Sarah Bernhardt
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Sarah Bernhardt | |
---|---|
![]() Sarah Bernhardt en 1880, en una fotografía de Napoleon Sarony. | |
Información personal | |
Calendata de naixencia | 22 d'octubre de 1844 |
Puesto de naixencia | ![]() |
Calendata de muerte | 23 de marzo de 1923 |
Puesto de muerte | ![]() |
Conchuche | Aristides Damala (1882-1889) |
Fillos | Maurice Bernhardt |
Henriette Rosine Bernard, conoixita como Sarah Bernhardt, naixita de París o 22 d'octubre de 1844 y muerta en París o 23 de marzo de 1923 (fue apedacata en o fosal d'o Père-Lachaise), estió una actriz teatral francesa, que ye considerata como a mayor actriz d'o sieglo XIX[1] u mesmo d'a historia,[2] clamata a voz d'oro u a divina. Recibió a Lechión d'Honor en atención a las suyas condicions artisticas, en 1914.[3] Tamién estió actriz en os primers anyos d'o cine mudo dica a suya muerte, actuando en bellas cintas d'o cine francés.
Os suyos oríchens
[editar | modificar o codigo]Sarah Bernhardt yera naixita de París o 22 d'octubre de 1844 (encara que ixa calendata no ye pas segura), en a carrera École de Médecine. Yera filla de Julie Bernardt, una muller neerlandesa d'orichen chodigo que perteneixeba a una familia de comerciants (su güelo, Moritz Bernardt, yera un mercader chodigo d'Amsterdam). Su pai ye desconoixito, por tanto a suya mai s'adedicaba a la prostitución como cortesana de luxo chunto con a suya chirmana Rosina Bernardt; Sarah daba siempre como o nombre de su pai y o d'Édouard Bernardt, chirmano d'a suya mai. Sarah tenió mas chirmanas: dos chemelas que morioron de ninas, amás de Jeanne y Régine, que morió de tuberculosi en 1873, estando totas fillas de pai desconoixito. Fisicament, Sarah yera royenca de pelo y de güellos azuls.
A suya infancia
[editar | modificar o codigo]![](http://178.128.105.246/content-http-upload.wikimedia.org/wikipedia/commons/thumb/2/23/Sarah_Bernhardt_by_F%C3%A9lix_Nadar_2.jpg/250px-Sarah_Bernhardt_by_F%C3%A9lix_Nadar_2.jpg)
Sarah vivió as suyas primeras anyadas en Bretanya, a on l'educó una muller, por o que a primera luenga que Sarah conoixió y charró estió o bretón (ye por ixo que, cuan prencipió a suya carrera teatral, adoptó a versión bretonizata d'o suyo apellito, Bernhardt). Mientres yera en Bretanya, tenió un accident (una cayita), trencando-se o chenullo dreito. Encara que a ferita sanó sin dengún problema, aparentment, ixe chenullo estió dimpués una fuent de problemas dica que en 1914, luego d'una fuerte inflamación, li amputoron a garra dreita.
Luego de l'accident, a suya mai la levó a vivir en a suya casa en París, a on encara vivió dos anyadas. A l'edat de 7 anyadas, ingresó en l'Instituto Fressard, una instutición ta l'educación de senyoritas a man d'Auteuil a on vivió tamién dos anyadas. En 1853 ingresó en o colechio Grandchamp, amán de Versailles, dirichito por monchas, a on fació a primera interpretación en o teatro d'a suya carrera en una obra teatral que heba escrito una d'as monchas d'o colechio. A mas, fue baptizata (cuan teneba asinas 12 anyadas), y ye fácil que o propio ambiente relichioso propio d'un convento li fese pensar en convertir-se tamién ella en una moncha.
