Manuel I. Komnenos
Manuel I. (Byzanz) | |
---|---|
Kaiser vom Byzantinische Riich | |
![]() | |
Regierigsziit | 5. April 1143 – 24. Septämber 1180 |
Uf d Wält cho | 28. Januar 1118 |
Gstorbe | 24. Septämber 1180 (im Alter vo 62) |
Vorgänger | Johannes II. |
Nochfolger | Alexios II. |
Verhürotet mit | Bertha vo Sulzbach Maria vo Antiochia |
Dr Manuel I. Komnenos (middelgriech. Μανουὴλ Α' Κομνηνός, * 28. Novämber 1118; † 24. Septämber 1180) isch vo 1143 bis 1180 dr byzantinisch Kaiser gsi. Er gältet as äine vo de letschte bedütende Herrscher vo Byzanz.
Lääbe
[ändere | Quälltäxt bearbeite]Dr Kaiser Johannes II. het churz vor sim Dood 1143 sim jüngste Soon Manuel d Chroone sälber uf e Chopf gsetzt und het denn sini Generääl lo schwööre, d Droonfolg z anerkenne.[1]
Die byzantinischi Bolitik gegenüber Öiropa
[ändere | Quälltäxt bearbeite]Dr Manuel het uf em Balkan energisch iigriffe und het Chläiasie zerst eender e chli vernoochläässigt. Noch eme Fäldzug in de Joor 1149–1150 het er Serbie under d Chnutte überchoo. Im Strit um Dalmazie und Kroazie häi d Ungare 1167 d Schlacht bi Sirmium gege d Byzantiner und d Raszier, wo mit ene verbündet gsi si, verloore. Mit däm isch die ganzi westligi Balkanhalbinsle byzantinisch worde. Denn het dr Manuel I. d Donaugränze afo befestige. Dr Kaiser het gueti Bezieige zu de Staufer ghaa, bsundrigs zum Konrad III., won er wäärend em Zwäite Chrüzzuug kennegleert het und 1148 z Thessaloniki e Bündnis abgschlosse het. Das isch gege d Normanne in Underitalie grichdet gsi, und dr Manuel het sä vo 1147 aa in meerere Gfächt bekämpft. Noch em Dood vom Konrad si d Bezieige schlächter worde, wo d Byzantiner z Ancona glandet si, was im römisch-dütsche Kaiser Friedrich I. nid grad gfalle het. 1158 het dr Manuel sini Drubbe zruggzooge und sich denn mit em normannische Sizilie gegen e Friedrich verbündet und au die oberitaliänische Stedt in iirem Kampf gegen e Barbarossa understützt het. Dr Manuel het s denn e Zitli lang mit em Babst ghalte, und denn wider mit em Barbarossa, aber nüt isch vo däm uusechoo.
Die byzantinischi Bolitik im Oste
[ändere | Quälltäxt bearbeite]Drfür isch s em denn im Oste umso besser gloffe. Er het Kilikie gwunne. Denn isch noch eme Komflikt mit em Chrüzfaarerstaat Antiochia s Fürstedum Antiochia e byzantinischs Lääche worde. Dr General Johannes Axuch isch gege d Türke erfolgriich gsi. Dr Iifluss vo Venedig, wo immer sterker worde isch, hätt e Bündnis mit Genua und Pisa sötte iischränke. Dr Manuel het die byzantinischi Posizioon in Anatolie sterker gmacht, het denn aber 1176 d Schlacht vo Myriokephalon gege d Türke verloore und mit ere Chäiasie.
Litratuur
[ändere | Quälltäxt bearbeite]- Ferdinand Chalandon: Les Comnènes. Bd. 2, Paris 1912.
- Ralph-Johannes Lilie: Byzanz – Das zweite Rom. Berlin 2003, S. 387ff.
- Paul Magdalino: The Empire of Manuel I Komnenos, 1143–1180. Cambridge 2002 (Nachdruck von 1993).
Weblingg
[ändere | Quälltäxt bearbeite]![](http://178.128.105.246/content-http-upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
- Andrew Stone: Fachwüsseschaftligi Churzbiografii uf Änglisch us De Imperatoribus Romanis (inkl. Liddratuuraagoobe).
Fuessnoote
[ändere | Quälltäxt bearbeite]- ↑ Steven Runciman, Geschichte der Kreuzzüge, Übersetzung von Peter de Mendelssohn, Deutscher Taschenbuchverlag, München, 2. Auflage 1997, S. 528.
Vorgänger Johannes II. |
Kaiser vo Byzanz 1143–1180 |
Nochfolger Alexios II. |
![]() |
Dä Artikel basiert uff ere fräie Übersetzig vum Artikel „Manuel_I._(Byzanz)“ vu de dütsche Wikipedia. E Liste vu de Autore un Versione isch do z finde. |