Tui shou
Tui shou (chinu tradicional: 推手; pinyin: tuī shǒu; Wade-Giles: t'ui shou), ye un términu chinu que pue tornase a "manes qu'emburrien" y que se refier a un tipu d'exercitamientu de movimientos marciales prauticáu en pareya.
Esta denomación ye común a distintos estilos d'artes marciales internes o “neijia” (chinu tradicional:內家; pinyin: nèi jiā), como’l Pa Kua Chang (Baguazhang), Hsing-I Chuan (Xingyiquan), Tai Chi Chuan (Taijiquan) y I Chuan (Yiquan).
Práutica del Tui shou
[editar | editar la fonte]![](http://178.128.105.246/content-http-upload.wikimedia.org/wikipedia/commons/thumb/d/d7/Tui_Shou2.jpg/270px-Tui_Shou2.jpg)
Prautícase ente dos persones, qu'alternen los papeles d'atacante y de defensor. Cuando ún ye Yang l'otru ye Yin, sollertes a tresformase nel inversu per aciu de movimientos circulares.
Nel casu del Tai Chi Chuan, por exemplu, la forma desarrolla la parte física y mental, mientres que’l Tui shou enseña la capacidá de ceder, tanto física como mentalmente. L’oxetivu ye desendolcar la capacidá d'apegase y ceder, que solamente se consigue per mediu del ameyoramientu de la sensibilidá. La persona que cede, al tar baxo l'aplicación d'una fuercia, pue facer usu d'esta contra’l que l'aplicó. Precisamente esta ye una máxima de les artes marciales: usar la fuercia del adversariu contra él mesmu.
Aspeutos a tener en cuenta
[editar | editar la fonte]Pa ser quien realmente a desendolcar la téunica del Tui shou, hai que tener en cuenta dellos elementos:
- Relaxar: Relaxando’l cuerpu consíguese lliberar el Chi y facer los movimientos de forma correuta y fluyida.
- Recortar: Ye provocar el contautu col otru. En cuantes tea fechu’l contautu col movimientu del adversariu, hai que facer el siguiente pasu, que ye apegase.
- Apegase: Ye simplemente permanecer apegáu, en contautu. Per aciu d'esti tautu, la sensibilidá actívase pa percibir la intensidá y direición del movimientu del adversariu. Con esti fin l'entrenamientu inicial del Tui shou ha facese a baxa velocidá, porque en casu contrariu la sensibilidá nun ye a aguzase. Más tarde, col desarrollu correutu de tolos elementos, el prauticante podrá entrenar a mayor velocidá, pudiendo inclusive entamar el Sanshou (combate llibre).
- Esviar: Tou movimientu ha entamar dende’l cadril. Baxo l'aición d'una fuercia, emplégase un movimientu de cadera que conduz al restu’l cuerpu a facer un movimientu circular, causando asina l'esvíu de l'aición esterna ensin sufrir impautos o desgastes. Pa qu'esti elementu funcione daveres hai qu'usar la enerxía d'esvíu que ye desenrollada pol Chi, y consiguida per mediu del Chi Kung. Ensin esti Chi, tolos otros requisitos del Tui shou nun van ser completos.
- Ceder: Esti ye’l puntu básicu dientro del Tui shou. Ceder ye tar vacíu énte’l contautu del adversariu. Cuando l'adversariu tenta d'alcanzanos y nun consigue un puntu d'apoyu (una resistencia), queda desequilibráu, bastando un pequeñu toque pa que caiga. Na naturaleza tolo que ye duro y ríxido france, y tolo que ye blandio y flexible adáutase. Por exemplu nuna torba l'arbol qu'opón resistencia parte o valta. Xuntando los principios de recortar, apegase, esviar y ceder, arriendes del Chi pal esvíu, l'adversariu nun va ser a alcanzanos xamás y nun va saber cuál ha ser el so siguiente pasu, sintiéndose siempre inferior. Cuando avance va tener la sensación de nun llegar. Al retirase sentirá que dispón d'un espaciu enforma curtiu, y que nun va poder escapar al nuesu alcance.