Metamorfismo
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
![](http://178.128.105.246/content-http-upload.wikimedia.org/wikipedia/commons/thumb/6/60/Gneiss.jpg/200px-Gneiss.jpg)
O metamorfismo ye o conchunto de procesos cheolochicos de transformación mineral y escructural d'una roca en estato solido como respuesta a condicions fisicas diferents d'as que bi habió en l'inte de formación suya.
Por definición o concepto de metamorfismo excluye os procesos de fusión y disolución, y si existen son secundarios. O metamorfismo ye un proceso en o que cambía a composición mineral pero no cambía a composición quimica: ye un proceso isoquimico en o que os mesmos elementos s'ordenan en diferents rez cristalins u diferents especies minerals. Manimenos os fluidos d'as rocas sedimentarias como l'augua y o dioxido de carbonio pueden escapar en una fase fluida.
Os achents que causan o cambio mineral u estructural son a presión y a temperatura. A presión puet ser una presión adrezata, que se suma a la presión litostatica. A temperatura puet relacionar-se con una actividat magmatica, que se suma a lo gradient cheotermico.
D'esta traza o soterramiento influye en a presión (por o peso d'os materials que bi ha dencima que fan augmentar a presión litostatica y por o gradient cheotermico), influindo en a presión tamién l'actividat orochenica, y en a temperatura tamién l'actividat magmatica. Dende l'inte que a teoría d'a tectonica de placas ha puesto explicar os procesos d'orochenesi, de magmatismo, y a subsidencia de bellas cuencas sedimentarias, tamién ha puesto explicar o metamorfismo con diferents modelos d'ambients metamorficos en o marco de beluns d'os contactos entre placas.
S'ha definito diferents tipos de metamorfismo. Os tipos basicos que figuran en totas as clasificacions son o metamorfismo de contacto y o metamorfismo rechional. A tectonica de placas explica a distribución de cualques tipos de metamorfismo. Bi ha un metamorfismo rechional en orochens de subducción, un metamorfismo rechional en orochens de colisión, un metamorfismo de fondón oceanico, y atros tipos de metamorfismo mes local que se relacionan con estructuras que pueden estar condicionada por o movimiento d'as placas litosfericas (metamorfismo de soterramiento, dinamometamorfismo, metamorfismo de contacto, metamorfismo hidrotermal).[1]
O metamorfismo no conduce siempre a la formación de rocas metamorficas. Bi ha rocas sedimentarias sozmesas a metamorfismo de grau baixo en as que no s'han formato minerals petrocheneticos definidors d'un ambient metamorfico y que no pueden considerar-sen metamorficas encara que tiengan estructuras de metamorfismo como a esquistosidat. Por o contrario, un intenso metamorfismo conduce a la fusión (anatexia), y formación de magmas que dimpués d'una lenta cristalización formarán rocas nuevas clasificables como plutonicas ("ultrametamorfismo").
Referencias
[editar | modificar o codigo]- ↑ (es) Francisco Anguita Virella, Fernando Moreno Serrano: Procesos Geológicos Internos. Editorial Rueda. Madrit 1991
Bibliografía
[editar | modificar o codigo]- (es) Francisco Anguita Virella, Fernando Moreno Serrano: Procesos Geológicos Internos. Editorial Rueda. Madrit 1991