Maggenau
Dialäkt: Ùndertòggeborg |
S Chloster Maggenau isch e Frauechloster i de toggeburger Gmaind Tegersche inere usgsproche liebliche Landschaft.
Name
[ändere | Quälltäxt bearbeite]Im Tielekt haisst de Ort Maggenòu (IPA: [ˈmakːənɔu̯]; 1244: Magginouwe). Wel de Name im Johr 804 as in curte Magaduninsi agee isch, vermuetet mer, ass er us gall. *Magadunum "Feldburg" chunt. Allerdings isch da Gebiet vor de alemanische Landnahm kum besidlet gsii. Abem 19. Jh. erschint uf Landcharte de Name Magdenau, as en Aspilig uf s Nonechloster.
Gschicht
[ändere | Quälltäxt bearbeite]Im Johr 804 het de Morand sini Güeter bi Maggenau em Chlooster Sanggale vermacht. Doch erscht im Johr 1244 hend die Edle Giel vo Glattburg uf aigni Chöste e Frauechloster zugunste vo de Begine im Brüel z Sanggale gstiftet und dem Konvent St. Verena-Chile, d Burg Helfeberg, vier benochburti Buurehöf und meriri Äcker gschenkt. Da Chloster isch denn 1278 vom Bischof vo Konstanz igwiicht worde. De Konvent het sich zu aim vode riichste Frauechlöster i de Ostschwiz entwicklet. 1385 isch s Chloster abebrennt und noi ufbaut wore.
S Chloster und d None sind währed de Uurueh vo de Reformatio immer wider belästigt wore und 1529 hend bewaffniti Lüt grosse Schade agrichtet und schliessli an Ostere die wehrlose None öberfale. S Chloster isch ufglöst und sini Güeter ighaimst wore. Doch 1532 het d Äbtissi Afra Schenk tatchräftig d Widereröffnig vom Chloster in Agriff gnoo und d Maggenau het e nöiji Blüetizit erlebt. Im Joor 1615 isch e früebarocki Chile (1953 dur en Neubau ersetzt) baut wore. Gli drufabe sind im Gästehuus 53 Spruchbilder gmolet wore. Im Zwölferchrieg hend d Zörcher de Abtai arg zuetue und die französisch Revolutio het s Chloster o nume mit Ach und Chrach öberlebt. Doch scho 1798 isch vo de Zisterzienserinne aini vode ältiste Schuele im Kantoo Sanggale gründet wore. Im Johr 1975 hend 38 None im Konvent glebt, hüt sind s 16 Schwöstere.
Kulturguet
[ändere | Quälltäxt bearbeite]S Chloster Maggenau und di ehemolig Pfarrcherche vo Maggenau und Wolfertschwil, d Verena-Kapälle stönd uf de Lischte vo de Kulturgüeter, wo vo nazionaler Bedütig sind.
Literatur
[ändere | Quälltäxt bearbeite]- Bernhard Anderes und Hans Peter Mathis: Das Zisterzienserinnenkloster Magdenau. (Schweizerische Kunstführer, Band 731, Serie 74). Hrsg. Gesellschaft für Schweizerische Kunstgeschichte GSK. Bern 2003, ISBN 3-85782-731-9.
Weblink
[ändere | Quälltäxt bearbeite]![](http://178.128.105.246/content-http-upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
- Chloster Maggenau
- Franz Xaver Bischof: Magdenau. In: Historisches Lexikon vo dr Schwiiz.
- Iitrag zu Magdenau uf ORDEN online