Primers pasos como actriz y vida de cortesana de luxo
[editar | modificar o codigo]![](http://178.128.105.246/content-http-upload.wikimedia.org/wikipedia/commons/thumb/6/6e/%C2%A7%C2%A7Bernhardt%2C_Sarah_%281844-1923%29_par_Jules_Bastien-Lepage_%281848-1884%29_-_1879.jpg/250px-%C2%A7%C2%A7Bernhardt%2C_Sarah_%281844-1923%29_par_Jules_Bastien-Lepage_%281848-1884%29_-_1879.jpg)
Cuan Sarah teneba 15 anyadas, remató os suyos estudios en o colechio Grandchamp y tornó con a suya mai, qui li proposaba treballar con ella como cortesana, encara que Sarah, ye fácil que por a suya educación relichiosa, se negó inicialment. Uno d'os vesitants d'a suya mai, o duque de Morny (qui yera Chermanastro de l'emperador Napoleón III), aconselló que Sarah dentrase en un Conservatorio ta estudiar ta actriz, y en 1859, por as influencias d'o duque, Sarah i dentró.
Remató os suyo estudios con exito, y dentró dimpués a treballar en a Comédie-Française, a on debutó l'11 d'agosto de 1862 con una obra teatral de Jean Racine. Sindembargo, albandonó a Comédie-Française dimpués de descutir-se con os suyos companyers de reparto. En 1864 conoixió a Charles-Joseph Lamoral, prencipe de Ligné, con qui prencipió una intensa relación amorosa, dica quedar embarazata, cuan o prencipe l'albandonó. O suyo fillo, Maurice Bernhardt, naixió o 22 d'aviento de 1864, y Sarah, que se trobaba sin treballo en o mundo teatral, s'adedicó ta poder sobrevivir a l'oficio de cortesana d'a suya mai, oficio que ya no albandonaría dica consolidar a suya carrera teatral.
Desembolique d'a suya carrera como actriz
[editar | modificar o codigo]![](http://178.128.105.246/content-http-upload.wikimedia.org/wikipedia/commons/thumb/7/7e/Sarah-Bernhardt_%28Hamlet%29.jpg/250px-Sarah-Bernhardt_%28Hamlet%29.jpg)
![](http://178.128.105.246/content-http-upload.wikimedia.org/wikipedia/commons/thumb/7/79/Sarah_Bernhardt_Vanity_Fair.jpg/250px-Sarah_Bernhardt_Vanity_Fair.jpg)
En 1867, Sarah tornó a la suya carrera teatral, treballando en o Teatro de l'Odéon de París con Les femmes savantes, una pieza teatral de Molière, y asinas precipió en realidat a suya carrera profesional como actriz, consolidata en 1869 con una representación en escena d'a obra Le Passant, de François Coppée, a on Sarah Bernhardt interpretaba, por primera vegata en a suya carrera, a un personache masculín, situación que repitió a ormino, destacando a suya interpretación d'o personache protagonista en Hamlet.
En prencipiar a Guerra Franco-prusiana, en 1870, o Teatro de l'Odéon se convertió en un hespital ta feritos de guerra, y Sarah s'adedicó a la cura d'ixos feritos, dica o cierre d'o hespital por problemas de salubridat. En rematar a guerra con a redota francesa y a cayita d'o Segundo Imperio Francés, tornoron ta Francia os exilatos antimonarquicos, feito de muita importancia en a carrera de Sarah, en tornar una figura que estió clau en o desembolique d'a suya carrera: Victor Hugo. Iste autor esleyó a Sarah ta o reestreno d'a suya obra Ruy Blas, y tamién ta o estreno d'a suya nueva obra Hernani, fendo asinas de Sarah una destacata y popular actriz, que tornó a la Comédie-Française como una gran estrela d'o teatro francés. En 1879 viachó ta o Reino Uniu, a on fue recibita como una gran actriz, y a on feba dica dos interpretacions diarias, con a-saber-lo exito. En iste viache conoixió a un choven escritor britanico, Oscar Wilde, de qui en 1893 representó a suya obra Salomé, y en tornar ta Francia, se convertió en socia plena d'a Comédie-Française, ye devir, una personalidat de primera fila en ixa institución.
O 15 d'octubre de 1880 prencipió una chira por Estaus Unius, tamién con exito, que enampló enta Brasil, Archentina y Chile. Tamién actuó en Echipto, en Turquía, en Australia y en Hawaii, amás d'en Moscú, Berlín, Bucarest, Roma u Atenas, convertindo-se asinas en una d'as primeras actrices en fer una chira de caracter mundial.
