To Kill a Mockingbird
To Kill a Mockingbird
| |
---|---|
Skrywer | Harper Lee |
Land | ![]() |
Taal | Engels |
Genre | Suidelik-goties, Bildungsroman |
Uitgewer | J. B. Lippincott & Co. |
Uitgegee | 11 Julie 1960 |
Bladsye | 281 |
To Kill a Mockingbird is 'n novelle deur Harper Lee wat in 1960 uitgegee is, en onmiddellik by die publiek aanklank gevind het. Dit het die Pulitzerprys ingepalm en 'n klassieke novelle van die moderne Amerikaanse literatuur geword. Die verknoping en karakters is breedweg gegrond op die outeur se waarnemings van haar familie en bure, benewens 'n gebeurtenis wat naby haar tuisdorp in 1936 plaasgevind het, toe sy 10 jaar oud was.
![](http://178.128.105.246/content-http-upload.wikimedia.org/wikipedia/commons/thumb/d/dd/Harper_Lee_Medal.jpg/220px-Harper_Lee_Medal.jpg)
![](http://178.128.105.246/content-http-upload.wikimedia.org/wikipedia/commons/thumb/c/ce/Atticus_and_Tom_Robinson_in_court.gif/220px-Atticus_and_Tom_Robinson_in_court.gif)
Die novelle is beroemd vir die warmte en humor daarin, ten spyte van die insluiting van die ernstige onderwerpe van verkragting en rasongelykheid. Die verteller se vader, Atticus Finch, was vir baie lesers die toonbeeld van 'n morele held en 'n voorbeeld van integriteit as advokaat. Een kritikus verklaar die novelle se impak deur te skryf, "In die twintigste eeu is To Kill a Mockingbird waarskynlik die mees alomgelese boek wat handel oor ras in Amerika, en die protagonis daarvan, Atticus Finch, die mees blywende fiktiewe voorbeeld van onwrikbaarheid in 'n rasdilemma."[1]
As 'n Suidelik-gotiese novelle en 'n Bildungsroman, behels die hooftemas van To Kill a Mockingbird ras-ongeregtigheid en die inboet van onskuld. Akademici het aangedui dat Lee ook die kwessies van klas, onbevreesdheid, meegevoel en geslagsrolle in die Amerikaanse Diep Suide aanspreek. Die boek word geredelik in skole van Engelstalige lande behandel met lesse wat toleransie beklemtoon en vooroordeel kondemneer. Die boek se temas ten spyt, was To Kill a Mockingbird onderworpe aan veldtogte om dit uit publieke klaskamers te verwyder, en is dikwels krities uitgesonder vir die ras-aanspreekvorme wat dit bevat. Akademici dui ook aan dat die nie-blanke karakters in die novelle nie ten volle ontwikkel word nie, en dat sekere swart lesers dit ambivalent ontvang, ten spyte van die dikwels diepgaande indruk wat dit by wit lesers wek.
Die novelle het met publikasie 'n wyduiteenlopende ontvangs te beurt geval. Literêre analise daarvan is beduidend skraps vergeleke met die getal kopieë wat verkoop is en die aanwending daarvan in opvoeding. Outeur Mary McDonough Murphy, wat 'n opgawe gemaak het van die indiwiduele uitsprake oor die boek deur verskeie outeurs en publieke persoonlikhede, noem To Kill a Mockingbird "’n verbasende fenomeen".[2] In 2006 het Britse bibliotekarisse die boek hoër as die Bybel aangeslaan as een wat "elke volwassene in hul leeftyd moet lees".[3] Dit is in 1962 in 'n Oscar-bekroonde film omskep deur regisseur Robert Mulligan, met 'n draaiboek deur Horton Foote. Sedert 1990 is 'n toneelstuk wat op die novelle gebaseer is jaarliks opgevoer in Harper Lee se tuisdorp Monroeville, Alabama. Tot op hede is dit Lee se enigste gepubliseerde novelle, en alhoewel sy haar wel uitspreek oor die boek se trefkrag, het sy sedert 1964 enige publisiteit vir haarself of die novelle geweier.
Verwysings
[wysig | wysig bron]- ↑ Crespino, Joseph (Somer 2000). "The Strange Career of Atticus Finch", in Southern Cultures 6 (2), bladsye 9–29.
- ↑ Zipp, Yvonne (7 Julie 2010). Scout, Atticus & Boo, The Christian Science Monitor. URL besoek op 10 Julie 2010.
- ↑ Pauli, Michelle (2 Maart 2006). Harper Lee tops librarians' must-read list, Guardian Unlimited. URL besoek op 13 Februarie 2008.