Antibiotico
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
![](http://178.128.105.246/content-http-upload.wikimedia.org/wikipedia/commons/thumb/e/e8/Doxycycline_100mg_capsules.jpg/220px-Doxycycline_100mg_capsules.jpg)
Un antibiotico ye una substancia quimica capaz, a baixas concentracions, d'inhibir o creiximiento d'atros microorganismos u d'eliminar-los. Por un regular, os antibioticos actuan sobre eubacterias, y belluns tamién sobre rickettsias y sobre ciertos virus de gran mida, u encluso sobre celulas d'individuos pluricelulars, animals u vechetals, prevocando alteracions u d'a paret celular, u d'a membrana protoplasmatica, u d'a sintesi proteica, u d'o metabolismo d'os acidos nucleicos, etc.
Os antibioticos resultan mas u menos toxicos ta las celulas humanas u d'organismos superiors. Ista toxicidat oscila entre valors altismas (actinomicina) y valors infimas (penicilina). Os antibioticos de toxicidat baixa, y encluso os de toxicidat meyana, pueden estar emplegatos en a terapeutica de muitas malautías causatas por microorganismos (eubacterias mas que mas). Manimenos en cada caso cal tener present o marguin de toxicidat, y veyer dica que punto as ventachas conseguitas con o tractamiento a base d'antibioticos compensan u superan as alteracions producidas por istos.
Muit a sobén, y adintro d'uns limites razonables, o balance ye positivo a fabor d'os antibioticos. Se parla d'antibioticos con acción bacteriostatica si se limitan a inhibir o creiximiento d'as eubacterias, u bactericida, si gosan destruir-las. Manimenos en realidat, que l'acción sía eubacteriostatica u eubactericida pende a sobén mas d'a dosi que no pas de l'antibiotico emplegato. Seguntes a eficacia d'un antibiotico debant de diversos microorganismos, se li puet atribuir un espectro d'acción mas u menos amplo.
Os antibioticos, evidentment, han revolucionato a terapeutica d'un gran numero de malautías. Se puet decir que totas as malautías d'etiolochía eubacteriana son enclusas aintro d'as posibilidaz terapeuticas d'un antibiotico u altro, y nomás bellunas d'orichen virico u funguico en son de tot indiferents.
A medicina y a veterinaria consumen a mayor parti d'os antibioticos que actualment son producius. Os primers antibioticos emplegatos yeran producius por microorganismos como resulto d'una biosintesi especifica. Hue a mayoría d'os antibioticos son producto de sintesi y, constantment, se'n obtienen nuevos con a finalidat de conseguir un efecto antinfeccioso mas eficaz y ta mirar d'eliminar a lo maximo os efectos segundarios y toxicos.