Antiparte, a suya vida sentimental yera muit intensa, y se li conoixen relacions con, entre muitos d'atros, Gustave Doré, Victor Hugo, Jean Mounet-Sully, Jean Richepin, Philippe Garnier, Gabriele D'Annunzio u Eduardo, prencipe de Galas. Sindembargo, nomás se casó o 4 d'abril de 1882 con Aristides Damala, qui yera un oficial de l'Exercito griego. Sarah miraba de fer un actor d'o suyo esposo, encara que fracasó. Antiparte, a relación ascape se deterioró, con infidelidaz por todas dos partes, y con separacions y reconciliacions a ormino, mesmo cuan o suyo esposo s'alistó en a Lechión Forana Francesa estando destinato a la colonia francesa d'Alcheria, dica que en 1887, cuan Sarah marchó enta America ta una nueva chira, Aristides no l'acompanyó. O matrimonio continó sindembargo dica la muerte d'Aristides en 1889, por complicacions derivatas d'a suya drogadicción (yera adicto a la morfina).
Sarah Bernhardt se convertió tamién en a primera actriz-empresaria que produciba as suyas propias obras teatrals. En estar muit tensas as suyas relacions con o director d'a Comédie-Française, Sarah l'albandonó demitindo como socia plena o 18 de marzo de 1880. A institución la demandó y ganó o pleito, en o cual se condenó a Sarah Bernhardt a pagar una indemnización de 100.000 francos, amás de perder a pensión de 43.000 francos que heba tenito de continar en a Comédie por un menimo de 20 anyadas. Asinas, con o producto d'as suyas chiras, Sarah decidió logar un teatro parisién en 1883, a on se representaban as suyas obras y amás, mientres as suyas chiras, obras interpretatas por d'atros actors, a sobén de teatro de vanguardia, un teatro que a Sarah l'intresaba. Con o tiempo, os teatros que alquilaba yeran mes grans y con mas capacidat d'espectadors.
O sieglo XX
[editar | modificar o codigo]![](http://178.128.105.246/content-http-upload.wikimedia.org/wikipedia/commons/thumb/f/f7/Harvard_Theatre_Collection_-_Sarah_Bernhardt_TCS_2_%28Cleopatra%29.jpg/350px-Harvard_Theatre_Collection_-_Sarah_Bernhardt_TCS_2_%28Cleopatra%29.jpg)
En prencipiar o sieglo XX, Sarah Bernhardt continó con exito as suyas representaxions en París, amás de continar as suyas chiras internacionals. Tamién prebó con o Cine, que heba apareixito en ixe inte, con una cinta en 1900, amás d'atras cintas como La Dame aux Camélies (con o suyo amant d'o momento, Lou Tellegen), Elisabeth, reine d'Anglaterre, dirichita por Louis Mercanton u Jeanne Doré (1913) de Tristan Bernard, que ye considerata a suya millor cinta.
En 1915, o Gubierno francés li concedió a Lechión d'Honor, como premio a la suya destacata carrera d'actriz. Sindembargo, apareixioron problemas de salut. O suyo chenullo, por l'accident que sufrió de nina, yera en un estato delicato, y sufrió amás un nuevo accident en escena mientres a interpretación d'una obra. Como a ferita empioraba, calió amputar-li a garra en febrero de 1915. Con tot y con ixo, Sahah prencipió una chira por o Frent Occidental mientres a Primera Guerra Mundial ta animar a os soldatos de l'Exercito francés que i luitaban, encara que nomás interpretaba si podeba evitar estar en piet.
A suya muerte
[editar | modificar o codigo]En rematar a guerra, Sarah Bernhardt continó con a suya carrera como actriz cinematografica, encara que o suyo estato de salut yera muit precario. Asinas, o 15 de marzo de 1923, mientres rodaba una escena ta una cinta, Sarah se desmayó y no tornó a recuperar-se-ne. Morió o 23 de marzo, en brazos d'o suyo fillo Maurice.
Fue apedacata en o cementerio d'o Père-Lachaise, de París, y a o suyo enterreco fuoron mas de 100.000 parisiens.
