Dixieland-Dschääs
![](http://178.128.105.246/content-http-upload.wikimedia.org/wikipedia/commons/thumb/4/40/BrianOConnell05.jpg/220px-BrianOConnell05.jpg)
D Stiilrichdig vom Dixieland het sich in de 1910er-Joor us em New Orleans Jazz entwigglet, wo wissi Musiker brobiert häi, eso z spiile. Er het sich vo New Orleans us uf Chicago und Nöi York verbräitet.
Dr Stiil
[ändere | Quälltäxt bearbeite]Bim Dixieland-Dschääs het s vergliche mit em dradizionelle New Orleans Dschääs weniger Schlifdöön und expressivs Wibrato. D Melodie sin glatter und d Harmonie suuberer. Vom Aafang vo de 1930er Joor aa cha mä dr Dixieland-Dschääs nüme scharf vom New-Orleans-Dschääs underschäide. Im Lauf vo dr Zit häi d Musiker unabhängig vo iirer Hutfarb bäidi Stiilrichdige gspiilt. Dr Louis Armstrong zum Bischbil het mit sine All-Stars au Dixieland im Brogramm ghaa. Hüte git s drei Hauptströömige im Dixieland-Dschääs: Dr Chicago Style, dr West Coast Revival und dr New Orleans Traditional.
Die tüpischi Bsetzig von ere Dixielandformazioon bestoot us ere Melodiigrubbe mit Drumbeete oder Kornett, Klarinett und Posuune, und ere Rhütmusgrubbe us Schlaagzüüg, Klavier, Kontrabass bzw. Sousaphon oder Tuba und Bandscho oder Gitarre. Allgemäini Stiilmerkmol sin d Kollektivimprowisazioon, d Break, d Drumbeete as Leadinstrumänt und d Klarinette und Posuune, wo um d Melodii umespiile. D Melodie und d Improwisazioone si vilmol iigängig und künstlerisch im Allgemäine weniger ambizioniert.
E baar Dixieland-Musiker
[ändere | Quälltäxt bearbeite]- Dr Tony Almerico, Drumbeeter, het Dixieland läiv im Clear Channel WWL Radio z New Orleans gspiilt und in vile Downtown-Hotels.
- D Dukes of Dixieland, d Bänd vo dr Assunto-Familie in New Orleans. E Noochfolger-Bänd spiilt hüte no in New Orleans.
- Dr Eddie Condon, e Gitarrist und Bändliider, won e Chetti vo Nachtklub in Nöi York bedriibe und bekannti Radiosändige gha het. Noochfolger-Bänds häi bis in d 1970er gspiilt und iire Stiil wird no hüte gloost.
- Dr Turk Murphy, e Posuunespiiler und Bandliider bi Earthquake McGoons und andere Schaublätz in San Francisco vo de spoote 1940ern bis Ändi 1970er.
- Dr Al Hirt, ein Drombeeter mit ere Serii vo Top-40-Hits in de 1960er, isch bis er gstorbe isch Bandliider in New Orleans gsi.
- Dr Pete Fountain, Klarinettist, Liider vo Popbänd in New Orleans, hüte bangsioniert.
- Dr Kenny Ball us Ängland, het mit „Midnight in Moscow“ e Top-40-Hit in de früeje 1960er ghaa.
- Dr Jim Cullum junior, Kornettist us San Antonio (Texas). Isch zämme mit sim Vater sit 1963 Bandliider in San Antonio gsi. Hüte läitet er d Jim Cullum Jazz Band, wo mä scho lang in Amerika uf em Radio cha ghööre.
- Dr Tim Laughlin, Klarinettist, Schützling vom Pete Fountain, er het e baar bekannti Bänds in New Orleans gläitet und isch vilmol im Summer uf Tuur in Öiropa.
Hütigi Festiwal
[ändere | Quälltäxt bearbeite]- S «Internationale Dixieland Festival Dresden», s grösste Oldtime-Dschääsfestiwal in Öiropa, findet immer in dr zwäite Wuche im Mai statt. E halbi Million Bsuecher chömme wääred de 8 Dääg vom Festiwal zum bis zu 350 Musiker us dr ganze Wält cho zueloose.
- Chliiner isch s «Riverboat Jazz Festival» wo äinisch im Joor im dänische Silkeborg stattfindet.
- S grösste draditionelle Dschääsfestiwal in de USA isch s «Sacramento Jazz Jubilee». Es findet in Sacramento (Kalifornie) am Wuchenändi vom Memorial Day statt. Es het 100'000 Bsuecher und es spiile 150 Bänds us dr ganze Wält.
Litratuur
[ändere | Quälltäxt bearbeite]- Reimer von Essen: New Orleans. In: Joachim-Ernst Berendt (Hg.) Die Story des Jazz. Vom New Orleans zum Rock Jazz. Reinbek 1978 (1991), S. 17–38