Ramana Maharshi
![](http://178.128.105.246/content-http-upload.wikimedia.org/wikipedia/commons/thumb/e/e0/Ramana_3_sw.jpg/220px-Ramana_3_sw.jpg)
De Ramana Maharschi (skt, रमण महर्षी, Ramaṇa Maharṣī, Geburtsname Venkataraman Iyer; * 30. Dezember 1879 z Tiruchuli, Tamil Nadu, Indie; † 14. April 1950 z Tiruvannamalai, Tamil Nadu) isch en indische Asket, Mystiker und Hailige gsii. Er isch ann vo de bikanntiste indische Waise vom 20. Joordhundert.
Lebe
[ändere | Quälltäxt bearbeite]De Ramana isch em 30. Dezember 1879 z Tiruchuli im indische Staat Tamil Nadu uf d Welt choo und het de Name Venkataraman öberchoo. Noch em Tod vo sim Vatter isch er z Madurai vomene Onkel uufzoge wore und er het d American Mission High School bsuecht. Mit sibzeeni het en zunderainisch e Todesangst öberfale und er het sich wiene Liich uf de Bode glait und de Schnuuf aaghalte. Debi isch er zu de Erchenntnis choo, as er de unsterblich Gaist sai, wo de Körper öberstiigi. Drufabe het er sis Studium uufggee und vill meditiert und vill Zitt im Tempel vo de Göttin Minakshi („Fischaug“) verbroocht. Noch sechs Wuche het er sini Famili verloo und isch uf Tiruvannamalai, emene hailige Ort z Tamil Nadu ggange.
Z Tiruvannamalai het er vo sinene Chlaider e Stoffstraife abgrisse und as Lendeschurz um d Hüft bbunde und isch zumene Sadhu (Bettelmönch) wore. Er het denn ufem hailige Berg Arunacala („Morgerootberg“), wo grad bi de Stadt Tiruvannamalai litt, as Asket glebt. Em Aafang het er wie abwesend gwürkt und anderi Lütt hend för en glueget. Um i Rue z meditiere het er sich hüüfig i Hööline und Tempel zruggzoge, denn immer mee Mensche sind choo, um en z gsee und hüüfig hend sini engste Aahänger müese e Haag umen baue, um en vo de vile Vereerer z bschütze, won en hend wöle treffe, denn, obwoll er fast nünt gredt het, het er e starchi Uustraalig uf d Mensche uusgüebt. De unbikannti Hailigi vom Berg Arunacala het denn de Name Ramana Maharschi öberchoo, wobi Maharschi „Grosse Waise“ bidüütet.
Noch e paar Joore het sini Muetter en entdeckt und isch bald drufabe ebefalls e Aahängeri vonem wore. Er het sich denn afange mee sinene Aahänger z widme und s isch en Aschram ggründet wore, demit di vile Aahänger und Vereerer hend chöne versorgt were. De Ramana Maharschi het afange religiöösi Schrifte studiere und Gsprööch füere. Er het selber nu wenig Schrifte useggee, s maist wo vonem veröffetlicht woren isch, sind Uufzaichnige vo sinene Gsprööch. Sini grossi Waishait het immer mee Mensche aazoge und s sind au immer me wichtigi Persone und au Mensche usem Weste en go uufsueche, drunter au Arthur Osborne, wo sin Biograaf woren isch.
Ab 1949 hend sich a sim lingge Arm afange Tumor bilde und er isch immer schwächer wore, het aber medizinischi Hilf abgleent. Em 14. April 1950 isch er z Tiruvannamalai gstorbe. Er het de Ort und de Berg Arunacala sit sinere Aachumpft nie verloo ghaa.
Büecher
[ändere | Quälltäxt bearbeite]- Ramana Maharshi: Die Botschaft des Ramana Maharshi, Lüchow, ISBN 3-363-03023-1
- Ramana Maharshi: Geistige Unterweisung, Drei Eichen Verlag, ISBN 978-3-7699-0572-4
- Ramana Maharshi: Über das Selbst, Drei Eichen Verlag, ISBN 978-3-7699-0569-4
- Ramana Maharshi: Gespräche des Weisen vom Berge Arunachala, Ludwig, ISBN 3-7787-8189-8
- Ramana Maharshi: Nan Yar? Wer bin ich?, Kamphausen, ISBN 3-936718-00-8
- Ramana Maharshi: Die Quintessenz der spirituellen Unterweisung (Upadesa Saram), BoD,2007, ISBN 978-3-8370-0760-2
- Ramana Maharshi: Sei, was du bist!, O.W.Barth, ISBN 3-502-62505-0
- Ebert, Gabriele: Ramana Maharshi. Sein Leben, Lüchow 2003, ISBN 3-363-03029-0
- Ebert, Gabriele: Ramana Maharshi und seine Schüler: Band 1, BoD 2006, ISBN 978-3-8334-6082-1
- Gabriele Ebert: Ramana Maharshi. In: Biographisch-Bibliographisches Kirchenlexikon (BBKL). Band 26, Nordhausen 2006, ISBN 3-88309-354-8, Sp. 1205-1223.
- Osborne, Arthur: Ramana Maharshi und der Weg der Selbsterkenntnis, O.W. Barth.
- T.K. Sundaresa Iyer: Mein Leben mit Ramana Maharshi, BoD 2007, ISBN 978-3-8370-0631-5
- Zimmer, Heinrich: Der Weg zum Selbst. Lehre und Leben des Shri Ramana Maharshi, Diederichs Gelbe Reihe, Bd.7, ISBN 978-3-424-00507-3
Weblink
[ändere | Quälltäxt bearbeite]![](http://178.128.105.246/content-http-upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)