Filmografía
[editar | modificar o codigo]Anyo | Títol d'a cinta | Papel | Director | Reparto | Atros |
---|---|---|---|---|---|
1900 | Le duel d'Hamlet[4] | Hamlet | Clément Maurice | Pierre Magnier y Suzanne Seylor | |
1908 | Tosca [5] | Floria Tosca | André Calmettes | Édouard de Max y Georges Deneubourg | Curtometrache |
1911 | La dame aux camélias [6] | Camille | André Calmettes, Louis Mercanton y Henri Pouctal | Lou Tellegen y Paul Capellani | |
1912 | Adrienne Lecouvreur[7] | Adrienne Lecouvreur | Henri Desfontaines y Louis Mercanton | Max Maxudian y Albert Decoeur | |
Les amours de la reine Élisabeth [8] | Isabel I d'Anglaterra | Henri Desfontaines y Louis Mercanton | Lou Tellegen y Max Maxudian | ||
1915 | Ceux de chez nous[9] | Sacha Guitry y Frédéric Rossif | André Antoine y Lysiane Bernhardt | ||
Mères françaises[10] | Enfermera | René Hervil y Louis Mercanton | Gabriel Signoret y Georges Deneubourg | ||
1916 | Jeanne Doré[11] | Jeanne Doré | René Hervil y Louis Mercanton | Raymond Bernard y Jeanne Costa | |
1923 | La voyante[12] | Madame Gainard | Leon Abrams | Georges Melchior y Harry Baur | Sin de acabar |
Bibliografía
[editar | modificar o codigo]- Brandon, Ruth. Being Divine: A Biography of Sarah Bernhardt. Londres: Mandarin, 1992.
- Gold, Arthur and Robert Fitzdale. The Divine Sarah: A Life of Sarah Bernhardt. Nueva York: Alfred A. Knopf, 1991.
- Léturgie, Jean and Xavier Fauche: Sarah Bernhardt, Lucky Luke (49). Dupuis, 1982.
- Lorcey, Jacques. Sarah Bernhardt, l'art et la vie, París : Éditions Séguier, 2005. ISBN 2-84049-417-5.
- McCormick, John (1995). "Bernhardt, Sarah" in The Cambridge Guide to the Theatre. Martin Banham, Cambridge University Press. ISBN 9780521434379.
- Menefee, David W. Sarah Bernhardt in the Theater of Films and Sound Recordings. McFarland, 2003.
- Menefee, David W. The First Female Stars: Women of the Silent Era. Praeger, 2004.
- Ockmann, Carol and Kenneth E. Silver. Sarah Bernhardt: The Art of High Drama. Yale University Press, 2005
- Skinner, Cornelia Otis. Madame Sarah. Paragon House, 1966.
- Snel, Harmen. "The ancestry of Sarah Bernhardt; a myth unravelled". , Joods Historisch Museum, Amsterdam 2007. ISBN 978-90-802029-3-1
- Gottlieb, Robert "Sarah: The Life of Sarah Bernhardt" New Haven, Yale University Press, 2010
- Aston, Elaine. Sarah Bernhardt: A French Actress on the English Stage. Berg Publishers Limited, Oxford 1989.
- Garans, Louis "Sarah Bernhardt: itinéraire d'une divine".Palantines, 2005. ISBN 978-2911434433
Vinclos externos
[editar | modificar o codigo]Se veigan as imáchens de Commons sobre Sarah Bernhardt.
- (en) Sarah Bernhardt en IMDb.
- (en) Sarah Bernhardt en Internet Broadway Database.
- (en) Sarah Bernhardt.
- (fr) Grabación con a voz de Sarah Bernhardt.
- (en) Web sobre Sarah Bernhardt.
Referencias
[editar | modificar o codigo]- ↑ (en) Golden, Eve: From Stage to Screen: The Film Career of Sarah Bernhardt.
- ↑ (en) Gottlieb, Robert: The Drama of Sarah Bernhardt.
- ↑ (en) Britannica Concise Encyclopedia: articlo sobre Sarah Bernhardt.
- ↑ (en) Le duel d'Hamlet en IMDb.
- ↑ (en) Tosca en IMDb.
- ↑ (en) La dame aux camélias en IMDb.
- ↑ (en) Adrienne Lecouvreur en IMDb.
- ↑ (en) Les amours de la reine Élisabeth en IMDb.
- ↑ (en) Ceux de chez nous en IMDb.
- ↑ (en) Mères françaises en IMDb.
- ↑ (en) Jeanne Doré en IMDb.
- ↑ (en) La voyante en IMDb.