Poseidon
![](http://178.128.105.246/content-http-upload.wikimedia.org/wikipedia/commons/thumb/b/b4/0036MAN_Poseidon.jpg/220px-0036MAN_Poseidon.jpg)
Dr Poseidon (altgriech. Ποσειδῶν, Poseidōn) isch ä Gott us dr griechische Mythologii. Er isch dr Gott vom Wasser im allgemeine und vom Meer im bsundrige gsi, muess aber vom Gott Pontos underschiide wärde, wo s Meer personifiziert het. Si Frau isch d Amphitrite gsi, ä Dochder vom Meergott Nereus. D Römer hai em Poseidon in siiner Rolle as Meergott Neptunus gsait.
Dr Poseidon isch ä Sohn vom Titan Kronos, em Herrscher vo dr Wält, und däm siiner Schwöschder Rhea gsi. Siini Brüeder si dr Zeus und dr Hades. Nochdäm dr Zeus dr Kronos enthront het, hai die drei Brüeder d Wält under sich ufdeilt. Dr Poseidon isch Herrscher über s Wasser worde. Si Waffe isch dr Dreischbitz, villicht urschbrünglig ä Harpune für zum fische.
Im Poseidon isch s Ross heilig gsi. Vili Glehrti dängge, ass er vo de erschte Hellene noch Griecheland brocht worden isch und die au d Ross dört iigfüehrt hai. Mit em gflüglete Monschder Medusa, einer vo de Gorgone het er dr Pegasos, s Ross mit Flügel, zügt. Er isch au dr Vater vom Pelias und Neleus gsi und isch dur da dr Schdammvater vo de königliche Familie vo Thessalie und Messenie betrachtet worde. Die meischde vo siine Nochkomme si aber Riise gsi, wie dr Orion, dr Antaios und dr Zyklop Polyphem, wo wild gsi si wie ihre Vater. Dr Poseidon isch au nochdrägend gsi. So het er es Meerunghür gege Troja gschickt und d Grieche in ihrem Kampf gege die Schdadt underschdützt, wil dr trojanisch König Laomedon, ihm und em Apollo nit zahlt het für d Schdadtmuure, wo s em baut hai.
As Meergott isch dr Poseidon vor allem in Schdedt an dr Küschte verehrt worde, aber au Inland het er Tämpel gha, wil er au dr Gott vo de Ärdbebe gsi und mit Quelle verbunde worden isch. Er isch bsundrigs uf Attika verehrt worde, z Kolonnus as Hippios, wo „Dä vo de Ross“ bedütet. D Athener aber hai d Athene ihm as Schdadtgottheit vorzoge.
Siis wichdigschde Feschd si d Isthmia gsi, wo athletischi Wettbewerb duuregfüehrt worde si ihm zu Ehre. Es isch alli zwei Johr in dr Nöchi vom Isthmus vo Korinth gfiirt worde.
Literatur
[ändere | Quälltäxt bearbeite]- Edward Tripp: Reclams Lexikon der antiken Mythologie. Stueggert, 1991. ISBN 3-15-010371-1
- Balbina Bäbler: Poseidon. In: Der Neue Pauly (DNP). Band 10, Metzler, Stuttgart 2001, ISBN 3-476-01480-0, Sp. 202–206.