov, 'n Russiese staatsman en een van die stigtingsvaders van die Russies-Amerikaanse Kompanjie, oorlede is.[2] In Kalifornië se Spaanse koloniale verlede is oorledenes, wat geen lidmate van die Rooms-Katolieke Kerk was nie, buite amptelike kerkhowe begrawe. So het vroeë Amerikaanse pioniers volgens oorlewering op Russies-Ortodokse grafkruise op die heuweltop afgekom. Die begraafplaas is uiteindelik verwyder, maar die heuwel se naam het onveranderd gebly.
Kuns en literatuur
[wysig | wysig bron]Gedurende die 1890's was Russian Hill danksy bekostigbare huurgelde (die steil hellings was voor die koms van motors of die beskikbaarheid van openbare vervoermiddels minder gewild by potensiële huurders en eienaars) en die panoramiese uitsigte oor San Francisco, wat as inspirasie kon dien, een van die gunstelingbuurte vir skrywers en kunstenaars. Net soos San Francisco se Franse en Italiaanse restaurante die gewildste eetplekke was waar 'n mens homself destyds kon ooreet aan 'n oordaad van die beste kosse teen lae pryse. Ook was die restaurante gewilde vergaderplekke vir San Francisco se literêre en kunstenaarskringe.
Russian Hill word onder meer verbind met 'n boheemse groep van kunstenaars en argitekte wat vir hulself die Franse naam «Les Jeunes» ("Die Jonges") gekies het en met The Lark hul eie klein literêre tydskrif gestig het.[3] Van die groep se bekendste lede was die argitek Willis Polk (1867−1924), 'n boorling van Jacksonville, Illinois wat ná die verwoestende aardbewing en brandramp van 1906 tot Daniel C. Burnham se Weskus-argitektepraktyk toegetree het, die beeldhouer Bruce Porter en die digter Gelett Burgess (1866−1951).
Burgess was een van die leidende persoonlikhede van San Francisco se literêre renaissance gedurende die 1890's wat bekendheid verwerf het met nonsensgedigte soos The Purple Cow. Atkinson House in 1032 Broadway, ontwerp in die Italianate villa-boustyl en opgerig in 1853 in opdrag van Joseph H. Atkinson, 'n kontrakteur en mede-eienaar van die Lone Mountain-begraafplaas, was die groep se vergaderplek - ‘n huis waar teen die middel van die 1860’s en in die laat 1870's beroemde gaste soos die skrywers Mark Twain en (in 1879/80) Robert Louis Stevenson onthaal is. «Les Jeunes» het hier byeengekom vir gemeenskaplike maaltye, geselsies en sangfeeste.[4]
'n Soortgelyke literêre salon het in die privaat huis van die digteres, skryweres, uitgeweres en bibliotekaresse Ina Coolbrith (1841−1928) vergader. Coolbrith, na wie as die Sweet Singer of California verwys is, was in 1915 Kalifornië se eerste Poet Laureate of amptelik prysbekroonde digteres - asook die eerste Poet Laureate van enige Amerikaanse deelstaat. Ina Coolbrith Park op Russian Hill is na haar genoem.[5] Gedurende haar loopbaan as bibliotekaresse, wat oor twee dekades gestrek het, het sy in die Oakland Free Public Library die leesbelangstelling van twee jong lesers gewek wat later beroemde persoonlikhede sou word - die skrywer Jack London en die danseres Isadora Duncan (1877–1927).
In 1952 het die skrywer Jack Kerouac en sy vriend Neal Cassady 'n tyd lank in Russian Hill gewoon. Kerouac het hier sy boek On the Road voltooi. Intussen het gentrifikasie sy tol geëis. Tans kan net 'n baie klein groep kunstenaars en skrywers eiendomme of huurwoonstelle in die buurt bekostig. Die villa's, privaat huise en woonstelle op Russian Hill word merendeels deur persone uit die hoër inkomstegroepe bewoon.
Verwysings
[wysig | wysig bron]- ↑ San Francisco History - SFgenealogy: Russian Hill Cemetery. Besoek op 3 Maart 2020
- ↑ Cemeterytravel.com: Cemetery of the Week #119: San Francisco's Russian Hill. Besoek op 3 Maart 2020
- ↑ NoeHill: National Register of Historic Places in San Francisco. National Register #87002289 Russian Hill - Vallejo Street Crest Historic District. Besoek op 2 Maart 2020
- ↑ Rand Richards: Historic Walks in San Francisco. 18 Trails Through the City's Past. Sesde hersiene druk. San Francisco: Heritage House Publishers 2008, bl. 355
- ↑ Poetry Foundation: Ina Coolbrith. Besoek op 3 Maart 2020
Eksterne skakels
[wysig | wysig bron]- Wiki-webtuistes
Wikimedia Commons het meer media in die kategorie Russian Hill.
- Media
- Besigtigingstoere
- Aardbewing en brandramp van 1906