Ludwig II. (Italien)
![](http://178.128.105.246/content-http-upload.wikimedia.org/wikipedia/commons/thumb/d/dd/Emperor_Louis_II_before_Bari.jpg/220px-Emperor_Louis_II_before_Bari.jpg)
Dr Ludwig II. (* 825; † 12. August 875 bi Brescia) isch (Titular-)König vo Italie vo 839/840 aa gsi, König vo de Langobarde sit 844, römische Mitkaiser sit 850 und Kaiser sit 855.
Läbe
[ändere | Quälltäxt bearbeite]Dr Ludwig II. isch dr eltist Sohn vom Kaiser Lothar I. und siiner Frau, dr Irmingard vo Tours, gsi. Si Vater het en 839/840 zum König vo Italie iigsetzt. Dr Papst Sergius II. het en am 15. Juni 844 zum König vo de Langobarde krönt und dr Papst Leo IV. am 6. April 850 zum römische (Mit-)Kaiser.
Wo si Vater 855 abdankt het, het er vo däm siim Riich Italie übercho. S römische Kaisertum isch under ihm zum ene blosse Ditel worde und er het uf jedi Oberhoheit über die andere fränkische Königriich müesse verzichte. Z Italie hain em muslimischi Araber (Sarazene) dr Süde vo siim Riich ewäggnoh, so z. B. Benevent, wo im Johr 841 gstürmt worden isch. Wo d Sarazene ihri verheerende Raubzüg bis zu de Chlöster Monte Cassino und San Vincenzo am Volturno usdehnt hai, hai d Äbt vo dene Chlöster dr Ludwig II. um Hilf bittet. Dä het 851/52 e Fäldzug undernoh, het aber Bari nit chönne zruggerobere. D Herzög vo Benevent und d Chlöster hai sich mit Tribut vo Plündrige müesse freichaufe. In de Johr 866 bis 871 isch dr Kaiser die ganz Ziit in Süditalie gsi. Won er 871 Bari, wo vom ene sarazenische Emir verdeidigt worden isch, zruggeroberet het, het er Hilf von ere byzantinische Flotte gha.
S Bündnis mit em byzantinische Kaiserriich isch zwar erfolgriich gsi und het zur Eroberig vo Bari und zur Verdriibig vo de Sarazene gfüehrt, aber die beide Kaiser hai sich denn wäge dr Frog, wele dr Vorrang heb, verstritte. E Brief vom Ludwig an dr byzantinisch Kaiser Basileios I. erklärt die nöchere Umständ: Dr Basileios het im Ludwig nit welle dr Ditel vom ene Imperator Augustus lo. Dr byzantinisch Kaiser het sogar behauptet, ass em Karl em Grossi d Kaiserwürde nit zuegstande siig [1].
Wo dr jüngst Brueder, dr Karl vo dr Provence 863 ohni Chinder gstorben isch, hai dr Ludwig und dr Lothar II. s Burgund ufdeilt. 864 isch dr Ludwig sogar noch Rom zoge, für zum dr Papst Nikolaus I. drzue z bringe, ass er im Lothar im Händel mit siiner Frau wurd hälfe. Wo aber 869 au dr Lothar ohni Erbe gstorbe isch, het s dr Ludwig nit verhinderet, ass däm si Bsitz an ihri Unggle Karl dr Kahl (Westfrankeriich) und Ludwig dr Dütsch (Ostfrankeriich) gfallen isch.
Er het us Rach en erfolglose Zug gege Benevent gmacht und isch druf, won er wider in Oberitalie gsi isch, am 12. August 875 bi Brescia gstorbe. Wil er mit siner Frau Engelberga nume zwei Döchter gha het, isch dr italiänisch Zwiig vo de Karolinger usgstorbe mit ihm, und s Kaiserdum isch an dr Karl dr Kahli gange.
Chinder
[ändere | Quälltäxt bearbeite]- Gisla (* wohrschiinlig 852/855, † vor 28. April 868), Äbtissin vo San Salvatore z Brescia
- d Ermengarde (* wohrschiinlig 852/855, † 896), ∞ März/Juni 876 Boso vo Vienne († 887), König vo Niiderburgund (Buvinide)
Literatur
[ändere | Quälltäxt bearbeite]- Herbert Hees: Studien zur Geschichte Kaiser Ludwigs II., Regensburg 1973.
- Engelbert Mühlbacher: Kaiser Ludwig II.. In: Allgemeine Deutsche Biographie (ADB). Band 19, Duncker & Humblot, Leipzig 1884, S. 406–417.
- Pierre Riché: Die Karolinger. Eine Familie formt Europa. 2003 Patmos Verlag GmbH & Co. KG, Albatros Verlag, Düsseldorf, ISBN 3-491-96096-7.
- Konrad Wanner: Die Urkunden Ludwigs II., Monumenta Germaniae Historica, München 1994, ISBN 3-88612-032-5.
- Herbert Zielinski: Ludwig II. von Italien. In: Neue Deutsche Biographie (NDB). Band 15, Duncker & Humblot, Berlin 1987, ISBN 3-428-00196-6, S. 323–327.
Weblingg
[ändere | Quälltäxt bearbeite]![](http://178.128.105.246/content-http-upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
Fuessnote
[ändere | Quälltäxt bearbeite]- ↑ Lilie, R.-J., Byzanz. Das zweite Rom. (Berlin 2003) 214.
Vorgänger | Amt | Nochfolger |
Lothar I. | König vo Italie/Langobarderiich 844–875 |
Karl der Kahle |
Römische Kaiser 855–875 |
Karl dr Kahli |
![]() |
Dä Artikel basiert uff ere fräie Übersetzig vum Artikel „Ludwig_II._(Italien)“ vu de dütsche Wikipedia. E Liste vu de Autore un Versione isch do z finde. |